| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៥. ឧលូកង្គបញ្ហោ
5. Ulūkaṅgapañho
៥. ‘‘ភន្តេ នាគសេន, ‘ឧលូកស្ស ទ្វេ អង្គានិ គហេតព្ពានី’តិ យំ វទេសិ, កតមានិ តានិ ទ្វេ អង្គានិ គហេតព្ពានី’’តិ? ‘‘យថា, មហារាជ, ឧលូកោ កាកេហិ បដិវិរុទ្ធោ, រត្តិំ កាកសង្ឃំ គន្ត្វា ពហូបិ កាកេ ហនតិ, ឯវមេវ ខោ, មហារាជ, យោគិនា យោគាវចរេន អញ្ញាណេន បដិវិរុទ្ធោ កាតព្ពោ, ឯកេន រហោ និសីទិត្វា អញ្ញាណំ សម្បមទ្ទិតព្ពំ, មូលតោ ឆិន្ទិតព្ពំ។ ឥទំ, មហារាជ, ឧលូកស្ស បឋមំ គហេតព្ពំ។
5. ‘‘Bhante nāgasena, ‘ulūkassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, ulūko kākehi paṭiviruddho, rattiṃ kākasaṅghaṃ gantvā bahūpi kāke hanati, evameva kho, mahārāja, yoginā yogāvacarena aññāṇena paṭiviruddho kātabbo, ekena raho nisīditvā aññāṇaṃ sampamadditabbaṃ, mūlato chinditabbaṃ. Idaṃ, mahārāja, ulūkassa paṭhamaṃ gahetabbaṃ.
‘‘បុន ចបរំ, មហារាជ, ឧលូកោ សុប្បដិសល្លីនោ ហោតិ, ឯវមេវ ខោ, មហារាជ, យោគិនា យោគាវចរេន បដិសល្លានារាមេន ភវិតព្ពំ បដិសល្លានរតេន។ ឥទំ, មហារាជ, ឧលូកស្ស ទុតិយំ អង្គំ គហេតព្ពំ។ ភាសិតម្បេតំ, មហារាជ, ភគវតា ទេវាតិទេវេន សំយុត្តនិកាយវរេ –
‘‘Puna caparaṃ, mahārāja, ulūko suppaṭisallīno hoti, evameva kho, mahārāja, yoginā yogāvacarena paṭisallānārāmena bhavitabbaṃ paṭisallānaratena. Idaṃ, mahārāja, ulūkassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare –
‘‘‘ឥធ, ភិក្ខវេ, ភិក្ខុ បដិសល្លានារាមោ បដិសល្លានរតោ ‘‘ឥទំ ទុក្ខ’’ន្តិ យថាភូតំ បជានាតិ, ‘‘អយំ ទុក្ខសមុទយោ’’តិ យថា ភូថំ បជានាតិ , ‘‘អយំ ទុក្ខនិរោធោ’’តិ យថាភូតំ បជានាតិ, ‘‘អយំ ទុក្ខនិរោធគាមិនី បដិបទា’’តិ យថាភូតំ បជានាតី’’’តិ។
‘‘‘Idha, bhikkhave, bhikkhu paṭisallānārāmo paṭisallānarato ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathā bhūthaṃ pajānāti , ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānātī’’’ti.
ឧលូកង្គបញ្ហោ បញ្ចមោ។
Ulūkaṅgapañho pañcamo.
