| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๘. สหธมฺมิกวโคฺค
8. Sahadhammikavaggo
๑๗๒. ภิกฺขูหิ สหธมฺมิกํ วุจฺจมาโน – ‘‘น ตาวาหํ, อาวุโส, เอตสฺมิํ สิกฺขาปเท สิกฺขิสฺสามิ ยาว น อญฺญํ ภิกฺขุํ พฺยตฺตํ วินยธรํ ปริปุจฺฉิสฺสามี’’ติ ภณโนฺต เทฺว อาปตฺติโย อาปชฺชติฯ ภณติ, ปโยเค ทุกฺกฎํ; ภณิเต อาปตฺติ ปาจิตฺติยสฺสฯ
172. Bhikkhūhi sahadhammikaṃ vuccamāno – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchissāmī’’ti bhaṇanto dve āpattiyo āpajjati. Bhaṇati, payoge dukkaṭaṃ; bhaṇite āpatti pācittiyassa.
วินยํ วิวเณฺณโนฺต เทฺว อาปตฺติโย อาปชฺชติฯ วิวเณฺณติ, ปโยเค ทุกฺกฎํ; วิวณฺณิเต อาปตฺติ ปาจิตฺติยสฺสฯ
Vinayaṃ vivaṇṇento dve āpattiyo āpajjati. Vivaṇṇeti, payoge dukkaṭaṃ; vivaṇṇite āpatti pācittiyassa.
โมเหโนฺต เทฺว อาปตฺติโย อาปชฺชติฯ อนาโรปิเต โมเห โมเหติ, อาปตฺติ ทุกฺกฎสฺส; อาโรปิเต โมเห โมเหติ, อาปตฺติ ปาจิตฺติยสฺสฯ
Mohento dve āpattiyo āpajjati. Anāropite mohe moheti, āpatti dukkaṭassa; āropite mohe moheti, āpatti pācittiyassa.
ภิกฺขุสฺส กุปิโต อนตฺตมโน ปหารํ เทโนฺต เทฺว อาปตฺติโย อาปชฺชติฯ ปหรติ, ปโยเค ทุกฺกฎํ; ปหเต อาปตฺติ ปาจิตฺติยสฺส ฯ
Bhikkhussa kupito anattamano pahāraṃ dento dve āpattiyo āpajjati. Paharati, payoge dukkaṭaṃ; pahate āpatti pācittiyassa .
ภิกฺขุสฺส กุปิโต อนตฺตมโน ตลสตฺติกํ อุคฺคิรโนฺต เทฺว อาปตฺติโย อาปชฺชติฯ อุคฺคิรติ, ปโยเค ทุกฺกฎํ; อุคฺคิริเต อาปตฺติ ปาจิตฺติยสฺสฯ
Bhikkhussa kupito anattamano talasattikaṃ uggiranto dve āpattiyo āpajjati. Uggirati, payoge dukkaṭaṃ; uggirite āpatti pācittiyassa.
ภิกฺขุํ อมูลเกน สงฺฆาทิเสเสน อนุทฺธํเสโนฺต เทฺว อาปตฺติโย อาปชฺชติฯ อนุทฺธํเสติ, ปโยเค ทุกฺกฎํ; อนุทฺธํสิเต อาปตฺติ ปาจิตฺติยสฺสฯ
Bhikkhuṃ amūlakena saṅghādisesena anuddhaṃsento dve āpattiyo āpajjati. Anuddhaṃseti, payoge dukkaṭaṃ; anuddhaṃsite āpatti pācittiyassa.
ภิกฺขุสฺส สญฺจิจฺจ กุกฺกุจฺจํ อุปทหโนฺต เทฺว อาปตฺติโย อาปชฺชติฯ อุปทหติ, ปโยเค ทุกฺกฎํ; อุปทหิเต อาปตฺติ ปาจิตฺติยสฺสฯ
Bhikkhussa sañcicca kukkuccaṃ upadahanto dve āpattiyo āpajjati. Upadahati, payoge dukkaṭaṃ; upadahite āpatti pācittiyassa.
ภิกฺขูนํ ภณฺฑนชาตานํ กลหชาตานํ วิวาทาปนฺนานํ อุปสฺสุติํ ติฎฺฐโนฺต เทฺว อาปตฺติโย อาปชฺชติฯ ‘‘โสสฺสามี’’ติ คจฺฉติ, อาปตฺติ ทุกฺกฎสฺส; ยตฺถ ฐิโต สุณาติ, อาปตฺติ ปาจิตฺติยสฺสฯ
Bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭhanto dve āpattiyo āpajjati. ‘‘Sossāmī’’ti gacchati, āpatti dukkaṭassa; yattha ṭhito suṇāti, āpatti pācittiyassa.
ธมฺมิกานํ กมฺมานํ ฉนฺทํ ทตฺวา ปจฺฉา ขียนธมฺมํ อาปชฺชโนฺต เทฺว อาปตฺติโย อาปชฺชติฯ ขิยฺยติ, ปโยเค ทุกฺกฎํ; ขิยฺยิเต อาปตฺติ ปาจิตฺติยสฺสฯ
Dhammikānaṃ kammānaṃ chandaṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
สเงฺฆ วินิจฺฉยกถาย วตฺตมานาย ฉนฺทํ อทตฺวา อุฎฺฐายาสนา ปกฺกมโนฺต เทฺว อาปตฺติโย อาปชฺชติฯ ปริสาย หตฺถปาสํ วิชหนฺตสฺส อาปตฺติ ทุกฺกฎสฺส; วิชหิเต อาปตฺติ ปาจิตฺติยสฺสฯ
Saṅghe vinicchayakathāya vattamānāya chandaṃ adatvā uṭṭhāyāsanā pakkamanto dve āpattiyo āpajjati. Parisāya hatthapāsaṃ vijahantassa āpatti dukkaṭassa; vijahite āpatti pācittiyassa.
สมเคฺคน สเงฺฆน จีวรํ ทตฺวา ปจฺฉา ขียนธมฺมํ อาปชฺชโนฺต เทฺว อาปตฺติโย อาปชฺชติฯ ขิยฺยติ, ปโยเค ทุกฺกฎํ; ขิยฺยิเต อาปตฺติ ปาจิตฺติยสฺสฯ
Samaggena saṅghena cīvaraṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
ชานํ สงฺฆิกํ ลาภํ ปริณตํ ปุคฺคลสฺส ปริณาเมโนฺต เทฺว อาปตฺติโย อาปชฺชติฯ ปริณาเมติ, ปโยเค ทุกฺกฎํ; ปริณามิเต อาปตฺติ ปาจิตฺติยสฺสฯ
Jānaṃ saṅghikaṃ lābhaṃ pariṇataṃ puggalassa pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite āpatti pācittiyassa.
สหธมฺมิกวโคฺค อฎฺฐโมฯ
Sahadhammikavaggo aṭṭhamo.
