| Library / Tipiṭaka / តិបិដក • Tipiṭaka / បេតវត្ថុបាឡិ • Petavatthupāḷi |
៣. រថការបេតិវត្ថុ
3. Rathakārapetivatthu
៤៣៩.
439.
‘‘វេឡុរិយថម្ភំ រុចិរំ បភស្សរំ, វិមានមារុយ្ហ អនេកចិត្តំ;
‘‘Veḷuriyathambhaṃ ruciraṃ pabhassaraṃ, vimānamāruyha anekacittaṃ;
តត្ថច្ឆសិ ទេវិ មហានុភាវេ, បថទ្ធនិ 1 បន្នរសេវ ចន្ទោ។
Tatthacchasi devi mahānubhāve, pathaddhani 2 pannaraseva cando.
៤៤០.
440.
‘‘វណ្ណោ ច តេ កនកស្ស សន្និភោ, ឧត្តត្តរូបោ ភុស ទស្សនេយ្យោ;
‘‘Vaṇṇo ca te kanakassa sannibho, uttattarūpo bhusa dassaneyyo;
បល្លង្កសេដ្ឋេ អតុលេ និសិន្នា, ឯកា តុវំ នត្ថិ ច តុយ្ហ សាមិកោ។
Pallaṅkaseṭṭhe atule nisinnā, ekā tuvaṃ natthi ca tuyha sāmiko.
៤៤១.
441.
‘‘ឥមា ច តេ បោក្ខរណី សមន្តា, បហូតមល្យា 3 ពហុបុណ្ឌរីកា;
‘‘Imā ca te pokkharaṇī samantā, pahūtamalyā 4 bahupuṇḍarīkā;
សុវណ្ណចុណ្ណេហិ សមន្តមោត្ថតា, ន តត្ថ បង្កោ បណកោ ច វិជ្ជតិ។
Suvaṇṇacuṇṇehi samantamotthatā, na tattha paṅko paṇako ca vijjati.
៤៤២.
442.
‘‘ហំសា ចិមេ ទស្សនីយា មនោរមា, ឧទកស្មិមនុបរិយន្តិ សព្ពទា;
‘‘Haṃsā cime dassanīyā manoramā, udakasmimanupariyanti sabbadā;
សមយ្យ វគ្គូបនទន្តិ សព្ពេ, ពិន្ទុស្សរា ទុន្ទុភីនំវ ឃោសោ។
Samayya vaggūpanadanti sabbe, bindussarā dundubhīnaṃva ghoso.
៤៤៣.
443.
‘‘ទទ្ទល្លមានា យសសា យសស្សិនី, នាវាយ ច ត្វំ អវលម្ព តិដ្ឋសិ;
‘‘Daddallamānā yasasā yasassinī, nāvāya ca tvaṃ avalamba tiṭṭhasi;
អាឡារបម្ហេ ហសិតេ បិយំវទេ, សព្ពង្គកល្យាណិ ភុសំ វិរោចសិ។
Āḷārapamhe hasite piyaṃvade, sabbaṅgakalyāṇi bhusaṃ virocasi.
៤៤៤.
444.
‘‘ឥទំ វិមានំ វិរជំ សមេ ឋិតំ, ឧយ្យានវន្តំ 5 រតិនន្ទិវឌ្ឍនំ;
‘‘Idaṃ vimānaṃ virajaṃ same ṭhitaṃ, uyyānavantaṃ 6 ratinandivaḍḍhanaṃ;
ឥច្ឆាមហំ នារិ អនោមទស្សនេ, តយា សហ នន្ទនេ ឥធ មោទិតុ’’ន្តិ។
Icchāmahaṃ nāri anomadassane, tayā saha nandane idha moditu’’nti.
៤៤៥.
445.
‘‘ករោហិ កម្មំ ឥធ វេទនីយំ, ចិត្តញ្ច តេ ឥធ និហិតំ ភវតុ 7;
‘‘Karohi kammaṃ idha vedanīyaṃ, cittañca te idha nihitaṃ bhavatu 8;
កត្វាន កម្មំ ឥធ វេទនីយំ, ឯវំ មមំ លច្ឆសិ កាមកាមិនិ’’ន្តិ។
Katvāna kammaṃ idha vedanīyaṃ, evaṃ mamaṃ lacchasi kāmakāmini’’nti.
៤៤៦.
446.
‘‘សាធូ’’តិ សោ តស្សា បដិស្សុណិត្វា, អកាសិ កម្មំ តហិំ វេទនីយំ;
‘‘Sādhū’’ti so tassā paṭissuṇitvā, akāsi kammaṃ tahiṃ vedanīyaṃ;
កត្វាន កម្មំ តហិំ វេទនីយំ, ឧបបជ្ជិ សោ មាណវោ តស្សា សហព្យតន្តិ។
Katvāna kammaṃ tahiṃ vedanīyaṃ, upapajji so māṇavo tassā sahabyatanti.
រថការបេតិវត្ថុ តតិយំ។
Rathakārapetivatthu tatiyaṃ.
ភាណវារំ ទុតិយំ និដ្ឋិតំ។
Bhāṇavāraṃ dutiyaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បេតវត្ថុ-អដ្ឋកថា • Petavatthu-aṭṭhakathā / ៣. រថការបេតិវត្ថុវណ្ណនា • 3. Rathakārapetivatthuvaṇṇanā
