| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༢. དུཏིཡཝགྒོ
2. Dutiyavaggo
༡. ཝཏཔདསུཏྟཝཎྞནཱ
1. Vatapadasuttavaṇṇanā
༢༥༧. སམཱདཱཏབྦཏོ ཝཏཱནི, ཨཉྙམཉྙཾ ཨསངྐརསབྷཱཝེན པབྦཛིཏབྦཏོ པདཱནི, ཏཏོ ཨེཝ ཨསཾཀིཎྞབྷཱགཱཏི ཀཏྭཱ ‘‘ཝཏཀོཊྛཱསཱནཱི’’ཏི ཝུཏྟཾ། སམཏྟཱནཱིཏི པུཉྙཝིསེསཏཱཡ པུཛྫབྷཝཕལནིབྦཏྟནེན ཀིཏྟིསཉྙཱནེན ཙ སམཾ ཨཏྟཱནི སམཏྟཱནི། པརིཔུཎྞཱནཱིཏི ཨཁཎྜཱདིབྷཱཝེན སབྦསོ པུཎྞཱནི། སམཱདིནྣཱནཱིཏི ཏཏྠ སཀྐཙྩཀཱརིཏཱཡ སམྨཱ ཨཱདིནྣཱནི། མཱཏུལཱནཱིཏི པིཏུབྷགིནཱི, ན ཡཱ ཀཱཙི མཱཏུལསྶ བྷརིཡཱ ཀུལཛེཊྛཀཱནཾ ཨདྷིཔྤེཏཏྟཱ, བྷརིཡཱཔི ཝཱ མཱཏུལསམྦནྡྷཏོ གཧེཏབྦཱ, ཏཐཱ སཏི མཧཱཔིཏུབྷརིཡཱདཱིནམྤི སངྒཧོ དཊྛབྦོ།
257. Samādātabbato vatāni, aññamaññaṃ asaṅkarasabhāvena pabbajitabbato padāni, tato eva asaṃkiṇṇabhāgāti katvā ‘‘vatakoṭṭhāsānī’’ti vuttaṃ. Samattānīti puññavisesatāya pujjabhavaphalanibbattanena kittisaññānena ca samaṃ attāni samattāni. Paripuṇṇānīti akhaṇḍādibhāvena sabbaso puṇṇāni. Samādinnānīti tattha sakkaccakāritāya sammā ādinnāni. Mātulānīti pitubhaginī, na yā kāci mātulassa bhariyā kulajeṭṭhakānaṃ adhippetattā, bhariyāpi vā mātulasambandhato gahetabbā, tathā sati mahāpitubhariyādīnampi saṅgaho daṭṭhabbo.
ཨཱདི-སདྡེན ཛེཊྛབྷགིནཱིནཾ སངྒཧོ། ཨཔཙིཏིཀཱརཀོཏི ཏེསཾ པཙྩུཊྛཱནཀརོ། ཡོ ཀོཙི དདནྟོཔི སཱཔེཀྑོ དེཏི, སོ མུཏྟཙཱགོ ན ཧོཏི, ཨཡཾ པན ན ཨེཝནྟི ‘‘མུཏྟཙཱགོ ཧོཏཱི’’ཏི ཝུཏྟཾ། ཝིསྶཊྛཙཱགོཏི ནིརཔེཀྑཔརིཙྩཱགོཏི ཨཏྠོ། ཡཐཱ པཱཎཱཏིཔཱཏབཧུལོ ‘‘ལོཧིཏཔཱཎཱི’’ཏི ཝུཙྩཏི, ཏཐཱ དཱནབཧུལོ ‘‘པཡཏཔཱཎཱི’’ཏི ཝུཏྟོཏི ཨཱཧ ‘‘དེཡྻདྷམྨདཱནཏྠཱཡ སདཱ དྷོཏཧཏྠོ’’ཏི། ཝོསྶགྒརཏོཏི དེཡྻདྷམྨསྶ པརིཙྩཛནེ ཨབྷིརཏོ། པརེཧི ཡཱཙིཏབྦཱརཧོཏི པརེཧི ཡཱཙིཏུཾ ཡུཏྟོ ཨིཙྪིཏསྶ ཨཏྠསྶ ཏཱཝདེཝ ཝིསྶཛྫནཏོ། དཱནེནེཝ ཡུཏྟོཏི སབྦཀཱལཾ དཱནེནེཝ ཡུཏྟོ ཨབྷིཎྷཾ པཝཏྟམཧཱདཱནཏྟཱ། དཱནེ ཙ སཾཝིབྷཱགེ ཙཱཏི པརསྶ སམྤུཎྞཾ ཀཏྭཱ པརིཙྩཛནསངྑཱཏེ དཱནེ ཙ ཨཏྟནཱ པརིབྷུཉྫིཏབྦཏོ སཾཝིབྷཛནསངྑཱཏེ སཾཝིབྷཱགེ ཙ རཏོ ཨབྷིརཏོ།
Ādi-saddena jeṭṭhabhaginīnaṃ saṅgaho. Apacitikārakoti tesaṃ paccuṭṭhānakaro. Yo koci dadantopi sāpekkho deti, so muttacāgo na hoti, ayaṃ pana na evanti ‘‘muttacāgo hotī’’ti vuttaṃ. Vissaṭṭhacāgoti nirapekkhapariccāgoti attho. Yathā pāṇātipātabahulo ‘‘lohitapāṇī’’ti vuccati, tathā dānabahulo ‘‘payatapāṇī’’ti vuttoti āha ‘‘deyyadhammadānatthāya sadā dhotahattho’’ti. Vossaggaratoti deyyadhammassa pariccajane abhirato. Parehi yācitabbārahoti parehi yācituṃ yutto icchitassa atthassa tāvadeva vissajjanato. Dāneneva yuttoti sabbakālaṃ dāneneva yutto abhiṇhaṃ pavattamahādānattā. Dāne ca saṃvibhāge cāti parassa sampuṇṇaṃ katvā pariccajanasaṅkhāte dāne ca attanā paribhuñjitabbato saṃvibhajanasaṅkhāte saṃvibhāge ca rato abhirato.
ཝཏཔདསུཏྟཝཎྞནཱ ནིཊྛིཏཱ།
Vatapadasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡. ཝཏཔདསུཏྟཾ • 1. Vatapadasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. ཝཏཔདསུཏྟཝཎྞནཱ • 1. Vatapadasuttavaṇṇanā
