| Library / Tipiṭaka / តិបិដក • Tipiṭaka / ធម្មបទបាឡិ • Dhammapadapāḷi |
៧. អរហន្តវគ្គោ
7. Arahantavaggo
៩០.
90.
គតទ្ធិនោ វិសោកស្ស, វិប្បមុត្តស្ស សព្ពធិ;
Gataddhino visokassa, vippamuttassa sabbadhi;
សព្ពគន្ថប្បហីនស្ស, បរិឡាហោ ន វិជ្ជតិ។
Sabbaganthappahīnassa, pariḷāho na vijjati.
៩១.
91.
ឧយ្យុញ្ជន្តិ សតីមន្តោ, ន និកេតេ រមន្តិ តេ;
Uyyuñjanti satīmanto, na nikete ramanti te;
ហំសាវ បល្លលំ ហិត្វា, ឱកមោកំ ជហន្តិ តេ។
Haṃsāva pallalaṃ hitvā, okamokaṃ jahanti te.
៩២.
92.
យេសំ សន្និចយោ នត្ថិ, យេ បរិញ្ញាតភោជនា;
Yesaṃ sannicayo natthi, ye pariññātabhojanā;
សុញ្ញតោ អនិមិត្តោ ច, វិមោក្ខោ យេសំ គោចរោ;
Suññato animitto ca, vimokkho yesaṃ gocaro;
៩៣.
93.
យស្សាសវា បរិក្ខីណា, អាហារេ ច អនិស្សិតោ;
Yassāsavā parikkhīṇā, āhāre ca anissito;
សុញ្ញតោ អនិមិត្តោ ច, វិមោក្ខោ យស្ស គោចរោ;
Suññato animitto ca, vimokkho yassa gocaro;
អាកាសេ វ សកុន្តានំ, បទំ តស្ស ទុរន្នយំ។
Ākāse va sakuntānaṃ, padaṃ tassa durannayaṃ.
៩៤.
94.
យស្សិន្ទ្រិយានិ សមថង្គតានិ 3, អស្សា យថា សារថិនា សុទន្តា;
Yassindriyāni samathaṅgatāni 4, assā yathā sārathinā sudantā;
បហីនមានស្ស អនាសវស្ស, ទេវាបិ តស្ស បិហយន្តិ តាទិនោ។
Pahīnamānassa anāsavassa, devāpi tassa pihayanti tādino.
៩៥.
95.
បថវិសមោ នោ វិរុជ្ឈតិ, ឥន្ទខិលុបមោ 5 តាទិ សុព្ពតោ;
Pathavisamo no virujjhati, indakhilupamo 6 tādi subbato;
រហទោវ អបេតកទ្ទមោ, សំសារា ន ភវន្តិ តាទិនោ។
Rahadova apetakaddamo, saṃsārā na bhavanti tādino.
៩៦.
96.
សន្តំ តស្ស មនំ ហោតិ, សន្តា វាចា ច កម្ម ច;
Santaṃ tassa manaṃ hoti, santā vācā ca kamma ca;
សម្មទញ្ញា វិមុត្តស្ស, ឧបសន្តស្ស តាទិនោ។
Sammadaññā vimuttassa, upasantassa tādino.
៩៧.
97.
អស្សទ្ធោ អកតញ្ញូ ច, សន្ធិច្ឆេទោ ច យោ នរោ;
Assaddho akataññū ca, sandhicchedo ca yo naro;
ហតាវកាសោ វន្តាសោ, ស វេ ឧត្តមបោរិសោ។
Hatāvakāso vantāso, sa ve uttamaporiso.
៩៨.
98.
គាមេ វា យទិ វារញ្ញេ, និន្នេ វា យទិ វា ថលេ;
Gāme vā yadi vāraññe, ninne vā yadi vā thale;
យត្ថ អរហន្តោ វិហរន្តិ, តំ ភូមិរាមណេយ្យកំ។
Yattha arahanto viharanti, taṃ bhūmirāmaṇeyyakaṃ.
៩៩.
99.
រមណីយានិ អរញ្ញានិ, យត្ថ ន រមតី ជនោ;
Ramaṇīyāni araññāni, yattha na ramatī jano;
វីតរាគា រមិស្សន្តិ, ន តេ កាមគវេសិនោ។
Vītarāgā ramissanti, na te kāmagavesino.
អរហន្តវគ្គោ សត្តមោ និដ្ឋិតោ។
Arahantavaggo sattamo niṭṭhito.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ធម្មបទ-អដ្ឋកថា • Dhammapada-aṭṭhakathā / ៧. អរហន្តវគ្គោ • 7. Arahantavaggo
