| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
៩. តតិយសញ្ញាវេទយិតកថាវណ្ណនា
9. Tatiyasaññāvedayitakathāvaṇṇanā
៧៣២. ឥទានិ យស្មា ‘‘អសុកោ មរណធម្មោ, អសុកោ ន មរណធម្មោ’’តិ សត្តានំ មរណធម្មតាយ និយាមោ នត្ថីតិ សញ្ញាវេទយិតនិរោធំ សមាបន្នោបិ កាលំ ករេយ្យាតិ យេសំ លទ្ធិ, សេយ្យថាបិ រាជគិរិកានំ; តេសំ សមាបន្នាយបិ មរណធម្មតាយ មរណសមយញ្ច អមរណសមយញ្ច ទស្សេតុំ បុច្ឆា សកវាទិស្ស, បដិញ្ញា ឥតរស្ស។ អថ នំ យស្មា កាលំ ករោន្តស្ស នាម មរណន្តិកេហិ ផស្សាទីហិ ភវិតព្ពំ, តស្មា តេនាការេន ចោទេតុំ អត្ថីតិអាទិមាហ។
732. Idāni yasmā ‘‘asuko maraṇadhammo, asuko na maraṇadhammo’’ti sattānaṃ maraṇadhammatāya niyāmo natthīti saññāvedayitanirodhaṃ samāpannopi kālaṃ kareyyāti yesaṃ laddhi, seyyathāpi rājagirikānaṃ; tesaṃ samāpannāyapi maraṇadhammatāya maraṇasamayañca amaraṇasamayañca dassetuṃ pucchā sakavādissa, paṭiññā itarassa. Atha naṃ yasmā kālaṃ karontassa nāma maraṇantikehi phassādīhi bhavitabbaṃ, tasmā tenākārena codetuṃ atthītiādimāha.
អផស្សកស្ស កាលកិរិយាតិអាទីនិ បុដ្ឋោ សេសសត្តេ សន្ធាយ បដិក្ខិបតិ វិសំ កមេយ្យាតិអាទីនិ បុដ្ឋោ សមាបត្តិអានុភាវំ សន្ធាយ បដិក្ខិបតិ។ ទុតិយវារេ សរីរបកតិំ សន្ធាយ បដិជានាតិ។ ឯវំ សន្តេ បន សមាបត្តិអានុភាវោ នាម ន ហោតិ, តេនេវ ន និរោធសមាបន្នោតិ អនុយុញ្ជតិ។
Aphassakassa kālakiriyātiādīni puṭṭho sesasatte sandhāya paṭikkhipati visaṃ kameyyātiādīni puṭṭho samāpattiānubhāvaṃ sandhāya paṭikkhipati. Dutiyavāre sarīrapakatiṃ sandhāya paṭijānāti. Evaṃ sante pana samāpattiānubhāvo nāma na hoti, teneva na nirodhasamāpannoti anuyuñjati.
៧៣៣-៧៣៤. ន កាលំ ករេយ្យាតិ បុច្ឆា បរវាទិស្ស។ អត្ថិ សោ និយាមោតិ បរវាទិស្ស បញ្ហេ បន យស្មា ឯវរូបោ និយាមោ នាម នត្ថិ, តស្មា បដិក្ខិបតិ។ ចក្ខុវិញ្ញាណសមង្គីតិអាទិ សកវាទិនា ‘‘និយាមេ អសន្តេបិ មរណសមយេនេវ មរតិ, នាសមយេនា’’តិ ទស្សេតុំ វុត្តំ។ តត្រាយមធិប្បាយោ – យទិ និយាមាភាវេន កាលកិរិយា ភវេយ្យ, ចក្ខុវិញ្ញាណសមង្គិនោបិ ភវេយ្យ។ តតោ ‘‘បញ្ចហិ វិញ្ញាណេហិ ន ចវតិ, ន ឧបបជ្ជតី’’តិ សុត្តវិរោធោ សិយា។ យថា បន ចក្ខុវិញ្ញាណសមង្គិស្ស កាលកិរិយា ន ហោតិ, តថា និរោធសមាបន្នស្សាបីតិ។
733-734. Na kālaṃ kareyyāti pucchā paravādissa. Atthi so niyāmoti paravādissa pañhe pana yasmā evarūpo niyāmo nāma natthi, tasmā paṭikkhipati. Cakkhuviññāṇasamaṅgītiādi sakavādinā ‘‘niyāme asantepi maraṇasamayeneva marati, nāsamayenā’’ti dassetuṃ vuttaṃ. Tatrāyamadhippāyo – yadi niyāmābhāvena kālakiriyā bhaveyya, cakkhuviññāṇasamaṅginopi bhaveyya. Tato ‘‘pañcahi viññāṇehi na cavati, na upapajjatī’’ti suttavirodho siyā. Yathā pana cakkhuviññāṇasamaṅgissa kālakiriyā na hoti, tathā nirodhasamāpannassāpīti.
តតិយសញ្ញាវេទយិតកថាវណ្ណនា។
Tatiyasaññāvedayitakathāvaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (១៥៣) ៩. តតិយសញ្ញាវេទយិតកថា • (153) 9. Tatiyasaññāvedayitakathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៩. តតិយសញ្ញាវេទយិតកថាវណ្ណនា • 9. Tatiyasaññāvedayitakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៩. តតិយសញ្ញាវេទយិតកថាវណ្ណនា • 9. Tatiyasaññāvedayitakathāvaṇṇanā
