| Library / Tipiṭaka / តិបិដក • Tipiṭaka / ធម្មបទបាឡិ • Dhammapadapāḷi |
៦. បណ្ឌិតវគ្គោ
6. Paṇḍitavaggo
៧៦.
76.
និធីនំវ បវត្តារំ, យំ បស្សេ វជ្ជទស្សិនំ;
Nidhīnaṃva pavattāraṃ, yaṃ passe vajjadassinaṃ;
និគ្គយ្ហវាទិំ មេធាវិំ, តាទិសំ បណ្ឌិតំ ភជេ;
Niggayhavādiṃ medhāviṃ, tādisaṃ paṇḍitaṃ bhaje;
តាទិសំ ភជមានស្ស, សេយ្យោ ហោតិ ន បាបិយោ។
Tādisaṃ bhajamānassa, seyyo hoti na pāpiyo.
៧៧.
77.
ឱវទេយ្យានុសាសេយ្យ, អសព្ភា ច និវារយេ;
Ovadeyyānusāseyya, asabbhā ca nivāraye;
សតញ្ហិ សោ បិយោ ហោតិ, អសតំ ហោតិ អប្បិយោ។
Satañhi so piyo hoti, asataṃ hoti appiyo.
៧៨.
78.
ន ភជេ បាបកេ មិត្តេ, ន ភជេ បុរិសាធមេ;
Na bhaje pāpake mitte, na bhaje purisādhame;
ភជេថ មិត្តេ កល្យាណេ, ភជេថ បុរិសុត្តមេ។
Bhajetha mitte kalyāṇe, bhajetha purisuttame.
៧៩.
79.
ធម្មបីតិ សុខំ សេតិ, វិប្បសន្នេន ចេតសា;
Dhammapīti sukhaṃ seti, vippasannena cetasā;
អរិយប្បវេទិតេ ធម្មេ, សទា រមតិ បណ្ឌិតោ។
Ariyappavedite dhamme, sadā ramati paṇḍito.
៨០.
80.
ឧទកញ្ហិ នយន្តិ នេត្តិកា, ឧសុការា នមយន្តិ 1 តេជនំ;
Udakañhi nayanti nettikā, usukārā namayanti 2 tejanaṃ;
ទារុំ នមយន្តិ តច្ឆកា, អត្តានំ ទមយន្តិ បណ្ឌិតា។
Dāruṃ namayanti tacchakā, attānaṃ damayanti paṇḍitā.
៨១.
81.
ឯវំ និន្ទាបសំសាសុ, ន សមិញ្ជន្តិ បណ្ឌិតា។
Evaṃ nindāpasaṃsāsu, na samiñjanti paṇḍitā.
៨២.
82.
យថាបិ រហទោ គម្ភីរោ, វិប្បសន្នោ អនាវិលោ;
Yathāpi rahado gambhīro, vippasanno anāvilo;
ឯវំ ធម្មានិ សុត្វាន, វិប្បសីទន្តិ បណ្ឌិតា។
Evaṃ dhammāni sutvāna, vippasīdanti paṇḍitā.
៨៣.
83.
សព្ពត្ថ វេ សប្បុរិសា ចជន្តិ, ន កាមកាមា លបយន្តិ សន្តោ;
Sabbattha ve sappurisā cajanti, na kāmakāmā lapayanti santo;
សុខេន ផុដ្ឋា អថ វា ទុខេន, ន ឧច្ចាវចំ 5 បណ្ឌិតា ទស្សយន្តិ។
Sukhena phuṭṭhā atha vā dukhena, na uccāvacaṃ 6 paṇḍitā dassayanti.
៨៤.
84.
ន អត្តហេតុ ន បរស្ស ហេតុ, ន បុត្តមិច្ឆេ ន ធនំ ន រដ្ឋំ;
Na attahetu na parassa hetu, na puttamicche na dhanaṃ na raṭṭhaṃ;
ន ឥច្ឆេយ្យ 7 អធម្មេន សមិទ្ធិមត្តនោ, ស សីលវា បញ្ញវា ធម្មិកោ សិយា។
Na iccheyya 8 adhammena samiddhimattano, sa sīlavā paññavā dhammiko siyā.
៨៥.
85.
អប្បកា តេ មនុស្សេសុ, យេ ជនា បារគាមិនោ;
Appakā te manussesu, ye janā pāragāmino;
អថាយំ ឥតរា បជា, តីរមេវានុធាវតិ។
Athāyaṃ itarā pajā, tīramevānudhāvati.
៨៦.
86.
យេ ច ខោ សម្មទក្ខាតេ, ធម្មេ ធម្មានុវត្តិនោ;
Ye ca kho sammadakkhāte, dhamme dhammānuvattino;
តេ ជនា បារមេស្សន្តិ, មច្ចុធេយ្យំ សុទុត្តរំ។
Te janā pāramessanti, maccudheyyaṃ suduttaraṃ.
៨៧.
87.
កណ្ហំ ធម្មំ វិប្បហាយ, សុក្កំ ភាវេថ បណ្ឌិតោ;
Kaṇhaṃ dhammaṃ vippahāya, sukkaṃ bhāvetha paṇḍito;
ឱកា អនោកមាគម្ម, វិវេកេ យត្ថ ទូរមំ។
Okā anokamāgamma, viveke yattha dūramaṃ.
៨៨.
88.
តត្រាភិរតិមិច្ឆេយ្យ, ហិត្វា កាមេ អកិញ្ចនោ;
Tatrābhiratimiccheyya, hitvā kāme akiñcano;
៨៩.
89.
យេសំ សម្ពោធិយង្គេសុ, សម្មា ចិត្តំ សុភាវិតំ;
Yesaṃ sambodhiyaṅgesu, sammā cittaṃ subhāvitaṃ;
អាទានបដិនិស្សគ្គេ, អនុបាទាយ យេ រតា;
Ādānapaṭinissagge, anupādāya ye ratā;
ខីណាសវា ជុតិមន្តោ, តេ លោកេ បរិនិព្ពុតា។
Khīṇāsavā jutimanto, te loke parinibbutā.
បណ្ឌិតវគ្គោ ឆដ្ឋោ និដ្ឋិតោ។
Paṇḍitavaggo chaṭṭho niṭṭhito.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ធម្មបទ-អដ្ឋកថា • Dhammapada-aṭṭhakathā / ៦. បណ្ឌិតវគ្គោ • 6. Paṇḍitavaggo
