| Library / Tipiṭaka / តិបិដក • Tipiṭaka / ភិក្ខុនីវិភង្គ-អដ្ឋកថា • Bhikkhunīvibhaṅga-aṭṭhakathā |
៥. បាដិទេសនីយកណ្ឌំ (ភិក្ខុនីវិភង្គវណ្ណនា)
5. Pāṭidesanīyakaṇḍaṃ (bhikkhunīvibhaṅgavaṇṇanā)
បាដិទេសនីយសិក្ខាបទវណ្ណនា
Pāṭidesanīyasikkhāpadavaṇṇanā
បាដិទេសនីយា នាម, ខុទ្ទកានំ អនន្តរា;
Pāṭidesanīyā nāma, khuddakānaṃ anantarā;
យេ ធម្មា អដ្ឋ អារុឡ្ហា, សង្ខេបេនេវ សង្គហំ;
Ye dhammā aṭṭha āruḷhā, saṅkhepeneva saṅgahaṃ;
តេសំ បវត្តតេ ឯសា, សង្ខេបេនេវ វណ្ណនា។
Tesaṃ pavattate esā, saṅkhepeneva vaṇṇanā.
១២២៨. យានិ ហិ ឯត្ថ បាឡិយំ សប្បិតេលាទីនិ និទ្ទិដ្ឋានិ, តានិយេវ វិញ្ញាបេត្វា ភុញ្ជន្តិយា បាដិទេសនីយា។ បាឡិវិនិមុត្តកេសុ បន សព្ពេសុ ទុក្កដំ។ សេសមេត្ថ ឧត្តានមេវ។ អដ្ឋវិធម្បិ បនេតំ បាដិទេសនីយំ ចតុសមុដ្ឋានំ – កាយតោ កាយវាចតោ កាយចិត្តតោ កាយវាចាចិត្តតោ ច សមុដ្ឋាតិ, កិរិយំ នោសញ្ញាវិមោក្ខំ, អចិត្តកំ, បណ្ណត្តិវជ្ជំ, កាយកម្មំ, វចីកម្មំ, តិចិត្តំ, តិវេទនន្តិ។
1228. Yāni hi ettha pāḷiyaṃ sappitelādīni niddiṭṭhāni, tāniyeva viññāpetvā bhuñjantiyā pāṭidesanīyā. Pāḷivinimuttakesu pana sabbesu dukkaṭaṃ. Sesamettha uttānameva. Aṭṭhavidhampi panetaṃ pāṭidesanīyaṃ catusamuṭṭhānaṃ – kāyato kāyavācato kāyacittato kāyavācācittato ca samuṭṭhāti, kiriyaṃ nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
បាដិទេសនីយវណ្ណនា និដ្ឋិតា។
Pāṭidesanīyavaṇṇanā niṭṭhitā.
បាដិទេសនីយកណ្ឌំ និដ្ឋិតំ។
Pāṭidesanīyakaṇḍaṃ niṭṭhitaṃ.
សេខិយា បន ឧទ្ទិដ្ឋា, យេ ធម្មា បញ្ចសត្តតិ;
Sekhiyā pana uddiṭṭhā, ye dhammā pañcasattati;
តេសំ អនន្តរាយេវ, សត្តាធិករណវ្ហយា។
Tesaṃ anantarāyeva, sattādhikaraṇavhayā.
មហាវិភង្គេ យោ វុត្តោ, តេសំ អត្ថវិនិច្ឆយោ;
Mahāvibhaṅge yo vutto, tesaṃ atthavinicchayo;
ភិក្ខុនីនំ វិភង្គេបិ, តាទិសំយេវ តំ វិទូ។
Bhikkhunīnaṃ vibhaṅgepi, tādisaṃyeva taṃ vidū.
យស្មា តស្មា វិសុំ តេសំ, ធម្មានំ អត្ថវណ្ណនា;
Yasmā tasmā visuṃ tesaṃ, dhammānaṃ atthavaṇṇanā;
ន វុត្តា តត្ថ យា វុត្តា, វុត្តាយេវ ហិ សា ឥធាតិ។
Na vuttā tattha yā vuttā, vuttāyeva hi sā idhāti.
សមន្តបាសាទិកាយ វិនយសំវណ្ណនាយ
Samantapāsādikāya vinayasaṃvaṇṇanāya
ភិក្ខុនីវិភង្គវណ្ណនា និដ្ឋិតា។
Bhikkhunīvibhaṅgavaṇṇanā niṭṭhitā.
សព្ពាសវបហំ ឯសា, និដ្ឋិតា វណ្ណនា យថា;
Sabbāsavapahaṃ esā, niṭṭhitā vaṇṇanā yathā;
សព្ពាសវបហំ មគ្គំ, បត្វា បស្សន្តុ និព្ពុតិន្តិ។
Sabbāsavapahaṃ maggaṃ, patvā passantu nibbutinti.
ឧភតោវិភង្គដ្ឋកថា និដ្ឋិតា។
Ubhatovibhaṅgaṭṭhakathā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ភិក្ខុនីវិភង្គ • Bhikkhunīvibhaṅga / ១. បឋមបាដិទេសនីយសិក្ខាបទំ • 1. Paṭhamapāṭidesanīyasikkhāpadaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បាដិទេសនីយសិក្ខាបទវណ្ណនា • Pāṭidesanīyasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / បាដិទេសនីយសិក្ខាបទវណ្ណនា • Pāṭidesanīyasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៥. បាដិទេសនីយសិក្ខាបទ-អត្ថយោជនា • 5. Pāṭidesanīyasikkhāpada-atthayojanā
