| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
៧៧. ឧបោសថភេទាទិ
77. Uposathabhedādi
១៤៩. អថ ខោ ភិក្ខូនំ ឯតទហោសិ – ‘‘កតិ នុ ខោ ឧបោសថា’’តិ? ភគវតោ ឯតមត្ថំ អារោចេសុំ។ ទ្វេមេ, ភិក្ខវេ, ឧបោសថា – ចាតុទ្ទសិកោ ច បន្នរសិកោ ច។ ឥមេ ខោ, ភិក្ខវេ, ទ្វេ ឧបោសថាតិ។
149. Atha kho bhikkhūnaṃ etadahosi – ‘‘kati nu kho uposathā’’ti? Bhagavato etamatthaṃ ārocesuṃ. Dveme, bhikkhave, uposathā – cātuddasiko ca pannarasiko ca. Ime kho, bhikkhave, dve uposathāti.
អថ ខោ ភិក្ខូនំ ឯតទហោសិ – ‘‘កតិ នុ ខោ ឧបោសថកម្មានី’’តិ? ភគវតោ ឯតមត្ថំ អារោចេសុំ។ ចត្តារិមានិ, ភិក្ខវេ, ឧបោសថកម្មានិ – អធម្មេន វគ្គំ ឧបោសថកម្មំ, អធម្មេន សមគ្គំ ឧបោសថកម្មំ, ធម្មេន វគ្គំ ឧបោសថកម្មំ, ធម្មេន សមគ្គំ ឧបោសថកម្មន្តិ។ តត្រ, ភិក្ខវេ, យទិទំ អធម្មេន វគ្គំ ឧបោសថកម្មំ, ន, ភិក្ខវេ, ឯវរូបំ ឧបោសថកម្មំ, កាតព្ពំ។ ន ច មយា ឯវរូបំ ឧបោសថកម្មំ អនុញ្ញាតំ។ តត្រ, ភិក្ខវេ, យទិទំ អធម្មេន សមគ្គំ ឧបោសថកម្មំ, ន, ភិក្ខវេ, ឯវរូបំ ឧបោសថកម្មំ កាតព្ពំ។ ន ច មយា ឯវរូបំ ឧបោសថកម្មំ អនុញ្ញាតំ។ តត្រ, ភិក្ខវេ, យទិទំ ធម្មេន វគ្គំ ឧបោសថកម្មំ, ន, ភិក្ខវេ, ឯវរូបំ ឧបោសថកម្មំ កាតព្ពំ។ ន ច មយា ឯវរូបំ ឧបោសថកម្មំ អនុញ្ញាតំ។ តត្រ, ភិក្ខវេ, យទិទំ ធម្មេន សមគ្គំ ឧបោសថកម្មំ, ឯវរូបំ, ភិក្ខវេ, ឧបោសថកម្មំ កាតព្ពំ, ឯវរូបញ្ច មយា ឧបោសថកម្មំ អនុញ្ញាតំ។ តស្មាតិហ, ភិក្ខវេ, ឯវរូបំ ឧបោសថកម្មំ ករិស្សាម យទិទំ ធម្មេន សមគ្គន្តិ – ឯវញ្ហិ វោ, ភិក្ខវេ, សិក្ខិតព្ពន្តិ។
Atha kho bhikkhūnaṃ etadahosi – ‘‘kati nu kho uposathakammānī’’ti? Bhagavato etamatthaṃ ārocesuṃ. Cattārimāni, bhikkhave, uposathakammāni – adhammena vaggaṃ uposathakammaṃ, adhammena samaggaṃ uposathakammaṃ, dhammena vaggaṃ uposathakammaṃ, dhammena samaggaṃ uposathakammanti. Tatra, bhikkhave, yadidaṃ adhammena vaggaṃ uposathakammaṃ, na, bhikkhave, evarūpaṃ uposathakammaṃ, kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ adhammena samaggaṃ uposathakammaṃ, na, bhikkhave, evarūpaṃ uposathakammaṃ kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ dhammena vaggaṃ uposathakammaṃ, na, bhikkhave, evarūpaṃ uposathakammaṃ kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ dhammena samaggaṃ uposathakammaṃ, evarūpaṃ, bhikkhave, uposathakammaṃ kātabbaṃ, evarūpañca mayā uposathakammaṃ anuññātaṃ. Tasmātiha, bhikkhave, evarūpaṃ uposathakammaṃ karissāma yadidaṃ dhammena samagganti – evañhi vo, bhikkhave, sikkhitabbanti.
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / ឧបោសថភេទាទិកថា • Uposathabhedādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ឧបោសថភេទាទិកថាវណ្ណនា • Uposathabhedādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ឧបោសថភេទាទិកថាវណ្ណនា • Uposathabhedādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ឧបោសថភេទាទិកថាវណ្ណនា • Uposathabhedādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៧៧. ឧបោសថភេទាទិកថា • 77. Uposathabhedādikathā
