| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៦. សបរិវារាសនត្ថេរអបទានវណ្ណនា
6. Saparivārāsanattheraapadānavaṇṇanā
បទុមុត្តរពុទ្ធស្សាតិអាទិកំ អាយស្មតោ សបរិវារាសនត្ថេរស្ស អបទានំ។ សោបិ បុរិមពុទ្ធេសុ កតាធិការោ តត្ថ តត្ថ ភវេសុ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ វិភវសម្បន្នេ កុលគេហេ និព្ពត្តោ វុទ្ធិប្បត្តោ សទ្ធាជាតោ សាសនេ បសន្នោ ទានផលំ សទ្ទហន្តោ នានគ្គរសភោជនេន ភគវតោ បិណ្ឌបាតំ អទាសិ, ទត្វា ច បន ភោជនសាលាយំ ភោជនត្ថាយ និសិន្នាសនំ ជាតិសុមនមល្លិកាទីហិ អលង្ករិ។ ភគវា ច ភត្តានុមោទនមកាសិ។ សោ តេន បុញ្ញកម្មេន ទេវមនុស្សេសុ សំសរន្តោ អនេកវិធំ សម្បត្តិំ អនុភវិត្វា ឥមស្មិំ ពុទ្ធុប្បាទេ វិភវសម្បន្នេ កុលគេហេ និព្ពត្តោ វុទ្ធិមន្វាយ សទ្ធោ បសន្នោ បព្ពជិត្វា ន ចិរស្សេវ អរហា អហោសិ។
Padumuttarabuddhassātiādikaṃ āyasmato saparivārāsanattherassa apadānaṃ. Sopi purimabuddhesu katādhikāro tattha tattha bhavesu vivaṭṭūpanissayāni puññāni upacinanto padumuttarassa bhagavato kāle vibhavasampanne kulagehe nibbatto vuddhippatto saddhājāto sāsane pasanno dānaphalaṃ saddahanto nānaggarasabhojanena bhagavato piṇḍapātaṃ adāsi, datvā ca pana bhojanasālāyaṃ bhojanatthāya nisinnāsanaṃ jātisumanamallikādīhi alaṅkari. Bhagavā ca bhattānumodanamakāsi. So tena puññakammena devamanussesu saṃsaranto anekavidhaṃ sampattiṃ anubhavitvā imasmiṃ buddhuppāde vibhavasampanne kulagehe nibbatto vuddhimanvāya saddho pasanno pabbajitvā na cirasseva arahā ahosi.
៤៣. សោ ឯវំ បត្តសន្តិបទោ ‘‘កេន នុ ខោ បុញ្ញេន ឥទំ សន្តិបទំ អនុប្បត្ត’’ន្តិ ញាណេន ឧបធារេន្តោ បុព្ពកម្មំ ទិស្វា សោមនស្សជាតោ បុព្ពចរិតាបទានំ បកាសេន្តោ បទុមុត្តរពុទ្ធស្សាតិអាទិមាហ។ តំ វុត្តត្ថមេវ។ បិណ្ឌបាតំ អទាសហន្តិ តត្ថ តត្ថ លទ្ធានំ បិណ្ឌានំ កពឡំ កពឡំ កត្វា បាតព្ពតោ ខាទិតព្ពតោ អាហារោ បិណ្ឌបាតោ, តំ បិណ្ឌបាតំ ភគវតោ អទាសិំ, ភគវន្តំ ភោជេសិន្តិ អត្ថោ។
43. So evaṃ pattasantipado ‘‘kena nu kho puññena idaṃ santipadaṃ anuppatta’’nti ñāṇena upadhārento pubbakammaṃ disvā somanassajāto pubbacaritāpadānaṃ pakāsento padumuttarabuddhassātiādimāha. Taṃ vuttatthameva. Piṇḍapātaṃ adāsahanti tattha tattha laddhānaṃ piṇḍānaṃ kabaḷaṃ kabaḷaṃ katvā pātabbato khāditabbato āhāro piṇḍapāto, taṃ piṇḍapātaṃ bhagavato adāsiṃ, bhagavantaṃ bhojesinti attho.
៤៤. អកិត្តយិ បិណ្ឌបាតន្តិ មយា ទិន្នបិណ្ឌបាតស្ស គុណំ អានិសំសំ បកាសេសីតិ អត្ថោ។
44.Akittayipiṇḍapātanti mayā dinnapiṇḍapātassa guṇaṃ ānisaṃsaṃ pakāsesīti attho.
៤៨. សំវុតោ បាតិមោក្ខស្មិន្តិ បាតិមោក្ខសំវរសីលេន សំវុតោ បិហិតោ បដិច្ឆន្នោតិ អត្ថោ។ ឥន្ទ្រិយេសុ ច បញ្ចសូតិ ចក្ខុន្ទ្រិយាទីសុ បញ្ចសុ ឥន្ទ្រិយេសុ រូបាទីហិ គោបិតោ ឥន្ទ្រិយសំវរសីលញ្ច គោបិតោតិ អត្ថោ។ សេសំ សុវិញ្ញេយ្យមេវាតិ។
48.Saṃvuto pātimokkhasminti pātimokkhasaṃvarasīlena saṃvuto pihito paṭicchannoti attho. Indriyesu ca pañcasūti cakkhundriyādīsu pañcasu indriyesu rūpādīhi gopito indriyasaṃvarasīlañca gopitoti attho. Sesaṃ suviññeyyamevāti.
សបរិវារាសនត្ថេរអបទានវណ្ណនា សមត្តា។
Saparivārāsanattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៦. សបរិវារាសនត្ថេរអបទានំ • 6. Saparivārāsanattheraapadānaṃ
