| Library / Tipiṭaka / តិបិដក • Tipiṭaka / បេតវត្ថុបាឡិ • Petavatthupāḷi |
១៦. សដ្ឋិកូដបេតវត្ថុ
16. Saṭṭhikūṭapetavatthu
៨០៦.
806.
‘‘កិំ នុ ឧម្មត្តរូបោវ, មិគោ ភន្តោវ ធាវសិ;
‘‘Kiṃ nu ummattarūpova, migo bhantova dhāvasi;
និស្សំសយំ បាបកម្មន្តោ 1, កិំ នុ សទ្ទាយសេ តុវ’’ន្តិ។
Nissaṃsayaṃ pāpakammanto 2, kiṃ nu saddāyase tuva’’nti.
៨០៧.
807.
‘‘អហំ ភទន្តេ បេតោម្ហិ, ទុគ្គតោ យមលោកិកោ;
‘‘Ahaṃ bhadante petomhi, duggato yamalokiko;
បាបកម្មំ ករិត្វាន, បេតលោកំ ឥតោ គតោ។
Pāpakammaṃ karitvāna, petalokaṃ ito gato.
៨០៨.
808.
‘‘សដ្ឋិ កូដសហស្សានិ, បរិបុណ្ណានិ សព្ពសោ;
‘‘Saṭṭhi kūṭasahassāni, paripuṇṇāni sabbaso;
សីសេ មយ្ហំ និបតន្តិ, តេ ភិន្ទន្តិ ច មត្ថក’’ន្តិ។
Sīse mayhaṃ nipatanti, te bhindanti ca matthaka’’nti.
៨០៩.
809.
‘‘កិំ នុ កាយេន វាចាយ, មនសា ទុក្កដំ កតំ;
‘‘Kiṃ nu kāyena vācāya, manasā dukkaṭaṃ kataṃ;
កិស្ស កម្មវិបាកេន, ឥទំ ទុក្ខំ និគច្ឆសិ។
Kissa kammavipākena, idaṃ dukkhaṃ nigacchasi.
៨១០.
810.
‘‘សដ្ឋិ កូដសហស្សានិ, បរិបុណ្ណានិ សព្ពសោ;
‘‘Saṭṭhi kūṭasahassāni, paripuṇṇāni sabbaso;
សីសេ តុយ្ហំ និបតន្តិ, តេ ភិន្ទន្តិ ច មត្ថក’’ន្តិ។
Sīse tuyhaṃ nipatanti, te bhindanti ca matthaka’’nti.
៨១១.
811.
‘‘អថទ្ទសាសិំ សម្ពុទ្ធំ, សុនេត្តំ ភាវិតិន្ទ្រិយំ;
‘‘Athaddasāsiṃ sambuddhaṃ, sunettaṃ bhāvitindriyaṃ;
និសិន្នំ រុក្ខមូលស្មិំ, ឈាយន្តំ អកុតោភយំ។
Nisinnaṃ rukkhamūlasmiṃ, jhāyantaṃ akutobhayaṃ.
៨១២.
812.
‘‘សាលិត្តកប្បហារេន, ភិន្ទិស្សំ តស្ស មត្ថកំ;
‘‘Sālittakappahārena, bhindissaṃ tassa matthakaṃ;
តស្ស កម្មវិបាកេន, ឥទំ ទុក្ខំ និគច្ឆិសំ។
Tassa kammavipākena, idaṃ dukkhaṃ nigacchisaṃ.
៨១៣.
813.
‘‘សដ្ឋិ កូដសហស្សានិ, បរិបុណ្ណានិ សព្ពសោ;
‘‘Saṭṭhi kūṭasahassāni, paripuṇṇāni sabbaso;
សីសេ មយ្ហំ និបតន្តិ, តេ ភិន្ទន្តិ ច 3 មត្ថក’’ន្តិ។
Sīse mayhaṃ nipatanti, te bhindanti ca 4 matthaka’’nti.
៨១៤.
814.
‘‘ធម្មេន តេ កាបុរិស, សដ្ឋិកូដសហស្សានិ, បរិបុណ្ណានិ សព្ពសោ;
‘‘Dhammena te kāpurisa, saṭṭhikūṭasahassāni, paripuṇṇāni sabbaso;
សីសេ តុយ្ហំ និបតន្តិ, តេ ភិន្ទន្តិ ច មត្ថក’’ន្តិ។
Sīse tuyhaṃ nipatanti, te bhindanti ca matthaka’’nti.
សដ្ឋិកូដបេតវត្ថុ សោឡសមំ។
Saṭṭhikūṭapetavatthu soḷasamaṃ.
មហាវគ្គោ ចតុត្ថោ និដ្ឋិតោ។
Mahāvaggo catuttho niṭṭhito.
តស្សុទ្ទានំ –
Tassuddānaṃ –
អម្ពសក្ករោ សេរីសកោ, បិង្គលោ រេវតិ ឧច្ឆុ;
Ambasakkaro serīsako, piṅgalo revati ucchu;
ទ្វេ កុមារា ទុវេ គូថា, គណបាដលិអម្ពវនំ។
Dve kumārā duve gūthā, gaṇapāṭaliambavanaṃ.
អក្ខរុក្ខភោគសំហរា, សេដ្ឋិបុត្តសដ្ឋិកូដា;
Akkharukkhabhogasaṃharā, seṭṭhiputtasaṭṭhikūṭā;
ឥតិ សោឡសវត្ថូនិ, វគ្គោ តេន បវុច្ចតិ។
Iti soḷasavatthūni, vaggo tena pavuccati.
អថ វគ្គុទ្ទានំ –
Atha vagguddānaṃ –
ឧរគោ ឧបរិវគ្គោ, ចូឡមហាតិ ចតុធា;
Urago uparivaggo, cūḷamahāti catudhā;
វត្ថូនិ ឯកបញ្ញាសំ, ចតុធា ភាណវារតោ។
Vatthūni ekapaññāsaṃ, catudhā bhāṇavārato.
បេតវត្ថុបាឡិ និដ្ឋិតា។
Petavatthupāḷi niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បេតវត្ថុ-អដ្ឋកថា • Petavatthu-aṭṭhakathā / ១៦. សដ្ឋិកូដបេតវត្ថុវណ្ណនា • 16. Saṭṭhikūṭapetavatthuvaṇṇanā
