| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
៨. បសូរសុត្តំ
8. Pasūrasuttaṃ
៨៣០.
830.
ឥធេវ សុទ្ធិ ឥតិ វាទយន្តិ 1, នាញ្ញេសុ ធម្មេសុ វិសុទ្ធិមាហុ;
Idheva suddhi iti vādayanti 2, nāññesu dhammesu visuddhimāhu;
យំ និស្សិតា តត្ថ សុភំ វទានា, បច្ចេកសច្ចេសុ បុថូ និវិដ្ឋា។
Yaṃ nissitā tattha subhaṃ vadānā, paccekasaccesu puthū niviṭṭhā.
៨៣១.
831.
តេ វាទកាមា បរិសំ វិគយ្ហ, ពាលំ ទហន្តី មិថុ អញ្ញមញ្ញំ;
Te vādakāmā parisaṃ vigayha, bālaṃ dahantī mithu aññamaññaṃ;
វទន្តិ តេ អញ្ញសិតា កថោជ្ជំ, បសំសកាមា កុសលា វទានា។
Vadanti te aññasitā kathojjaṃ, pasaṃsakāmā kusalā vadānā.
៨៣២.
832.
យុត្តោ កថាយំ បរិសាយ មជ្ឈេ, បសំសមិច្ឆំ វិនិឃាតិ ហោតិ;
Yutto kathāyaṃ parisāya majjhe, pasaṃsamicchaṃ vinighāti hoti;
អបាហតស្មិំ បន មង្កុ ហោតិ, និន្ទាយ សោ កុប្បតិ រន្ធមេសី។
Apāhatasmiṃ pana maṅku hoti, nindāya so kuppati randhamesī.
៨៣៣.
833.
យមស្ស វាទំ បរិហីនមាហុ, អបាហតំ បញ្ហវិមំសកាសេ;
Yamassa vādaṃ parihīnamāhu, apāhataṃ pañhavimaṃsakāse;
បរិទេវតិ សោចតិ ហីនវាទោ, ឧបច្ចគា មន្តិ អនុត្ថុនាតិ។
Paridevati socati hīnavādo, upaccagā manti anutthunāti.
៨៣៤.
834.
ឯតេ វិវាទា សមណេសុ ជាតា, ឯតេសុ ឧគ្ឃាតិ និឃាតិ ហោតិ;
Ete vivādā samaṇesu jātā, etesu ugghāti nighāti hoti;
ឯតម្បិ ទិស្វា វិរមេ កថោជ្ជំ, ន ហញ្ញទត្ថត្ថិបសំសលាភា។
Etampi disvā virame kathojjaṃ, na haññadatthatthipasaṃsalābhā.
៨៣៥.
835.
បសំសិតោ វា បន តត្ថ ហោតិ, អក្ខាយ វាទំ បរិសាយ មជ្ឈេ;
Pasaṃsito vā pana tattha hoti, akkhāya vādaṃ parisāya majjhe;
សោ ហស្សតី ឧណ្ណមតី 3 ច តេន, បប្បុយ្យ តមត្ថំ យថា មនោ អហុ។
So hassatī uṇṇamatī 4 ca tena, pappuyya tamatthaṃ yathā mano ahu.
៨៣៦.
836.
យា ឧណ្ណតី 5 សាស្ស វិឃាតភូមិ, មានាតិមានំ វទតេ បនេសោ;
Yā uṇṇatī 6 sāssa vighātabhūmi, mānātimānaṃ vadate paneso;
ឯតម្បិ ទិស្វា ន វិវាទយេថ, ន ហិ តេន សុទ្ធិំ កុសលា វទន្តិ។
Etampi disvā na vivādayetha, na hi tena suddhiṃ kusalā vadanti.
៨៣៧.
837.
សូរោ យថា រាជខាទាយ បុដ្ឋោ, អភិគជ្ជមេតិ បដិសូរមិច្ឆំ;
Sūro yathā rājakhādāya puṭṭho, abhigajjameti paṭisūramicchaṃ;
យេនេវ សោ តេន បលេហិ សូរ, បុព្ពេវ នត្ថិ យទិទំ យុធាយ។
Yeneva so tena palehi sūra, pubbeva natthi yadidaṃ yudhāya.
៨៣៨.
838.
យេ ទិដ្ឋិមុគ្គយ្ហ វិវាទយន្តិ 7, ឥទមេវ សច្ចន្តិ ច វាទយន្តិ;
Ye diṭṭhimuggayha vivādayanti 8, idameva saccanti ca vādayanti;
តេ ត្វំ វទស្សូ ន ហិ តេធ អត្ថិ, វាទម្ហិ ជាតេ បដិសេនិកត្តា។
Te tvaṃ vadassū na hi tedha atthi, vādamhi jāte paṭisenikattā.
៨៣៩.
839.
វិសេនិកត្វា បន យេ ចរន្តិ, ទិដ្ឋីហិ ទិដ្ឋិំ អវិរុជ្ឈមានា;
Visenikatvā pana ye caranti, diṭṭhīhi diṭṭhiṃ avirujjhamānā;
តេសុ ត្វំ កិំ លភេថោ បសូរ, យេសីធ នត្ថី បរមុគ្គហីតំ។
Tesu tvaṃ kiṃ labhetho pasūra, yesīdha natthī paramuggahītaṃ.
៨៤០.
840.
អថ ត្វំ បវិតក្កមាគមា, មនសា ទិដ្ឋិគតានិ ចិន្តយន្តោ;
Atha tvaṃ pavitakkamāgamā, manasā diṭṭhigatāni cintayanto;
ធោនេន យុគំ សមាគមា, ន ហិ ត្វំ សក្ខសិ សម្បយាតវេតិ។
Dhonena yugaṃ samāgamā, na hi tvaṃ sakkhasi sampayātaveti.
បសូរសុត្តំ អដ្ឋមំ និដ្ឋិតំ។
Pasūrasuttaṃ aṭṭhamaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ៨. បសូរសុត្តវណ្ណនា • 8. Pasūrasuttavaṇṇanā
