| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
१०. पठमनागविमानवत्थु
10. Paṭhamanāgavimānavatthu
९६१.
961.
‘‘सुसुक्कखन्धं अभिरुय्ह नागं, अकाचिनं दन्तिं बलिं महाजवं।
‘‘Susukkakhandhaṃ abhiruyha nāgaṃ, akācinaṃ dantiṃ baliṃ mahājavaṃ;
अभिरुय्ह गजवरं 1 सुकप्पितं, इधागमा वेहायसं अन्तलिक्खे॥
Abhiruyha gajavaraṃ 2 sukappitaṃ, idhāgamā vehāyasaṃ antalikkhe.
९६२.
962.
‘‘नागस्स दन्तेसु दुवेसु निम्मिता, अच्छोदका पदुमिनियो सुफुल्ला।
‘‘Nāgassa dantesu duvesu nimmitā, acchodakā paduminiyo suphullā;
पदुमेसु च तुरियगणा पवज्जरे, इमा च नच्चन्ति मनोहरायो॥
Padumesu ca turiyagaṇā pavajjare, imā ca naccanti manoharāyo.
९६३.
963.
‘‘देविद्धिपत्तोसि महानुभावो, मनुस्सभूतो किमकासि पुञ्ञं।
‘‘Deviddhipattosi mahānubhāvo, manussabhūto kimakāsi puññaṃ;
केनासि एवं जलितानुभावो, वण्णो च ते सब्बदिसा पभासती’’ति॥
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
९६४.
964.
सो देवपुत्तो अत्तमनो, मोग्गल्लानेन पुच्छितो।
So devaputto attamano, moggallānena pucchito;
पञ्हं पुट्ठो वियाकासि, यस्स कम्मस्सिदं फलं॥
Pañhaṃ puṭṭho viyākāsi, yassa kammassidaṃ phalaṃ.
९६५.
965.
थूपस्मिं अभिरोपेसिं, पसन्नो सेहि पाणिभि॥
Thūpasmiṃ abhiropesiṃ, pasanno sehi pāṇibhi.
९६६.
966.
‘‘तेन मेतादिसो वण्णो…पे॰…वण्णो च मे सब्बदिसा पभासती’’ति॥
‘‘Tena metādiso vaṇṇo…pe…vaṇṇo ca me sabbadisā pabhāsatī’’ti.
पठमनागविमानं दसमं।
Paṭhamanāgavimānaṃ dasamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / १०. पठमनागविमानवण्णना • 10. Paṭhamanāgavimānavaṇṇanā
