| Library / Tipiṭaka / තිපිටක • Tipiṭaka / චූළනිද්දෙසපාළි • Cūḷaniddesapāḷi |
6. උපසීවමාණවපුච්ඡා
6. Upasīvamāṇavapucchā
94.
94.
‘‘එකො අහං සක්ක මහන්තමොඝං, [ඉච්චායස්මා උපසීවො]
‘‘Eko ahaṃ sakka mahantamoghaṃ, [iccāyasmā upasīvo]
අනිස්සිතො නො විසහාමි තාරිතුං;
Anissito no visahāmi tārituṃ;
ආරම්මණං බ්රූහි සමන්තචක්ඛු, යං නිස්සිතො ඔඝමිමං තරෙය්යං’’.
Ārammaṇaṃ brūhi samantacakkhu, yaṃ nissito oghamimaṃ tareyyaṃ’’.
95.
95.
‘‘ආකිඤ්චඤ්ඤං පෙක්ඛමානො සතිමා, [උපසීවාති භගවා]
‘‘Ākiñcaññaṃ pekkhamāno satimā, [upasīvāti bhagavā]
නත්ථීති නිස්සාය තරස්සු ඔඝං;
Natthīti nissāya tarassu oghaṃ;
කාමෙ පහාය විරතො කථාහි, තණ්හක්ඛයං නත්තමහාභිපස්ස’’.
Kāme pahāya virato kathāhi, taṇhakkhayaṃ nattamahābhipassa’’.
96.
96.
‘‘සබ්බෙසු කාමෙසු යො වීතරාගො, [ඉච්චායස්මා උපසීවො]
‘‘Sabbesu kāmesu yo vītarāgo, [iccāyasmā upasīvo]
ආකිඤ්චඤ්ඤං නිස්සිතො හිත්වා මඤ්ඤං;
Ākiñcaññaṃ nissito hitvā maññaṃ;
97.
97.
‘‘සබ්බෙසු කාමෙසු යො වීතරාගො, [උපසීවාති භගවා]
‘‘Sabbesu kāmesu yo vītarāgo, [upasīvāti bhagavā]
ආකිඤ්චඤ්ඤං නිස්සිතො හිත්වා මඤ්ඤං;
Ākiñcaññaṃ nissito hitvā maññaṃ;
සඤ්ඤාවිමොක්ඛෙ පරමෙ විමුත්තො, තිට්ඨෙය්ය සො තත්ථ අනානුයායී’’.
Saññāvimokkhe parame vimutto, tiṭṭheyya so tattha anānuyāyī’’.
98.
98.
‘‘තිට්ඨෙ චෙ සො තත්ථ අනානුයායී, පූගම්පි වස්සානං සමන්තචක්ඛු;
‘‘Tiṭṭhe ce so tattha anānuyāyī, pūgampi vassānaṃ samantacakkhu;
තත්ථෙව සො සීතිසියා විමුත්තො, චවෙථ විඤ්ඤාණං තථාවිධස්ස’’.
Tattheva so sītisiyā vimutto, cavetha viññāṇaṃ tathāvidhassa’’.
99.
99.
‘‘අච්චි යථා වාතවෙගෙන ඛිත්තා, [උපසීවාති භගවා]
‘‘Acci yathā vātavegena khittā, [upasīvāti bhagavā]
අත්ථං පලෙති න උපෙති සඞ්ඛං;
Atthaṃ paleti na upeti saṅkhaṃ;
එවං මුනී නාමකායා විමුත්තො, අත්ථං පලෙති න උපෙති සඞ්ඛං’’.
Evaṃ munī nāmakāyā vimutto, atthaṃ paleti na upeti saṅkhaṃ’’.
100.
100.
‘‘අත්ථඞ්ගතො සො උද වා සො නත්ථි, උදාහු වෙ සස්සතියා අරොගො;
‘‘Atthaṅgato so uda vā so natthi, udāhu ve sassatiyā arogo;
තං මෙ මුනී සාධු වියාකරොහි, තථා හි තෙ විදිතො එස ධම්මො’’.
Taṃ me munī sādhu viyākarohi, tathā hi te vidito esa dhammo’’.
101.
101.
‘‘අත්ථඞ්ගතස්ස න පමාණමත්ථි, [උපසීවාති භගවා]
‘‘Atthaṅgatassa na pamāṇamatthi, [upasīvāti bhagavā]
යෙන නං වජ්ජුං තං තස්ස නත්ථි;
Yena naṃ vajjuṃ taṃ tassa natthi;
සබ්බෙසු ධම්මෙසු සමූහතෙසු, සමූහතා වාදපථාපි සබ්බෙ’’ති.
Sabbesu dhammesu samūhatesu, samūhatā vādapathāpi sabbe’’ti.
උපසීවමාණවපුච්ඡා ඡට්ඨී.
Upasīvamāṇavapucchā chaṭṭhī.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / චූළනිද්දෙස-අට්ඨකථා • Cūḷaniddesa-aṭṭhakathā / 6. උපසීවමාණවසුත්තනිද්දෙසවණ්ණනා • 6. Upasīvamāṇavasuttaniddesavaṇṇanā
