| Library / Tipiṭaka / ತಿಪಿಟಕ • Tipiṭaka / ಇತಿವುತ್ತಕಪಾಳಿ • Itivuttakapāḷi |
೯. ಪಠಮರಾಗಸುತ್ತಂ
9. Paṭhamarāgasuttaṃ
೬೮. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –
68. Vuttañhetaṃ bhagavatā, vuttamarahatāti me sutaṃ –
‘‘ಯಸ್ಸ ಕಸ್ಸಚಿ, ಭಿಕ್ಖವೇ, ರಾಗೋ ಅಪ್ಪಹೀನೋ, ದೋಸೋ ಅಪ್ಪಹೀನೋ, ಮೋಹೋ ಅಪ್ಪಹೀನೋ – ಅಯಂ ವುಚ್ಚತಿ, ಭಿಕ್ಖವೇ, ‘ಬದ್ಧೋ 1 ಮಾರಸ್ಸ ಪಟಿಮುಕ್ಕಸ್ಸ ಮಾರಪಾಸೋ ಯಥಾಕಾಮಕರಣೀಯೋ 2 ಪಾಪಿಮತೋ’। ಯಸ್ಸ ಕಸ್ಸಚಿ, ಭಿಕ್ಖವೇ, ರಾಗೋ ಪಹೀನೋ, ದೋಸೋ ಪಹೀನೋ, ಮೋಹೋ ಪಹೀನೋ – ಅಯಂ ವುಚ್ಚತಿ, ಭಿಕ್ಖವೇ, ‘ಅಬದ್ಧೋ ಮಾರಸ್ಸ ಓಮುಕ್ಕಸ್ಸ ಮಾರಪಾಸೋ ನ ಯಥಾ ಕಾಮಕರಣೀಯೋ 3 ಪಾಪಿಮತೋ’’’ತಿ। ಏತಮತ್ಥಂ ಭಗವಾ ಅವೋಚ। ತತ್ಥೇತಂ ಇತಿ ವುಚ್ಚತಿ –
‘‘Yassa kassaci, bhikkhave, rāgo appahīno, doso appahīno, moho appahīno – ayaṃ vuccati, bhikkhave, ‘baddho 4 mārassa paṭimukkassa mārapāso yathākāmakaraṇīyo 5 pāpimato’. Yassa kassaci, bhikkhave, rāgo pahīno, doso pahīno, moho pahīno – ayaṃ vuccati, bhikkhave, ‘abaddho mārassa omukkassa mārapāso na yathā kāmakaraṇīyo 6 pāpimato’’’ti. Etamatthaṃ bhagavā avoca. Tatthetaṃ iti vuccati –
‘‘ಯಸ್ಸ ರಾಗೋ ಚ ದೋಸೋ ಚ, ಅವಿಜ್ಜಾ ಚ ವಿರಾಜಿತಾ।
‘‘Yassa rāgo ca doso ca, avijjā ca virājitā;
ತಂ ಭಾವಿತತ್ತಞ್ಞತರಂ, ಬ್ರಹ್ಮಭೂತಂ ತಥಾಗತಂ।
Taṃ bhāvitattaññataraṃ, brahmabhūtaṃ tathāgataṃ;
ಬುದ್ಧಂ ವೇರಭಯಾತೀತಂ, ಆಹು ಸಬ್ಬಪ್ಪಹಾಯಿನ’’ನ್ತಿ॥
Buddhaṃ verabhayātītaṃ, āhu sabbappahāyina’’nti.
ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ। ನವಮಂ।
Ayampi attho vutto bhagavatā, iti me sutanti. Navamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಇತಿವುತ್ತಕ-ಅಟ್ಠಕಥಾ • Itivuttaka-aṭṭhakathā / ೯. ಪಠಮರಾಗಸುತ್ತವಣ್ಣನಾ • 9. Paṭhamarāgasuttavaṇṇanā
