| Library / Tipiṭaka / तिपिटक • Tipiṭaka / पेतवत्थुपाळि • Petavatthupāḷi |
७. सत्तपुत्तखादपेतिवत्थु
7. Sattaputtakhādapetivatthu
३५.
35.
‘‘नग्गा दुब्बण्णरूपासि, दुग्गन्धा पूति वायसि।
‘‘Naggā dubbaṇṇarūpāsi, duggandhā pūti vāyasi;
मक्खिकाहि परिकिण्णा, का नु त्वं इध तिट्ठसी’’ति॥
Makkhikāhi parikiṇṇā, kā nu tvaṃ idha tiṭṭhasī’’ti.
३६.
36.
‘‘अहं भदन्ते पेतीम्हि, दुग्गता यमलोकिका।
‘‘Ahaṃ bhadante petīmhi, duggatā yamalokikā;
पापकम्मं करित्वान, पेतलोकं इतो गता॥
Pāpakammaṃ karitvāna, petalokaṃ ito gatā.
३७.
37.
‘‘कालेन सत्त पुत्तानि, सायं सत्त पुनापरे।
‘‘Kālena satta puttāni, sāyaṃ satta punāpare;
विजायित्वान खादामि, तेपि ना होन्ति मे अलं॥
Vijāyitvāna khādāmi, tepi nā honti me alaṃ.
३८.
38.
‘‘परिडय्हति धूमायति, खुदाय हदयं मम।
‘‘Pariḍayhati dhūmāyati, khudāya hadayaṃ mama;
निब्बुतिं नाधिगच्छामि, अग्गिदड्ढाव आतपे’’ति॥
Nibbutiṃ nādhigacchāmi, aggidaḍḍhāva ātape’’ti.
३९.
39.
‘‘किं नु कायेन वाचाय, मनसा दुक्कटं कतं।
‘‘Kiṃ nu kāyena vācāya, manasā dukkaṭaṃ kataṃ;
किस्स कम्मविपाकेन, पुत्तमंसानि खादसी’’ति॥
Kissa kammavipākena, puttamaṃsāni khādasī’’ti.
४०.
40.
‘‘अहू मय्हं दुवे पुत्ता, उभो सम्पत्तयोब्बना।
‘‘Ahū mayhaṃ duve puttā, ubho sampattayobbanā;
साहं पुत्तबलूपेता, सामिकं अतिमञ्ञिसं॥
Sāhaṃ puttabalūpetā, sāmikaṃ atimaññisaṃ.
४१.
41.
‘‘ततो मे सामिको कुद्धो, सपत्तिं मय्हमानयि।
‘‘Tato me sāmiko kuddho, sapattiṃ mayhamānayi;
सा च गब्भं अलभित्थ, तस्सा पापं अचेतयिं॥
Sā ca gabbhaṃ alabhittha, tassā pāpaṃ acetayiṃ.
४२.
42.
‘‘साहं पदुट्ठमनसा, अकरिं गब्भपातनं।
‘‘Sāhaṃ paduṭṭhamanasā, akariṃ gabbhapātanaṃ;
४३.
43.
‘‘तदस्सा माता कुपिता, मय्हं ञाती समानयि।
‘‘Tadassā mātā kupitā, mayhaṃ ñātī samānayi;
सपथञ्च मं कारेसि, परिभासापयी च मं॥
Sapathañca maṃ kāresi, paribhāsāpayī ca maṃ.
४४.
44.
‘‘साहं घोरञ्च सपथं, मुसावादं अभासिसं।
‘‘Sāhaṃ ghorañca sapathaṃ, musāvādaṃ abhāsisaṃ;
‘पुत्तमंसानि खादामि, सचे तं पकतं मया’॥
‘Puttamaṃsāni khādāmi, sace taṃ pakataṃ mayā’.
४५.
45.
‘‘तस्स कम्मस्स विपाकेन, मुसावादस्स चूभयं।
‘‘Tassa kammassa vipākena, musāvādassa cūbhayaṃ;
पुत्तमंसानि खादामि, पुब्बलोहितमक्खिता’’ति॥
Puttamaṃsāni khādāmi, pubbalohitamakkhitā’’ti.
सत्तपुत्तखादपेतिवत्थु सत्तमं।
Sattaputtakhādapetivatthu sattamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पेतवत्थु-अट्ठकथा • Petavatthu-aṭṭhakathā / ७. सत्तपुत्तखादकपेतिवत्थुवण्णना • 7. Sattaputtakhādakapetivatthuvaṇṇanā
