| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
៥. បរមដ្ឋកសុត្តំ
5. Paramaṭṭhakasuttaṃ
៨០២.
802.
បរមន្តិ ទិដ្ឋីសុ បរិព្ពសានោ, យទុត្តរិ កុរុតេ ជន្តុ លោកេ;
Paramanti diṭṭhīsu paribbasāno, yaduttari kurute jantu loke;
ហីនាតិ អញ្ញេ តតោ សព្ពមាហ, តស្មា វិវាទានិ អវីតិវត្តោ។
Hīnāti aññe tato sabbamāha, tasmā vivādāni avītivatto.
៨០៣.
803.
យទត្តនី បស្សតិ អានិសំសំ, ទិដ្ឋេ សុតេ សីលវតេ 1 មុតេ វា;
Yadattanī passati ānisaṃsaṃ, diṭṭhe sute sīlavate 2 mute vā;
តទេវ សោ តត្ថ សមុគ្គហាយ, និហីនតោ បស្សតិ សព្ពមញ្ញំ។
Tadeva so tattha samuggahāya, nihīnato passati sabbamaññaṃ.
៨០៤.
804.
តំ វាបិ គន្ថំ កុសលា វទន្តិ, យំ និស្សិតោ បស្សតិ ហីនមញ្ញំ;
Taṃ vāpi ganthaṃ kusalā vadanti, yaṃ nissito passati hīnamaññaṃ;
តស្មា ហិ ទិដ្ឋំ វ សុតំ មុតំ វា, សីលព្ពតំ ភិក្ខុ ន និស្សយេយ្យ។
Tasmā hi diṭṭhaṃ va sutaṃ mutaṃ vā, sīlabbataṃ bhikkhu na nissayeyya.
៨០៥.
805.
ទិដ្ឋិម្បិ លោកស្មិំ ន កប្បយេយ្យ, ញាណេន វា សីលវតេន វាបិ;
Diṭṭhimpi lokasmiṃ na kappayeyya, ñāṇena vā sīlavatena vāpi;
សមោតិ អត្តានមនូបនេយ្យ, ហីនោ ន មញ្ញេថ វិសេសិ វាបិ។
Samoti attānamanūpaneyya, hīno na maññetha visesi vāpi.
៨០៦.
806.
អត្តំ បហាយ អនុបាទិយានោ, ញាណេបិ សោ និស្សយំ នោ ករោតិ;
Attaṃ pahāya anupādiyāno, ñāṇepi so nissayaṃ no karoti;
៨០៧.
807.
យស្សូភយន្តេ បណិធីធ នត្ថិ, ភវាភវាយ ឥធ វា ហុរំ វា;
Yassūbhayante paṇidhīdha natthi, bhavābhavāya idha vā huraṃ vā;
និវេសនា តស្ស ន សន្តិ កេចិ, ធម្មេសុ និច្ឆេយ្យ សមុគ្គហីតំ។
Nivesanā tassa na santi keci, dhammesu niccheyya samuggahītaṃ.
៨០៨.
808.
តស្សីធ ទិដ្ឋេ វ សុតេ មុតេ វា, បកប្បិតា នត្ថិ អណូបិ សញ្ញា;
Tassīdha diṭṭhe va sute mute vā, pakappitā natthi aṇūpi saññā;
តំ ព្រាហ្មណំ ទិដ្ឋិមនាទិយានំ, កេនីធ លោកស្មិំ វិកប្បយេយ្យ។
Taṃ brāhmaṇaṃ diṭṭhimanādiyānaṃ, kenīdha lokasmiṃ vikappayeyya.
៨០៩.
809.
ន កប្បយន្តិ ន បុរេក្ខរោន្តិ, ធម្មាបិ តេសំ ន បដិច្ឆិតាសេ;
Na kappayanti na purekkharonti, dhammāpi tesaṃ na paṭicchitāse;
ន ព្រាហ្មណោ សីលវតេន នេយ្យោ, បារង្គតោ ន បច្ចេតិ តាទីតិ។
Na brāhmaṇo sīlavatena neyyo, pāraṅgato na pacceti tādīti.
បរមដ្ឋកសុត្តំ បញ្ចមំ និដ្ឋិតំ។
Paramaṭṭhakasuttaṃ pañcamaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ៥. បរមដ្ឋកសុត្តវណ្ណនា • 5. Paramaṭṭhakasuttavaṇṇanā
