| Library / Tipiṭaka / តិបិដក • Tipiṭaka / មជ្ឈិមនិកាយ (អដ្ឋកថា) • Majjhimanikāya (aṭṭhakathā) |
៧. វនបត្ថបរិយាយសុត្តវណ្ណនា
7. Vanapatthapariyāyasuttavaṇṇanā
១៩០. ឯវំ មេ សុតន្តិ វនបត្ថបរិយាយំ។ តត្ថ វនបត្ថបរិយាយន្តិ វនបត្ថការណំ, វនបត្ថទេសនំ វា។
190.Evaṃme sutanti vanapatthapariyāyaṃ. Tattha vanapatthapariyāyanti vanapatthakāraṇaṃ, vanapatthadesanaṃ vā.
១៩១. វនបត្ថំ ឧបនិស្សាយ វិហរតីតិ មនុស្សូបចារាតិក្កន្តំ វនសណ្ឌសេនាសនំ និស្សាយ សមណធម្មំ ករោន្តោ វិហរតិ។ អនុបដ្ឋិតាតិអាទីសុ បុព្ពេ អនុបដ្ឋិតា សតិ តំ ឧបនិស្សាយ វិហរតោបិ ន ឧបដ្ឋាតិ, បុព្ពេ អសមាហិតំ ចិត្តំ ន សមាធិយតិ, បុព្ពេ អបរិក្ខីណា អាសវា ន បរិក្ខយំ គច្ឆន្តិ, បុព្ពេ អននុប្បត្តំ អនុត្តរំ យោគក្ខេមសង្ខាតំ អរហត្តញ្ច ន បាបុណាតីតិ អត្ថោ។ ជីវិតបរិក្ខារាតិ ជីវិតសម្ភារា។ សមុទានេតព្ពាតិ សមាហរិតព្ពា។ កសិរេន សមុទាគច្ឆន្តីតិ ទុក្ខេន ឧប្បជ្ជន្តិ។ រត្តិភាគំ វា ទិវសភាគំ វាតិ រត្តិកោដ្ឋាសេ វា ទិវសកោដ្ឋាសេ វា។ ឯត្ថ ច រត្តិភាគេ បដិសញ្ចិក្ខមានេន ញត្វា រត្តិំយេវ បក្កមិតព្ពំ, រត្តិំ ចណ្ឌវាឡាទីនំ បរិពន្ធេ សតិ អរុណុគ្គមនំ អាគមេតព្ពំ។ ទិវសភាគេ ញត្វា ទិវាវ បក្កមិតព្ពំ, ទិវា បរិពន្ធេ សតិ សូរិយត្ថង្គមនំ អាគមេតព្ពំ។
191.Vanapatthaṃ upanissāya viharatīti manussūpacārātikkantaṃ vanasaṇḍasenāsanaṃ nissāya samaṇadhammaṃ karonto viharati. Anupaṭṭhitātiādīsu pubbe anupaṭṭhitā sati taṃ upanissāya viharatopi na upaṭṭhāti, pubbe asamāhitaṃ cittaṃ na samādhiyati, pubbe aparikkhīṇā āsavā na parikkhayaṃ gacchanti, pubbe ananuppattaṃ anuttaraṃ yogakkhemasaṅkhātaṃ arahattañca na pāpuṇātīti attho. Jīvitaparikkhārāti jīvitasambhārā. Samudānetabbāti samāharitabbā. Kasirena samudāgacchantīti dukkhena uppajjanti. Rattibhāgaṃ vā divasabhāgaṃ vāti rattikoṭṭhāse vā divasakoṭṭhāse vā. Ettha ca rattibhāge paṭisañcikkhamānena ñatvā rattiṃyeva pakkamitabbaṃ, rattiṃ caṇḍavāḷādīnaṃ paribandhe sati aruṇuggamanaṃ āgametabbaṃ. Divasabhāge ñatvā divāva pakkamitabbaṃ, divā paribandhe sati sūriyatthaṅgamanaṃ āgametabbaṃ.
១៩២. សង្ខាបីតិ ឯវំ សមណធម្មស្ស អនិប្ផជ្ជនភាវំ ជានិត្វា។ អនន្តរវារេ បន សង្ខាបីតិ ឯវំ សមណធម្មស្ស និប្ផជ្ជនភាវំ ជានិត្វា។
192.Saṅkhāpīti evaṃ samaṇadhammassa anipphajjanabhāvaṃ jānitvā. Anantaravāre pana saṅkhāpīti evaṃ samaṇadhammassa nipphajjanabhāvaṃ jānitvā.
១៩៤. យាវជីវន្តិ យាវ ជីវិតំ បវត្តតិ, តាវ វត្ថព្ពមេវ។
194.Yāvajīvanti yāva jīvitaṃ pavattati, tāva vatthabbameva.
១៩៥. សោ បុគ្គលោតិ បទស្ស នានុពន្ធិតព្ពោតិ ឥមិនា សម្ពន្ធោ។ អនាបុច្ឆាតិ ឥធ បន តំ បុគ្គលំ អនាបុច្ឆា បក្កមិតព្ពន្តិ អត្ថោ។
195.So puggaloti padassa nānubandhitabboti iminā sambandho. Anāpucchāti idha pana taṃ puggalaṃ anāpucchā pakkamitabbanti attho.
១៩៧. សង្ខាបីតិ ឯវំ សមណធម្មស្ស អនិប្ផជ្ជនភាវំ ញត្វា សោ បុគ្គលោ នានុពន្ធិតព្ពោ, តំ អាបុច្ឆា បក្កមិតព្ពំ។
197.Saṅkhāpīti evaṃ samaṇadhammassa anipphajjanabhāvaṃ ñatvā so puggalo nānubandhitabbo, taṃ āpucchā pakkamitabbaṃ.
១៩៨. អបិ បនុជ្ជមានេនាបីតិ អបិ និក្កឌ្ឍីយមានេនាបិ។ ឯវរូបោ ហិ បុគ្គលោ សចេបិ ទារុកលាបសតំ វា ឧទកឃដសតំ វា វាលិកម្ពណសតំ វា ទណ្ឌំ អាហរាបេតិ, មា ឥធ វសីតិ និក្កឌ្ឍាបេតិ វា, តំ តំ ខមាបេត្វា យាវជីវំ វត្ថព្ពមេវាតិ។
198.Apipanujjamānenāpīti api nikkaḍḍhīyamānenāpi. Evarūpo hi puggalo sacepi dārukalāpasataṃ vā udakaghaṭasataṃ vā vālikambaṇasataṃ vā daṇḍaṃ āharāpeti, mā idha vasīti nikkaḍḍhāpeti vā, taṃ taṃ khamāpetvā yāvajīvaṃ vatthabbamevāti.
បបញ្ចសូទនិយា មជ្ឈិមនិកាយដ្ឋកថាយ
Papañcasūdaniyā majjhimanikāyaṭṭhakathāya
វនបត្ថបរិយាយសុត្តវណ្ណនា និដ្ឋិតា។
Vanapatthapariyāyasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / មជ្ឈិមនិកាយ • Majjhimanikāya / ៧. វនបត្ថសុត្តំ • 7. Vanapatthasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / មជ្ឈិមនិកាយ (ដីកា) • Majjhimanikāya (ṭīkā) / ៧. វនបត្ថបរិយាយសុត្តវណ្ណនា • 7. Vanapatthapariyāyasuttavaṇṇanā
