| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೫. ಸೀಹವಗ್ಗೋ
5. Sīhavaggo
೧. ಸೀಹಙ್ಗಪಞ್ಹೋ
1. Sīhaṅgapañho
೧. ‘‘ಭನ್ತೇ ನಾಗಸೇನ, ‘ಸೀಹಸ್ಸ ಸತ್ತ ಅಙ್ಗಾನಿ ಗಹೇತಬ್ಬಾನೀ’ತಿ ಯಂ ವದೇಸಿ, ಕತಮಾನಿ ತಾನಿ ಸತ್ತ ಅಙ್ಗಾನಿ ಗಹೇತಬ್ಬಾನೀ’’ತಿ? ‘‘ಯಥಾ, ಮಹಾರಾಜ, ಸೀಹೋ ನಾಮ ಸೇತವಿಮಲಪರಿಸುದ್ಧಪಣ್ಡರೋ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸೇತವಿಮಲಪರಿಸುದ್ಧಪಣ್ಡರಚಿತ್ತೇನ ಬ್ಯಪಗತಕುಕ್ಕುಚ್ಚೇನ ಭವಿತಬ್ಬಂ। ಇದಂ, ಮಹಾರಾಜ, ಸೀಹಸ್ಸ ಪಠಮಂ ಅಙ್ಗಂ ಗಹೇತಬ್ಬಂ।
1. ‘‘Bhante nāgasena, ‘sīhassa satta aṅgāni gahetabbānī’ti yaṃ vadesi, katamāni tāni satta aṅgāni gahetabbānī’’ti? ‘‘Yathā, mahārāja, sīho nāma setavimalaparisuddhapaṇḍaro, evameva kho, mahārāja, yoginā yogāvacarena setavimalaparisuddhapaṇḍaracittena byapagatakukkuccena bhavitabbaṃ. Idaṃ, mahārāja, sīhassa paṭhamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೀಹೋ ಚತುಚರಣೋ ವಿಕ್ಕನ್ತಚಾರೀ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಚತುರಿದ್ಧಿಪಾದಚರಣೇನ ಭವಿತಬ್ಬಂ। ಇದಂ, ಮಹಾರಾಜ, ಸೀಹಸ್ಸ ದುತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sīho catucaraṇo vikkantacārī, evameva kho, mahārāja, yoginā yogāvacarena caturiddhipādacaraṇena bhavitabbaṃ. Idaṃ, mahārāja, sīhassa dutiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೀಹೋ ಅಭಿರೂಪರುಚಿರಕೇಸರೀ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಅಭಿರೂಪರುಚಿರಸೀಲಕೇಸರಿನಾ ಭವಿತಬ್ಬಂ। ಇದಂ, ಮಹಾರಾಜ, ಸೀಹಸ್ಸ ತತಿಯಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sīho abhirūparucirakesarī, evameva kho, mahārāja, yoginā yogāvacarena abhirūparucirasīlakesarinā bhavitabbaṃ. Idaṃ, mahārāja, sīhassa tatiyaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೀಹೋ ಜೀವಿತಪರಿಯಾದಾನೇಪಿ ನ ಕಸ್ಸಚಿ ಓನಮತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಚೀವರಪಿಣ್ಡಪಾತಸೇನಾಸನಗಿಲಾನಪಚ್ಚಯಭೇಸಜ್ಜಪರಿಕ್ಖಾರಪರಿಯಾದಾನೇಪಿ ನ ಕಸ್ಸಚಿ ಓನಮಿತಬ್ಬಂ। ಇದಂ, ಮಹಾರಾಜ, ಸೀಹಸ್ಸ ಚತುತ್ಥಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sīho jīvitapariyādānepi na kassaci onamati, evameva kho, mahārāja, yoginā yogāvacarena cīvarapiṇḍapātasenāsanagilānapaccayabhesajjaparikkhārapariyādānepi na kassaci onamitabbaṃ. Idaṃ, mahārāja, sīhassa catutthaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೀಹೋ ಸಪದಾನಭಕ್ಖೋ ಯಸ್ಮಿಂ ಓಕಾಸೇ ನಿಪತತಿ, ತತ್ಥೇವ ಯಾವದತ್ಥಂ ಭಕ್ಖಯತಿ, ನ ವರಮಂಸಂ ವಿಚಿನಾತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಸಪದಾನಭಕ್ಖೇನ ಭವಿತಬ್ಬಂ, ನ ಕುಲಾನಿ ವಿಚಿನಿತಬ್ಬಾನಿ, ನ ಪುಬ್ಬಗೇಹಂ ಹಿತ್ವಾ ಕುಲಾನಿ ಉಪಸಙ್ಕಮಿತಬ್ಬಾನಿ, ನ ಭೋಜನಂ ವಿಚಿನಿತಬ್ಬಂ, ಯಸ್ಮಿಂ ಓಕಾಸೇ ಕಬಳಂ ಆದೀಯತಿ, ತಸ್ಮಿಂ ಯೇವ ಓಕಾಸೇ ಭುಞ್ಜಿತಬ್ಬಂ ಸರೀರಯಾಪನತ್ಥಂ 1, ನ ವರಭೋಜನಂ ವಿಚಿನಿತಬ್ಬಂ। ಇದಂ, ಮಹಾರಾಜ, ಸೀಹಸ್ಸ ಪಞ್ಚಮಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sīho sapadānabhakkho yasmiṃ okāse nipatati, tattheva yāvadatthaṃ bhakkhayati, na varamaṃsaṃ vicināti, evameva kho, mahārāja, yoginā yogāvacarena sapadānabhakkhena bhavitabbaṃ, na kulāni vicinitabbāni, na pubbagehaṃ hitvā kulāni upasaṅkamitabbāni, na bhojanaṃ vicinitabbaṃ, yasmiṃ okāse kabaḷaṃ ādīyati, tasmiṃ yeva okāse bhuñjitabbaṃ sarīrayāpanatthaṃ 2, na varabhojanaṃ vicinitabbaṃ. Idaṃ, mahārāja, sīhassa pañcamaṃ aṅgaṃ gahetabbaṃ.
‘‘ಪುನ ಚಪರಂ, ಮಹಾರಾಜ, ಸೀಹೋ ಅಸನ್ನಿಧಿಭಕ್ಖೋ, ಸಕಿಂ ಗೋಚರಂ ಭಕ್ಖಯಿತ್ವಾ ನ ಪುನ ತಂ ಉಪಗಚ್ಛತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಅಸನ್ನಿಧಿಕಾರಪರಿಭೋಗಿನಾ ಭವಿತಬ್ಬಂ। ಇದಂ, ಮಹಾರಾಜ, ಸೀಹಸ್ಸ ಛಟ್ಠಂ ಅಙ್ಗಂ ಗಹೇತಬ್ಬಂ।
‘‘Puna caparaṃ, mahārāja, sīho asannidhibhakkho, sakiṃ gocaraṃ bhakkhayitvā na puna taṃ upagacchati, evameva kho, mahārāja, yoginā yogāvacarena asannidhikāraparibhoginā bhavitabbaṃ. Idaṃ, mahārāja, sīhassa chaṭṭhaṃ aṅgaṃ gahetabbaṃ.
‘‘ಪುನ ಚಪರಂ , ಮಹಾರಾಜ, ಸೀಹೋ ಭೋಜನಂ ಅಲದ್ಧಾ ನ ಪರಿತಸ್ಸತಿ, ಲದ್ಧಾಪಿ ಭೋಜನಂ ಅಗಧಿತೋ 3 ಅಮುಚ್ಛಿತೋ ಅನಜ್ಝೋಸನ್ನೋ ಪರಿಭುಞ್ಜತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಭೋಜನಂ ಅಲದ್ಧಾ ನ ಪರಿತಸ್ಸಿತಬ್ಬಂ, ಲದ್ಧಾಪಿ ಭೋಜನಂ ಅಗಧಿತೇನ ಅಮುಚ್ಛಿತೇನ ಅನಜ್ಝೋಸನ್ನೇನ ಆದೀನವದಸ್ಸಾವಿನಾ ನಿಸ್ಸರಣಪಞ್ಞೇನ ಪರಿಭುಞ್ಜಿತಬ್ಬಂ। ಇದಂ, ಮಹಾರಾಜ, ಸೀಹಸ್ಸ ಸತ್ತಮಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ ಸಂಯುತ್ತನಿಕಾಯವರೇ ಥೇರಂ ಮಹಾಕಸ್ಸಪಂ ಪರಿಕಿತ್ತಯಮಾನೇನ –
‘‘Puna caparaṃ , mahārāja, sīho bhojanaṃ aladdhā na paritassati, laddhāpi bhojanaṃ agadhito 4 amucchito anajjhosanno paribhuñjati, evameva kho, mahārāja, yoginā yogāvacarena bhojanaṃ aladdhā na paritassitabbaṃ, laddhāpi bhojanaṃ agadhitena amucchitena anajjhosannena ādīnavadassāvinā nissaraṇapaññena paribhuñjitabbaṃ. Idaṃ, mahārāja, sīhassa sattamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare theraṃ mahākassapaṃ parikittayamānena –
‘ಸನ್ತುಟ್ಠೋಯಂ, ಭಿಕ್ಖವೇ, ಕಸ್ಸಪೋ ಇತರೀತರೇನ ಪಿಣ್ಡಪಾತೇನ, ಇತರೀತರಪಿಣ್ಡಪಾತಸನ್ತುಟ್ಠಿಯಾ ಚ ವಣ್ಣವಾದೀ, ನ ಚ ಪಿಣ್ಡಪಾತಹೇತು ಅನೇಸನಂ ಅಪ್ಪತಿರೂಪಂ ಆಪಜ್ಜತಿ, ಅಲದ್ಧಾ ಚ ಪಿಣ್ಡಪಾತಂ ನ ಪರಿತಸ್ಸತಿ, ಲದ್ಧಾ ಚ ಪಿಣ್ಡಪಾತಂ ಅಗಧಿತೋ ಅಮುಚ್ಛಿತೋ ಅನಜ್ಝೋಸನ್ನೋ ಆದೀನವದಸ್ಸಾವೀ ನಿಸ್ಸರಣಪಞ್ಞೋ ಪರಿಭುಞ್ಜತೀ’’’ತಿ।
‘Santuṭṭhoyaṃ, bhikkhave, kassapo itarītarena piṇḍapātena, itarītarapiṇḍapātasantuṭṭhiyā ca vaṇṇavādī, na ca piṇḍapātahetu anesanaṃ appatirūpaṃ āpajjati, aladdhā ca piṇḍapātaṃ na paritassati, laddhā ca piṇḍapātaṃ agadhito amucchito anajjhosanno ādīnavadassāvī nissaraṇapañño paribhuñjatī’’’ti.
ಸೀಹಙ್ಗಪಞ್ಹೋ ಪಠಮೋ।
Sīhaṅgapañho paṭhamo.
Footnotes:
