| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. ဥပသ္သယသုတ္တဝဏ္ဏနာ
10. Upassayasuttavaṇṇanā
၁၅၃. လာဘသက္ကာရဟေတုပိ ဧကစ္စေ ဘိက္ခူ ဘိက္ခုနုပသ္သယံ ဂန္တ္ဝာ ဘိက္ခုနိယော ဩဝဒန္တိ, ဧဝမေဝံ အယံ ပန ထေရော န လာဘသက္ကာရဟေတု ဘိက္ခုနုပသ္သယဂမနံ ယာစတိ, အထ ကသ္မာတိ အာဟ ‘‘ကမ္မဋ္ဌာနတ္ထိကာ’’တိအာဒိ။ ဧသော ဟိ အာနန္ဒတ္ထေရော ဥသ္သုက္ကာပေတ္ဝာ ပဋိပတ္တိဂုဏံ ဒသ္သေန္တော ယသ္မာ တာ ဘိက္ခုနိယော စတုသစ္စကမ္မဋ္ဌာနိကာ, တသ္မာ ပဉ္စန္နံ ဥပာဒာနက္ခန္ဓာနံ ဥဒယဗ္ဗယာဒိပကာသနိယာ ဓမ္မကထာယ ဝိပသ္သနာပဋိပတ္တိသမ္ပဒံ ဒသ္သေသိ။ အနိစ္စာဒိလက္ခဏာနိ စေဝ ဥဒယဗ္ဗယာဒိကေ စ သမ္မာ ဒသ္သေသိ။ ဟတ္ထေန ဂဟေတ္ဝာ ဝိယ ပစ္စက္ခတော ဒသ္သေသိ။ သမာဒပေသီတိ တတ္ထ လက္ခဏာရမ္မဏိကဝိပသ္သနံ သမာဒပေသိ။ ယထာ ဝီထိပဋိပန္နော ဟုတ္ဝာ ပဝတ္တတိ, ဧဝံ ဂဏ္ဟာပေသိ။ သမုတ္တေဇေသီတိ ဝိပသ္သနာယ အာရဒ္ဓာယ သင္ခာရာနံ ဥဒယဗ္ဗယာဒီသု ဥပဋ္ဌဟန္တေသု ယထာကာလံ ပဂ္ဂဟသမုပေက္ခဏေဟိ ဗောဇ္ဈင္ဂာနံ အနုပဝတ္တနေန ဘာဝနာမဇ္ဈိမဝီထိံ ပာပေတ္ဝာ ယထာ ဝိပသ္သနာဉာဏံ သုပ္ပသန္နံ ဟုတ္ဝာ ဝဟတိ, ဧဝံ ဣန္ဒ္ရိယာနံ ဝိသဒဘာဝကရဏေန ဝိပသ္သနာစိတ္တံ သမ္မာ ဥတ္တေဇေသိ, နိဗ္ဗာနဝသေန ဝာ သမာဒပေသိ။ သမ္ပဟံသေသီတိ တထာ ပဝတ္တိယမာနာယ ဝိပသ္သနာယ သမပ္ပဝတ္တဘာဝနာဝသေန ဥပရိ လဒ္ဓဗ္ဗဘာဝနာဝသေန စိတ္တံ သမ္ပဟံသေသိ, လဒ္ဓသ္သာဒဝသေန သုဋ္ဌု တောသေသိ။ ဧဝမေတ္ထ အတ္ထော ဝေဒိတဗ္ဗော။
153. Lābhasakkārahetupi ekacce bhikkhū bhikkhunupassayaṃ gantvā bhikkhuniyo ovadanti, evamevaṃ ayaṃ pana thero na lābhasakkārahetu bhikkhunupassayagamanaṃ yācati, atha kasmāti āha ‘‘kammaṭṭhānatthikā’’tiādi. Eso hi ānandatthero ussukkāpetvā paṭipattiguṇaṃ dassento yasmā tā bhikkhuniyo catusaccakammaṭṭhānikā, tasmā pañcannaṃ upādānakkhandhānaṃ udayabbayādipakāsaniyā dhammakathāya vipassanāpaṭipattisampadaṃ dassesi. Aniccādilakkhaṇāni ceva udayabbayādike ca sammā dassesi. Hatthena gahetvā viya paccakkhato dassesi. Samādapesīti tattha lakkhaṇārammaṇikavipassanaṃ samādapesi. Yathā vīthipaṭipanno hutvā pavattati, evaṃ gaṇhāpesi. Samuttejesīti vipassanāya āraddhāya saṅkhārānaṃ udayabbayādīsu upaṭṭhahantesu yathākālaṃ paggahasamupekkhaṇehi bojjhaṅgānaṃ anupavattanena bhāvanāmajjhimavīthiṃ pāpetvā yathā vipassanāñāṇaṃ suppasannaṃ hutvā vahati, evaṃ indriyānaṃ visadabhāvakaraṇena vipassanācittaṃ sammā uttejesi, nibbānavasena vā samādapesi. Sampahaṃsesīti tathā pavattiyamānāya vipassanāya samappavattabhāvanāvasena upari laddhabbabhāvanāvasena cittaṃ sampahaṃsesi, laddhassādavasena suṭṭhu tosesi. Evamettha attho veditabbo.
မနုတေ ပရိညာဒိဝသေန သစ္စာနိ ဗုဇ္ဈတီတိ မုနိ။ တေတိ တံ။ ဥပယောဂတ္ထေ ဟိ ဣဒံ သာမိဝစနံ။ ဥတ္တရီတိ ဥပရိ, တဝ ယထာဘူတသဘာဝတော ပရတောတိ အတ္ထော။ ပက္ခပတိတော အဂတိဂမနံ အတိရေကဩကာသော။ ဥပပရိက္ခီတိ အနုဝိစ္စ နိဝာရကော န ဗဟုမတော။ ဗုဒ္ဓပဋိဘာဂော ထေရော။ ‘‘ဗာလာ ဘိက္ခုနီ ဒုဗ္ဘာသိတံ အာဟာ’’တိ အဝတ္ဝာ ‘‘ခမထ, ဘန္တေ’’တိ ဝဒန္တေန ပက္ခပာတေန ဝိယ ဝုတ္တံ ဟောတီတိ အာဟ ‘‘ဧကာ ဘိက္ခုနီ န ဝာရိတာ’’တိအာဒိ။
Manute pariññādivasena saccāni bujjhatīti muni. Teti taṃ. Upayogatthe hi idaṃ sāmivacanaṃ. Uttarīti upari, tava yathābhūtasabhāvato paratoti attho. Pakkhapatito agatigamanaṃ atirekaokāso. Upaparikkhīti anuvicca nivārako na bahumato. Buddhapaṭibhāgo thero. ‘‘Bālā bhikkhunī dubbhāsitaṃ āhā’’ti avatvā ‘‘khamatha, bhante’’ti vadantena pakkhapātena viya vuttaṃ hotīti āha ‘‘ekā bhikkhunī na vāritā’’tiādi.
စုတာ သလိင္ဂတော နဋ္ဌာ, ဒေသန္တရပက္ကမေန အဒသ္သနံ န ဂတာ။ ကဏ္ဋကသာခာ ဝိယာတိ ကုရဏ္ဋကအပာမဂ္ဂကဏ္ဋကလသိကာဟိ သာခာ ဝိယ။
Cutā saliṅgato naṭṭhā, desantarapakkamena adassanaṃ na gatā. Kaṇṭakasākhā viyāti kuraṇṭakaapāmaggakaṇṭakalasikāhi sākhā viya.
ဥပသ္သယသုတ္တဝဏ္ဏနာ နိဋ္ဌိတာ။
Upassayasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ဥပသ္သယသုတ္တံ • 10. Upassayasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. ဥပသ္သယသုတ္တဝဏ္ဏနာ • 10. Upassayasuttavaṇṇanā
