| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
១៦. វច្ចបស្សាវដ្ឋានិកនិទ្ទេសវណ្ណនា
16. Vaccapassāvaṭṭhānikaniddesavaṇṇanā
១៥៦. វច្ចបស្សាវដ្ឋានិកន្តិ ឋានម្ហិ ឋានេ វា ភវំ វច្ចបស្សាវដ្ឋានិកំ។ យថាវុឌ្ឍំ វច្ចំ ន ករេយ្យាតិ សម្ពន្ធោ។ យេ យេ វុឌ្ឍា យថាវុឌ្ឍំ, អាគតប្បដិបាដិំ ហិត្វា វុឌ្ឍប្បដិបាដិយាតិ អត្ថោ។ វច្ចន្តិ ឧបលក្ខណមត្តំ, បស្សាវញ្ច នហានញ្ច ន ករេយ្យាតិ អធិប្បាយោ។ តទេវ សមត្ថេតិ ‘‘យាតានុបុព្ពិយា’’តិអាទិនា។ យាតានុបុព្ពិយាតិ យាតានំ គតានំ អនុបុព្ពិ អនុក្កមោ យាតានុបុព្ពិ, តាយ។ វច្ច…បេ.… តិត្ថញ្ចាតិ ឯតំ តយំ លព្ភតីតិ អត្ថោ, ភិក្ខុនាតិ វិញ្ញាយតិ។
156.Vaccapassāvaṭṭhānikanti ṭhānamhi ṭhāne vā bhavaṃ vaccapassāvaṭṭhānikaṃ. Yathāvuḍḍhaṃ vaccaṃ na kareyyāti sambandho. Ye ye vuḍḍhā yathāvuḍḍhaṃ, āgatappaṭipāṭiṃ hitvā vuḍḍhappaṭipāṭiyāti attho. Vaccanti upalakkhaṇamattaṃ, passāvañca nahānañca na kareyyāti adhippāyo. Tadeva samattheti ‘‘yātānupubbiyā’’tiādinā. Yātānupubbiyāti yātānaṃ gatānaṃ anupubbi anukkamo yātānupubbi, tāya. Vacca…pe… titthañcāti etaṃ tayaṃ labbhatīti attho, bhikkhunāti viññāyati.
១៥៧. ឧព្ភជិត្វា ច សហសា ច នោ បវិសេយ្យាតិ សម្ពន្ធោ។ ឧព្ភជិត្វាតិ ចីវរំ ទូរតោវ ឧក្ខិបិត្វា។ សហសាតិ សីឃំ។ ឧក្កាសិត្វា បវិសេយ្យាតិ យោជនា។
157. Ubbhajitvā ca sahasā ca no paviseyyāti sambandho. Ubbhajitvāti cīvaraṃ dūratova ukkhipitvā. Sahasāti sīghaṃ. Ukkāsitvā paviseyyāti yojanā.
១៥៨. វច្ចបស្សាវទោណីនំ ពហីតិ សម្ពន្ធោ។ ឧភយន្តិ វច្ចម្បិ បស្សាវម្បិ។
158. Vaccapassāvadoṇīnaṃ bahīti sambandho. Ubhayanti vaccampi passāvampi.
១៥៩. កូបេតិ វច្ចាវាដេ។ កដ្ឋន្តិ អវលេខនកដ្ឋំ។ ផរុសេនាតិ ខរេន អវលេខនកដ្ឋេន។ ឧហតញ្ចាបីតិ អត្តនា វា បរេន វា ឧហតញ្ចាបិ វច្ចមក្ខិតញ្ចាបីតិ អត្ថោ។ ធោវយេតិ សតិ ឧទកេ, ឧទកេ អសតិ កដ្ឋេនបិ សោធេយ្យ។
159.Kūpeti vaccāvāṭe. Kaṭṭhanti avalekhanakaṭṭhaṃ. Pharusenāti kharena avalekhanakaṭṭhena. Uhatañcāpīti attanā vā parena vā uhatañcāpi vaccamakkhitañcāpīti attho. Dhovayeti sati udake, udake asati kaṭṭhenapi sodheyya.
១៦០. ន និក្ខមេតិ ន និក្ខមេយ្យ។ ចបុ ចបូតិ អនុករណំ, វិច្ឆាយំ ទ្វិត្តេ ចបុ ចបុ កត្វាតិ កិរិយាវិសេសនំ។ នាចមេយ្យាតិ ន ធោវេយ្យ។ សតិ បន ឧទកេ អាចមិតព្ពំ, អសតិ យេន កេនចិ បុញ្ឆិត្វា គន្តព្ពំ, សព្ពសាធារណដ្ឋានេ ច អាចមនកុម្ភិយា ឧទកំ ន សេសេតព្ពំ។ ឧក្លាបន្តិ កចវរំ។ វិសោធយេតិ វិហារសោធនេ វិយ វច្ចបស្សាវកុដិយោ, បរិវេណកោដ្ឋកេ ច សម្មជ្ជេយ្យ។ សព្ពត្ថេវ ច បន វត្តភេទេ ទុក្កដំ។
160.Na nikkhameti na nikkhameyya. Capu capūti anukaraṇaṃ, vicchāyaṃ dvitte capu capu katvāti kiriyāvisesanaṃ. Nācameyyāti na dhoveyya. Sati pana udake ācamitabbaṃ, asati yena kenaci puñchitvā gantabbaṃ, sabbasādhāraṇaṭṭhāne ca ācamanakumbhiyā udakaṃ na sesetabbaṃ. Uklāpanti kacavaraṃ. Visodhayeti vihārasodhane viya vaccapassāvakuṭiyo, pariveṇakoṭṭhake ca sammajjeyya. Sabbattheva ca pana vattabhede dukkaṭaṃ.
វច្ចបស្សាវដ្ឋានិកនិទ្ទេសវណ្ណនា និដ្ឋិតា។
Vaccapassāvaṭṭhānikaniddesavaṇṇanā niṭṭhitā.
