| Library / Tipiṭaka / តិបិដក • Tipiṭaka / វិមានវត្ថុបាឡិ • Vimānavatthupāḷi |
១១. សុនិក្ខិត្តវិមានវត្ថុ
11. Sunikkhittavimānavatthu
១២៨២.
1282.
‘‘ឧច្ចមិទំ មណិថូណំ វិមានំ, សមន្តតោ ទ្វាទស យោជនានិ;
‘‘Uccamidaṃ maṇithūṇaṃ vimānaṃ, samantato dvādasa yojanāni;
កូដាគារា សត្តសតា ឧឡារា, វេឡុរិយថម្ភា រុចកត្ថតា សុភា។
Kūṭāgārā sattasatā uḷārā, veḷuriyathambhā rucakatthatā subhā.
១២៨៣.
1283.
‘‘តត្ថច្ឆសិ បិវសិ ខាទសិ ច, ទិព្ពា ច វីណា បវទន្តិ វគ្គុំ;
‘‘Tatthacchasi pivasi khādasi ca, dibbā ca vīṇā pavadanti vagguṃ;
ទិព្ពា រសា កាមគុណេត្ថ បញ្ច, នារិយោ ច នច្ចន្តិ សុវណ្ណឆន្នា។
Dibbā rasā kāmaguṇettha pañca, nāriyo ca naccanti suvaṇṇachannā.
១២៨៤.
1284.
‘‘កេន តេតាទិសោ វណ្ណោ, កេន តេ ឥធ មិជ្ឈតិ;
‘‘Kena tetādiso vaṇṇo, kena te idha mijjhati;
ឧប្បជ្ជន្តិ ច តេ ភោគា, យេ កេចិ មនសោ បិយា។
Uppajjanti ca te bhogā, ye keci manaso piyā.
១២៨៥.
1285.
‘‘បុច្ឆាមិ ‘តំ ទេវ មហានុភាវ, មនុស្សភូតោ កិមកាសិ បុញ្ញំ;
‘‘Pucchāmi ‘taṃ deva mahānubhāva, manussabhūto kimakāsi puññaṃ;
កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ។
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
១២៨៦.
1286.
សោ ទេវបុត្តោ អត្តមនោ, មោគ្គល្លានេន បុច្ឆិតោ;
So devaputto attamano, moggallānena pucchito;
បញ្ហំ បុដ្ឋោ វិយាកាសិ, យស្ស កម្មស្សិទំ ផលំ។
Pañhaṃ puṭṭho viyākāsi, yassa kammassidaṃ phalaṃ.
១២៨៧.
1287.
‘‘ទុន្និក្ខិត្តំ មាលំ សុនិក្ខិបិត្វា, បតិដ្ឋបេត្វា សុគតស្ស ថូបេ;
‘‘Dunnikkhittaṃ mālaṃ sunikkhipitvā, patiṭṭhapetvā sugatassa thūpe;
មហិទ្ធិកោ ចម្ហិ មហានុភាវោ, ទិព្ពេហិ កាមេហិ សមង្គិភូតោ។
Mahiddhiko camhi mahānubhāvo, dibbehi kāmehi samaṅgibhūto.
១២៨៨.
1288.
‘‘តេន មេតាទិសោ វណ្ណោ,
‘‘Tena metādiso vaṇṇo,
តេន មេ ឥធ មិជ្ឈតិ;
Tena me idha mijjhati;
ឧប្បជ្ជន្តិ ច មេ ភោគា,
Uppajjanti ca me bhogā,
យេ កេចិ មនសោ បិយា។
Ye keci manaso piyā.
១២៨៩.
1289.
‘‘អក្ខាមិ តេ ភិក្ខុ មហានុភាវ,
‘‘Akkhāmi te bhikkhu mahānubhāva,
មនុស្សភូតោ យមហំ អកាសិំ;
Manussabhūto yamahaṃ akāsiṃ;
តេនម្ហិ ឯវំ ជលិតានុភាវោ,
Tenamhi evaṃ jalitānubhāvo,
វណ្ណោ ច មេ សព្ពទិសា បភាសតី’’តិ។
Vaṇṇo ca me sabbadisā pabhāsatī’’ti.
សុនិក្ខិត្តវិមានំ ឯកាទសមំ។
Sunikkhittavimānaṃ ekādasamaṃ.
សុនិក្ខិត្តវគ្គោ សត្តមោ និដ្ឋិតោ។
Sunikkhittavaggo sattamo niṭṭhito.
តស្សុទ្ទានំ –
Tassuddānaṃ –
ទ្វេ ទលិទ្ទា វនវិហារា, ភតកោ គោបាលកណ្ឌកា;
Dve daliddā vanavihārā, bhatako gopālakaṇḍakā;
អនេកវណ្ណមដ្ឋកុណ្ឌលី, សេរីសកោ សុនិក្ខិត្តំ;
Anekavaṇṇamaṭṭhakuṇḍalī, serīsako sunikkhittaṃ;
បុរិសានំ តតិយោ វគ្គោ បវុច្ចតីតិ។
Purisānaṃ tatiyo vaggo pavuccatīti.
ភាណវារំ ចតុត្ថំ និដ្ឋិតំ។
Bhāṇavāraṃ catutthaṃ niṭṭhitaṃ.
វិមានវត្ថុបាឡិ និដ្ឋិតា។
Vimānavatthupāḷi niṭṭhitā.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / វិមានវត្ថុ-អដ្ឋកថា • Vimānavatthu-aṭṭhakathā / ១១. សុនិក្ខិត្តវិមានវណ្ណនា • 11. Sunikkhittavimānavaṇṇanā
