| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
៦. ឧបសីវមាណវបុច្ឆា
6. Upasīvamāṇavapucchā
១០៧៥.
1075.
‘‘ឯកោ អហំ សក្ក មហន្តមោឃំ, (ឥច្ចាយស្មា ឧបសីវោ)
‘‘Eko ahaṃ sakka mahantamoghaṃ, (iccāyasmā upasīvo)
អនិស្សិតោ នោ វិសហាមិ តារិតុំ;
Anissito no visahāmi tārituṃ;
អារម្មណំ ព្រូហិ សមន្តចក្ខុ, យំ និស្សិតោ ឱឃមិមំ តរេយ្យំ’’។
Ārammaṇaṃ brūhi samantacakkhu, yaṃ nissito oghamimaṃ tareyyaṃ’’.
១០៧៦.
1076.
‘‘អាកិញ្ចញ្ញំ បេក្ខមានោ សតិមា, (ឧបសីវាតិ ភគវា)
‘‘Ākiñcaññaṃ pekkhamāno satimā, (upasīvāti bhagavā)
នត្ថីតិ និស្សាយ តរស្សុ ឱឃំ;
Natthīti nissāya tarassu oghaṃ;
កាមេ បហាយ វិរតោ កថាហិ, តណ្ហក្ខយំ នត្តមហាភិបស្ស’’ 1។
Kāme pahāya virato kathāhi, taṇhakkhayaṃ nattamahābhipassa’’ 2.
១០៧៧.
1077.
‘‘សព្ពេសុ កាមេសុ យោ វីតរាគោ, (ឥច្ចាយស្មា ឧបសីវោ)
‘‘Sabbesu kāmesu yo vītarāgo, (iccāyasmā upasīvo)
អាកិញ្ចញ្ញំ និស្សិតោ ហិត្វា មញ្ញំ;
Ākiñcaññaṃ nissito hitvā maññaṃ;
១០៧៨.
1078.
‘‘សព្ពេសុ កាមេសុ យោ វីតរាគោ, (ឧបសីវាតិ ភគវា)
‘‘Sabbesu kāmesu yo vītarāgo, (upasīvāti bhagavā)
អាកិញ្ចញ្ញំ និស្សិតោ ហិត្វា មញ្ញំ;
Ākiñcaññaṃ nissito hitvā maññaṃ;
សញ្ញាវិមោក្ខេ បរមេ វិមុត្តោ, តិដ្ឋេយ្យ សោ តត្ថ អនានុយាយី’’។
Saññāvimokkhe parame vimutto, tiṭṭheyya so tattha anānuyāyī’’.
១០៧៩.
1079.
‘‘តិដ្ឋេ ចេ សោ តត្ថ អនានុយាយី, បូគម្បិ វស្សានំ សមន្តចក្ខុ;
‘‘Tiṭṭhe ce so tattha anānuyāyī, pūgampi vassānaṃ samantacakkhu;
តត្ថេវ សោ សីតិសិយា វិមុត្តោ, ចវេថ វិញ្ញាណំ តថាវិធស្ស’’។
Tattheva so sītisiyā vimutto, cavetha viññāṇaṃ tathāvidhassa’’.
១០៨០.
1080.
‘‘អច្ចី យថា វាតវេគេន ខិត្តា 7, (ឧបសីវាតិ ភគវា)
‘‘Accī yathā vātavegena khittā 8, (upasīvāti bhagavā)
អត្ថំ បលេតិ ន ឧបេតិ សង្ខំ;
Atthaṃ paleti na upeti saṅkhaṃ;
ឯវំ មុនី នាមកាយា វិមុត្តោ, អត្ថំ បលេតិ ន ឧបេតិ សង្ខំ’’។
Evaṃ munī nāmakāyā vimutto, atthaṃ paleti na upeti saṅkhaṃ’’.
១០៨១.
1081.
‘‘អត្ថង្គតោ សោ ឧទ វា សោ នត្ថិ, ឧទាហុ វេ សស្សតិយា អរោគោ;
‘‘Atthaṅgato so uda vā so natthi, udāhu ve sassatiyā arogo;
តំ មេ មុនី សាធុ វិយាករោហិ, តថា ហិ តេ វិទិតោ ឯស ធម្មោ’’។
Taṃ me munī sādhu viyākarohi, tathā hi te vidito esa dhammo’’.
១០៨២.
1082.
‘‘អត្ថង្គតស្ស ន បមាណមត្ថិ, (ឧបសីវាតិ ភគវា)
‘‘Atthaṅgatassa na pamāṇamatthi, (upasīvāti bhagavā)
យេន នំ វជ្ជុំ តំ តស្ស នត្ថិ;
Yena naṃ vajjuṃ taṃ tassa natthi;
សព្ពេសុ ធម្មេសុ សមោហតេសុ, សមូហតា វាទបថាបិ សព្ពេ’’តិ។
Sabbesu dhammesu samohatesu, samūhatā vādapathāpi sabbe’’ti.
ឧបសីវមាណវបុច្ឆា ឆដ្ឋី និដ្ឋិតា។
Upasīvamāṇavapucchā chaṭṭhī niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ៦. ឧបសីវសុត្តវណ្ណនា • 6. Upasīvasuttavaṇṇanā
