| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾಪಾಳಿ • Therīgāthāpāḷi |
೩. ಉಪಚಾಲಾಥೇರೀಗಾಥಾ
3. Upacālātherīgāthā
೧೮೯.
189.
‘‘ಸತಿಮತೀ ಚಕ್ಖುಮತೀ, ಭಿಕ್ಖುನೀ ಭಾವಿತಿನ್ದ್ರಿಯಾ।
‘‘Satimatī cakkhumatī, bhikkhunī bhāvitindriyā;
ಪಟಿವಿಜ್ಝಿಂ ಪದಂ ಸನ್ತಂ, ಅಕಾಪುರಿಸಸೇವಿತಂ’’॥
Paṭivijjhiṃ padaṃ santaṃ, akāpurisasevitaṃ’’.
೧೯೦.
190.
‘‘ಕಿಂ ನು ಜಾತಿಂ ನ ರೋಚೇಸಿ, ಜಾತೋ ಕಾಮಾನಿ ಭುಞ್ಜತಿ।
‘‘Kiṃ nu jātiṃ na rocesi, jāto kāmāni bhuñjati;
ಭುಞ್ಜಾಹಿ ಕಾಮರತಿಯೋ, ಮಾಹು ಪಚ್ಛಾನುತಾಪಿನೀ’’॥
Bhuñjāhi kāmaratiyo, māhu pacchānutāpinī’’.
೧೯೧.
191.
‘‘ಜಾತಸ್ಸ ಮರಣಂ ಹೋತಿ, ಹತ್ಥಪಾದಾನ ಛೇದನಂ।
‘‘Jātassa maraṇaṃ hoti, hatthapādāna chedanaṃ;
ವಧಬನ್ಧಪರಿಕ್ಲೇಸಂ, ಜಾತೋ ದುಕ್ಖಂ ನಿಗಚ್ಛತಿ॥
Vadhabandhapariklesaṃ, jāto dukkhaṃ nigacchati.
೧೯೨.
192.
‘‘ಅತ್ಥಿ ಸಕ್ಯಕುಲೇ ಜಾತೋ, ಸಮ್ಬುದ್ಧೋ ಅಪರಾಜಿತೋ।
‘‘Atthi sakyakule jāto, sambuddho aparājito;
ಸೋ ಮೇ ಧಮ್ಮಮದೇಸೇಸಿ, ಜಾತಿಯಾ ಸಮತಿಕ್ಕಮಂ॥
So me dhammamadesesi, jātiyā samatikkamaṃ.
೧೯೩.
193.
‘‘ದುಕ್ಖಂ ದುಕ್ಖಸಮುಪ್ಪಾದಂ, ದುಕ್ಖಸ್ಸ ಚ ಅತಿಕ್ಕಮಂ।
‘‘Dukkhaṃ dukkhasamuppādaṃ, dukkhassa ca atikkamaṃ;
ಅರಿಯಂ ಚಟ್ಠಙ್ಗಿಕಂ ಮಗ್ಗಂ, ದುಕ್ಖೂಪಸಮಗಾಮಿನಂ॥
Ariyaṃ caṭṭhaṅgikaṃ maggaṃ, dukkhūpasamagāminaṃ.
೧೯೪.
194.
‘‘ತಸ್ಸಾಹಂ ವಚನಂ ಸುತ್ವಾ, ವಿಹರಿಂ ಸಾಸನೇ ರತಾ।
‘‘Tassāhaṃ vacanaṃ sutvā, vihariṃ sāsane ratā;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ॥
Tisso vijjā anuppattā, kataṃ buddhassa sāsanaṃ.
೧೯೫.
195.
‘‘ಸಬ್ಬತ್ಥ ವಿಹತಾ ನನ್ದೀ, ತಮೋಖನ್ಧೋ ಪದಾಲಿತೋ।
‘‘Sabbattha vihatā nandī, tamokhandho padālito;
ಏವಂ ಜಾನಾಹಿ ಪಾಪಿಮ, ನಿಹತೋ ತ್ವಮಸಿ ಅನ್ತಕ’’॥
Evaṃ jānāhi pāpima, nihato tvamasi antaka’’.
… ಉಪಚಾಲಾ ಥೇರೀ…।
… Upacālā therī….
ಸತ್ತಕನಿಪಾತೋ ನಿಟ್ಠಿತೋ।
Sattakanipāto niṭṭhito.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā / ೩. ಉಪಚಾಲಾಥೇರೀಗಾಥಾವಣ್ಣನಾ • 3. Upacālātherīgāthāvaṇṇanā
