| Library / Tipiṭaka / ติปิฎก • Tipiṭaka / วินยวินิจฺฉย-อุตฺตรวินิจฺฉย • Vinayavinicchaya-uttaravinicchaya |
เสทโมจนกถา
Sedamocanakathā
ก.
Ka.
โสฬสปริวารสฺส , ปริวารสฺส สาทรา;
Soḷasaparivārassa , parivārassa sādarā;
สุณาถ นิปุเณ ปเญฺห, คูฬฺหเตฺถ ภณโต มมฯ
Suṇātha nipuṇe pañhe, gūḷhatthe bhaṇato mama.
ข.
Kha.
ทิวาปชฺชติ โน รตฺติํ, รตฺติํเยว จ โน ทิวา;
Divāpajjati no rattiṃ, rattiṃyeva ca no divā;
กถญฺจ ปฎิคฺคณฺหโนฺต, น คณฺหโนฺต กถํ ปนฯ
Kathañca paṭiggaṇhanto, na gaṇhanto kathaṃ pana.
ค.
Ga.
ฉินฺทนฺตสฺส สิยาปตฺติ, ตเถวาฉินฺทโตปิ จ;
Chindantassa siyāpatti, tathevāchindatopi ca;
ฉาเทนฺตสฺส ตถาปตฺติ-น ฉาเทนฺตสฺส ภิกฺขุโนฯ
Chādentassa tathāpatti-na chādentassa bhikkhuno.
ฆ.
Gha.
กา จาปตฺติ สมาปตฺติ-ลาภิโนเยว ภิกฺขุโน;
Kā cāpatti samāpatti-lābhinoyeva bhikkhuno;
อสมาปตฺติลาภิสฺส, กา จ นามสฺส สา ภเวฯ
Asamāpattilābhissa, kā ca nāmassa sā bhave.
ง.
Ṅa.
ครุกํ ภณโต สจฺจํ, อลิกํ ภณโต สิยุํ;
Garukaṃ bhaṇato saccaṃ, alikaṃ bhaṇato siyuṃ;
ลหุํ สจฺจํ ภณนฺตสฺส, มุสา จ ภณโต ครุํฯ
Lahuṃ saccaṃ bhaṇantassa, musā ca bhaṇato garuṃ.
จ.
Ca.
ปวิสโนฺต จ อารามํ, อาปชฺชติ น นิกฺขมํ;
Pavisanto ca ārāmaṃ, āpajjati na nikkhamaṃ;
นิกฺขมโนฺตว อาปตฺติ, น เจว ปวิสํ ปน;
Nikkhamantova āpatti, na ceva pavisaṃ pana;
ฉ.
Cha.
สมาทิยโนฺต อสมาทิยโนฺต;
Samādiyanto asamādiyanto;
อนาทิยโนฺตปิ จ อาทิยโนฺต;
Anādiyantopi ca ādiyanto;
เทโนฺต อเทโนฺตปิ สิยา สโทโส;
Dento adentopi siyā sadoso;
ตถา กโรโนฺตปิ จ โน กโรโนฺตฯ
Tathā karontopi ca no karonto.
ช.
Ja.
อาปชฺชติ จ ธาเรโนฺต, อธาเรโนฺต ตเถว จ;
Āpajjati ca dhārento, adhārento tatheva ca;
ทฺวินฺนํ มาตา ปิตา สาว, กถํ โหติ? ภณาหิ เมฯ
Dvinnaṃ mātā pitā sāva, kathaṃ hoti? Bhaṇāhi me.
ฌ.
Jha.
อุภโตพฺยญฺชนา อิตฺถี, คพฺภํ คณฺหาติ อตฺตนา;
Ubhatobyañjanā itthī, gabbhaṃ gaṇhāti attanā;
คณฺหาเปติ ปรํ คพฺภํ, ตสฺมา มาตาปิตา จ สาฯ
Gaṇhāpeti paraṃ gabbhaṃ, tasmā mātāpitā ca sā.
ญ.
Ña.
คาเม วา ยทิ วารเญฺญ, ยํ ปเรสํ มมายิตํ;
Gāme vā yadi vāraññe, yaṃ paresaṃ mamāyitaṃ;
น หรโนฺตว ตํ เถยฺยา, กถํ ปาราชิโก ภเว;
Na harantova taṃ theyyā, kathaṃ pārājiko bhave;
ฎ.
Ṭa.
เถยฺยสํวาสโก เอโส, ลิงฺคสํวาสเถนโก;
Theyyasaṃvāsako eso, liṅgasaṃvāsathenako;
ปรภณฺฑํ อคณฺหโนฺต, เตน โหติ ปราชิโตฯ
Parabhaṇḍaṃ agaṇhanto, tena hoti parājito.
ฐ.
Ṭha.
นาริํ รูปวติํ ภิกฺขุ, รตฺตจิโตฺต อสญฺญโต;
Nāriṃ rūpavatiṃ bhikkhu, rattacitto asaññato;
เมถุนํ ตาย กตฺวาปิ, น โส ปาราชิโก กถํ;
Methunaṃ tāya katvāpi, na so pārājiko kathaṃ;
ฑ.
Ḍa.
อจฺฉราสทิสํ นาริํ, สุปินเนฺตน ปสฺสติ;
Accharāsadisaṃ nāriṃ, supinantena passati;
ตาย เมถุนสํโยเค, กเตปิ น ภวิสฺสติฯ
Tāya methunasaṃyoge, katepi na bhavissati.
ฒ.
Ḍha.
พหิทฺธา เคหโต ภิกฺขุ, อิตฺถี คพฺภนฺตรํ คตา;
Bahiddhā gehato bhikkhu, itthī gabbhantaraṃ gatā;
ฉิทฺทํ เคหสฺส เนวตฺถิ, กถํ เมถุนโต จุโต;
Chiddaṃ gehassa nevatthi, kathaṃ methunato cuto;
ณ.
Ṇa.
อโนฺตทุสฺสกุฎิเฎฺฐน, มาตุคาเมน เมถุนํ;
Antodussakuṭiṭṭhena, mātugāmena methunaṃ;
สนฺถตาทิวเสเนว, กตฺวา โหติ ปราชิโตฯ
Santhatādivaseneva, katvā hoti parājito.
ต.
Ta.
สุเตฺต จ วินเยเยว, ขนฺธเก สานุโลมิเก;
Sutte ca vinayeyeva, khandhake sānulomike;
สพฺพตฺถ นิปุณา ธีรา, อิเม ปเญฺห ภณนฺติ เตฯ
Sabbattha nipuṇā dhīrā, ime pañhe bhaṇanti te.
ถ.
Tha.
ขนฺธเก ปริวาเร จ, วินเย สานุโลมิเก;
Khandhake parivāre ca, vinaye sānulomike;
อาทโร กรณีโยว, ปฎุภาวํ ปนิจฺฉิตาฯ
Ādaro karaṇīyova, paṭubhāvaṃ panicchitā.
เสทโมจนกถาฯ
Sedamocanakathā.
