| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៩. បច្ចុបដ្ឋានសញ្ញកត្ថេរអបទានវណ្ណនា
9. Paccupaṭṭhānasaññakattheraapadānavaṇṇanā
អត្ថទស្សិម្ហិ សុគតេតិអាទិកំ អាយស្មតោ បច្ចុបដ្ឋានសញ្ញកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ អត្ថទស្សិស្ស ភគវតោ កាលេ យក្ខយោនិយំ និព្ពត្តោ ភគវតិ ធរមានេ ទស្សនស្ស អលទ្ធត្តា បច្ឆា បរិនិព្ពុតេ មហាសោកប្បត្តោ វិហាសិ។ តទា ហិស្ស ភគវតោ សាគតោ នាម អគ្គសាវកោ អនុសាសន្តោ ភគវតោ សារីរិកធាតុបូជា ភគវតិ ធរមានេ កតបូជា វិយ ចិត្តប្បសាទវសា មហប្ផលំ ភវតី’’តិ វត្វា ‘‘ថូបំ ករោហី’’តិ និយោជិតោ ថូបំ ការេសិ, តំ បូជេត្វា តតោ ចុតោ ទេវមនុស្សេសុ សក្កចក្កវត្តិសម្បត្តិមនុភវិត្វា ឥមស្មិំ ពុទ្ធុប្បាទេ សាវត្ថិយំ ឯកស្មិំ កុលគេហេ និព្ពត្តោ វិញ្ញុតំ បត្តោ សត្ថរិ បសីទិត្វា បព្ពជិត្វា នចិរស្សេវ អរហា អហោសិ។
Atthadassimhi sugatetiādikaṃ āyasmato paccupaṭṭhānasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle yakkhayoniyaṃ nibbatto bhagavati dharamāne dassanassa aladdhattā pacchā parinibbute mahāsokappatto vihāsi. Tadā hissa bhagavato sāgato nāma aggasāvako anusāsanto bhagavato sārīrikadhātupūjā bhagavati dharamāne katapūjā viya cittappasādavasā mahapphalaṃ bhavatī’’ti vatvā ‘‘thūpaṃ karohī’’ti niyojito thūpaṃ kāresi, taṃ pūjetvā tato cuto devamanussesu sakkacakkavattisampattimanubhavitvā imasmiṃ buddhuppāde sāvatthiyaṃ ekasmiṃ kulagehe nibbatto viññutaṃ patto satthari pasīditvā pabbajitvā nacirasseva arahā ahosi.
៧២. សោ អបរភាគេ អត្តនោ បុញ្ញកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ អត្ថទស្សិម្ហិ សុគតេតិអាទិមាហ។ តំ ហេដ្ឋា វុត្តមេវ។ យក្ខយោនិំ ឧបបជ្ជិន្តិ ឯត្ថ បន អត្តនោ សកាសំ សម្បត្តសម្បត្តេ ខាទន្តា យន្តិ គច្ឆន្តីតិ យក្ខា, យក្ខានំ យោនិ ជាតីតិ យក្ខយោនិ, យក្ខយោនិយំ និព្ពត្តោតិ អត្ថោ។
72. So aparabhāge attano puññakammaṃ saritvā somanassajāto pubbacaritāpadānaṃ pakāsento atthadassimhi sugatetiādimāha. Taṃ heṭṭhā vuttameva. Yakkhayoniṃ upapajjinti ettha pana attano sakāsaṃ sampattasampatte khādantā yanti gacchantīti yakkhā, yakkhānaṃ yoni jātīti yakkhayoni, yakkhayoniyaṃ nibbattoti attho.
៧៣. ទុល្លទ្ធំ វត មេ អាសីតិ មេ មយា លទ្ធយសំ ទុល្លទ្ធំ, ពុទ្ធភូតស្ស សត្ថុនោ សក្ការំ អកតត្តា វិរាធេត្វា លទ្ធន្តិ អត្ថោ។ ទុប្បភាតន្តិ ទុដ្ឋុ បភាតំ រត្តិយា បភាតករណំ, មយ្ហំ ន សុដ្ឋុំ បភាតន្តិ អត្ថោ។ ទុរុដ្ឋិតន្តិ ទុឧដ្ឋិតំ, សូរិយស្ស ឧគ្គមនំ មយ្ហំ ទុឧគ្គមនន្តិ អត្ថោ។ សេសំ សព្ពត្ថ ឧត្តានមេវាតិ។
73.Dulladdhaṃvata me āsīti me mayā laddhayasaṃ dulladdhaṃ, buddhabhūtassa satthuno sakkāraṃ akatattā virādhetvā laddhanti attho. Duppabhātanti duṭṭhu pabhātaṃ rattiyā pabhātakaraṇaṃ, mayhaṃ na suṭṭhuṃ pabhātanti attho. Duruṭṭhitanti duuṭṭhitaṃ, sūriyassa uggamanaṃ mayhaṃ duuggamananti attho. Sesaṃ sabbattha uttānamevāti.
បច្ចុបដ្ឋានសញ្ញកត្ថេរអបទានវណ្ណនា សមត្តា។
Paccupaṭṭhānasaññakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៩. បច្ចុបដ្ឋានសញ្ញកត្ថេរអបទានំ • 9. Paccupaṭṭhānasaññakattheraapadānaṃ
