| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๔. สุทฺธฎฺฐกสุตฺตํ
4. Suddhaṭṭhakasuttaṃ
๗๙๔.
794.
ปสฺสามิ สุทฺธํ ปรมํ อโรคํ, ทิเฎฺฐน สํสุทฺธิ นรสฺส โหติ;
Passāmi suddhaṃ paramaṃ arogaṃ, diṭṭhena saṃsuddhi narassa hoti;
เอวาภิชานํ 1 ปรมนฺติ ญตฺวา, สุทฺธานุปสฺสีติ ปเจฺจติ ญาณํฯ
Evābhijānaṃ 2 paramanti ñatvā, suddhānupassīti pacceti ñāṇaṃ.
๗๙๕.
795.
ทิเฎฺฐน เจ สุทฺธิ นรสฺส โหติ, ญาเณน วา โส ปชหาติ ทุกฺขํ;
Diṭṭhena ce suddhi narassa hoti, ñāṇena vā so pajahāti dukkhaṃ;
อเญฺญน โส สุชฺฌติ โสปธีโก, ทิฎฺฐี หิ นํ ปาว ตถา วทานํฯ
Aññena so sujjhati sopadhīko, diṭṭhī hi naṃ pāva tathā vadānaṃ.
๗๙๖.
796.
น พฺราหฺมโณ อญฺญโต สุทฺธิมาห, ทิเฎฺฐ สุเต สีลวเต มุเต วา;
Na brāhmaṇo aññato suddhimāha, diṭṭhe sute sīlavate mute vā;
ปุเญฺญ จ ปาเป จ อนูปลิโตฺต, อตฺตญฺชโห นยิธ ปกุพฺพมาโนฯ
Puññe ca pāpe ca anūpalitto, attañjaho nayidha pakubbamāno.
๗๙๗.
797.
ปุริมํ ปหาย อปรํ สิตาเส, เอชานุคา เต น ตรนฺติ สงฺคํ;
Purimaṃ pahāya aparaṃ sitāse, ejānugā te na taranti saṅgaṃ;
เต อุคฺคหายนฺติ นิรสฺสชนฺติ, กปีว สาขํ ปมุญฺจํ คหายํ 3ฯ
Te uggahāyanti nirassajanti, kapīva sākhaṃ pamuñcaṃ gahāyaṃ 4.
๗๙๘.
798.
สยํ สมาทาย วตานิ ชนฺตุ, อุจฺจาวจํ คจฺฉติ สญฺญสโตฺต;
Sayaṃ samādāya vatāni jantu, uccāvacaṃ gacchati saññasatto;
วิทฺวา จ เวเทหิ สเมจฺจ ธมฺมํ, น อุจฺจาวจํ คจฺฉติ ภูริปโญฺญฯ
Vidvā ca vedehi samecca dhammaṃ, na uccāvacaṃ gacchati bhūripañño.
๗๙๙.
799.
ส สพฺพธเมฺมสุ วิเสนิภูโต, ยํ กิญฺจิ ทิฎฺฐํ ว สุตํ มุตํ วา;
Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
ตเมว ทสฺสิํ วิวฎํ จรนฺตํ, เกนีธ โลกสฺมิ วิกปฺปเยยฺยฯ
Tameva dassiṃ vivaṭaṃ carantaṃ, kenīdha lokasmi vikappayeyya.
๘๐๐.
800.
น กปฺปยนฺติ น ปุเรกฺขโรนฺติ, อจฺจนฺตสุทฺธีติ น เต วทนฺติ;
Na kappayanti na purekkharonti, accantasuddhīti na te vadanti;
อาทานคนฺถํ คถิตํ วิสชฺช, อาสํ น กุพฺพนฺติ กุหิญฺจิ โลเกฯ
Ādānaganthaṃ gathitaṃ visajja, āsaṃ na kubbanti kuhiñci loke.
๘๐๑.
801.
สีมาติโค พฺราหฺมโณ ตสฺส นตฺถิ, ญตฺวา ว ทิสฺวา ว 5 สมุคฺคหีตํ;
Sīmātigo brāhmaṇo tassa natthi, ñatvā va disvā va 6 samuggahītaṃ;
น ราคราคี น วิราครโตฺต, ตสฺสีธ นตฺถี ปรมุคฺคหีตนฺติฯ
Na rāgarāgī na virāgaratto, tassīdha natthī paramuggahītanti.
สุทฺธฎฺฐกสุตฺตํ จตุตฺถํ นิฎฺฐิตํฯ
Suddhaṭṭhakasuttaṃ catutthaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๔. สุทฺธฎฺฐกสุตฺตวณฺณนา • 4. Suddhaṭṭhakasuttavaṇṇanā
