| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತಪಾಳಿ • Suttanipātapāḷi |
೮. ಪಸೂರಸುತ್ತಂ
8. Pasūrasuttaṃ
೮೩೦.
830.
ಇಧೇವ ಸುದ್ಧಿ ಇತಿ ವಾದಯನ್ತಿ 1, ನಾಞ್ಞೇಸು ಧಮ್ಮೇಸು ವಿಸುದ್ಧಿಮಾಹು।
Idheva suddhi iti vādayanti 2, nāññesu dhammesu visuddhimāhu;
ಯಂ ನಿಸ್ಸಿತಾ ತತ್ಥ ಸುಭಂ ವದಾನಾ, ಪಚ್ಚೇಕಸಚ್ಚೇಸು ಪುಥೂ ನಿವಿಟ್ಠಾ॥
Yaṃ nissitā tattha subhaṃ vadānā, paccekasaccesu puthū niviṭṭhā.
೮೩೧.
831.
ತೇ ವಾದಕಾಮಾ ಪರಿಸಂ ವಿಗಯ್ಹ, ಬಾಲಂ ದಹನ್ತೀ ಮಿಥು ಅಞ್ಞಮಞ್ಞಂ।
Te vādakāmā parisaṃ vigayha, bālaṃ dahantī mithu aññamaññaṃ;
ವದನ್ತಿ ತೇ ಅಞ್ಞಸಿತಾ ಕಥೋಜ್ಜಂ, ಪಸಂಸಕಾಮಾ ಕುಸಲಾ ವದಾನಾ॥
Vadanti te aññasitā kathojjaṃ, pasaṃsakāmā kusalā vadānā.
೮೩೨.
832.
ಯುತ್ತೋ ಕಥಾಯಂ ಪರಿಸಾಯ ಮಜ್ಝೇ, ಪಸಂಸಮಿಚ್ಛಂ ವಿನಿಘಾತಿ ಹೋತಿ।
Yutto kathāyaṃ parisāya majjhe, pasaṃsamicchaṃ vinighāti hoti;
ಅಪಾಹತಸ್ಮಿಂ ಪನ ಮಙ್ಕು ಹೋತಿ, ನಿನ್ದಾಯ ಸೋ ಕುಪ್ಪತಿ ರನ್ಧಮೇಸೀ॥
Apāhatasmiṃ pana maṅku hoti, nindāya so kuppati randhamesī.
೮೩೩.
833.
ಯಮಸ್ಸ ವಾದಂ ಪರಿಹೀನಮಾಹು, ಅಪಾಹತಂ ಪಞ್ಹವಿಮಂಸಕಾಸೇ।
Yamassa vādaṃ parihīnamāhu, apāhataṃ pañhavimaṃsakāse;
ಪರಿದೇವತಿ ಸೋಚತಿ ಹೀನವಾದೋ, ಉಪಚ್ಚಗಾ ಮನ್ತಿ ಅನುತ್ಥುನಾತಿ॥
Paridevati socati hīnavādo, upaccagā manti anutthunāti.
೮೩೪.
834.
ಏತೇ ವಿವಾದಾ ಸಮಣೇಸು ಜಾತಾ, ಏತೇಸು ಉಗ್ಘಾತಿ ನಿಘಾತಿ ಹೋತಿ।
Ete vivādā samaṇesu jātā, etesu ugghāti nighāti hoti;
ಏತಮ್ಪಿ ದಿಸ್ವಾ ವಿರಮೇ ಕಥೋಜ್ಜಂ, ನ ಹಞ್ಞದತ್ಥತ್ಥಿಪಸಂಸಲಾಭಾ॥
Etampi disvā virame kathojjaṃ, na haññadatthatthipasaṃsalābhā.
೮೩೫.
835.
ಪಸಂಸಿತೋ ವಾ ಪನ ತತ್ಥ ಹೋತಿ, ಅಕ್ಖಾಯ ವಾದಂ ಪರಿಸಾಯ ಮಜ್ಝೇ।
Pasaṃsito vā pana tattha hoti, akkhāya vādaṃ parisāya majjhe;
ಸೋ ಹಸ್ಸತೀ ಉಣ್ಣಮತೀ 3 ಚ ತೇನ, ಪಪ್ಪುಯ್ಯ ತಮತ್ಥಂ ಯಥಾ ಮನೋ ಅಹು॥
So hassatī uṇṇamatī 4 ca tena, pappuyya tamatthaṃ yathā mano ahu.
೮೩೬.
836.
ಯಾ ಉಣ್ಣತೀ 5 ಸಾಸ್ಸ ವಿಘಾತಭೂಮಿ, ಮಾನಾತಿಮಾನಂ ವದತೇ ಪನೇಸೋ।
Yā uṇṇatī 6 sāssa vighātabhūmi, mānātimānaṃ vadate paneso;
ಏತಮ್ಪಿ ದಿಸ್ವಾ ನ ವಿವಾದಯೇಥ, ನ ಹಿ ತೇನ ಸುದ್ಧಿಂ ಕುಸಲಾ ವದನ್ತಿ॥
Etampi disvā na vivādayetha, na hi tena suddhiṃ kusalā vadanti.
೮೩೭.
837.
ಸೂರೋ ಯಥಾ ರಾಜಖಾದಾಯ ಪುಟ್ಠೋ, ಅಭಿಗಜ್ಜಮೇತಿ ಪಟಿಸೂರಮಿಚ್ಛಂ।
Sūro yathā rājakhādāya puṭṭho, abhigajjameti paṭisūramicchaṃ;
ಯೇನೇವ ಸೋ ತೇನ ಪಲೇಹಿ ಸೂರ, ಪುಬ್ಬೇವ ನತ್ಥಿ ಯದಿದಂ ಯುಧಾಯ॥
Yeneva so tena palehi sūra, pubbeva natthi yadidaṃ yudhāya.
೮೩೮.
838.
ಯೇ ದಿಟ್ಠಿಮುಗ್ಗಯ್ಹ ವಿವಾದಯನ್ತಿ 7, ಇದಮೇವ ಸಚ್ಚನ್ತಿ ಚ ವಾದಯನ್ತಿ।
Ye diṭṭhimuggayha vivādayanti 8, idameva saccanti ca vādayanti;
ತೇ ತ್ವಂ ವದಸ್ಸೂ ನ ಹಿ ತೇಧ ಅತ್ಥಿ, ವಾದಮ್ಹಿ ಜಾತೇ ಪಟಿಸೇನಿಕತ್ತಾ॥
Te tvaṃ vadassū na hi tedha atthi, vādamhi jāte paṭisenikattā.
೮೩೯.
839.
ವಿಸೇನಿಕತ್ವಾ ಪನ ಯೇ ಚರನ್ತಿ, ದಿಟ್ಠೀಹಿ ದಿಟ್ಠಿಂ ಅವಿರುಜ್ಝಮಾನಾ।
Visenikatvā pana ye caranti, diṭṭhīhi diṭṭhiṃ avirujjhamānā;
ತೇಸು ತ್ವಂ ಕಿಂ ಲಭೇಥೋ ಪಸೂರ, ಯೇಸೀಧ ನತ್ಥೀ ಪರಮುಗ್ಗಹೀತಂ॥
Tesu tvaṃ kiṃ labhetho pasūra, yesīdha natthī paramuggahītaṃ.
೮೪೦.
840.
ಅಥ ತ್ವಂ ಪವಿತಕ್ಕಮಾಗಮಾ, ಮನಸಾ ದಿಟ್ಠಿಗತಾನಿ ಚಿನ್ತಯನ್ತೋ।
Atha tvaṃ pavitakkamāgamā, manasā diṭṭhigatāni cintayanto;
ಧೋನೇನ ಯುಗಂ ಸಮಾಗಮಾ, ನ ಹಿ ತ್ವಂ ಸಕ್ಖಸಿ ಸಮ್ಪಯಾತವೇತಿ॥
Dhonena yugaṃ samāgamā, na hi tvaṃ sakkhasi sampayātaveti.
ಪಸೂರಸುತ್ತಂ ಅಟ್ಠಮಂ ನಿಟ್ಠಿತಂ।
Pasūrasuttaṃ aṭṭhamaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā / ೮. ಪಸೂರಸುತ್ತವಣ್ಣನಾ • 8. Pasūrasuttavaṇṇanā
