| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತಪಾಳಿ • Suttanipātapāḷi |
೮. ನಾವಾಸುತ್ತಂ
8. Nāvāsuttaṃ
೩೧೮.
318.
ಯಸ್ಮಾ ಹಿ ಧಮ್ಮಂ ಪುರಿಸೋ ವಿಜಞ್ಞಾ, ಇನ್ದಂವ ನಂ ದೇವತಾ ಪೂಜಯೇಯ್ಯ।
Yasmā hi dhammaṃ puriso vijaññā, indaṃva naṃ devatā pūjayeyya;
ಸೋ ಪೂಜಿತೋ ತಸ್ಮಿ ಪಸನ್ನಚಿತ್ತೋ, ಬಹುಸ್ಸುತೋ ಪಾತುಕರೋತಿ ಧಮ್ಮಂ॥
So pūjito tasmi pasannacitto, bahussuto pātukaroti dhammaṃ.
೩೧೯.
319.
ತದಟ್ಠಿಕತ್ವಾನ ನಿಸಮ್ಮ ಧೀರೋ, ಧಮ್ಮಾನುಧಮ್ಮಂ ಪಟಿಪಜ್ಜಮಾನೋ।
Tadaṭṭhikatvāna nisamma dhīro, dhammānudhammaṃ paṭipajjamāno;
ವಿಞ್ಞೂ ವಿಭಾವೀ ನಿಪುಣೋ ಚ ಹೋತಿ, ಯೋ ತಾದಿಸಂ ಭಜತಿ ಅಪ್ಪಮತ್ತೋ॥
Viññū vibhāvī nipuṇo ca hoti, yo tādisaṃ bhajati appamatto.
೩೨೦.
320.
ಖುದ್ದಞ್ಚ ಬಾಲಂ ಉಪಸೇವಮಾನೋ, ಅನಾಗತತ್ಥಞ್ಚ ಉಸೂಯಕಞ್ಚ।
Khuddañca bālaṃ upasevamāno, anāgatatthañca usūyakañca;
ಇಧೇವ ಧಮ್ಮಂ ಅವಿಭಾವಯಿತ್ವಾ, ಅವಿತಿಣ್ಣಕಙ್ಖೋ ಮರಣಂ ಉಪೇತಿ॥
Idheva dhammaṃ avibhāvayitvā, avitiṇṇakaṅkho maraṇaṃ upeti.
೩೨೧.
321.
ಯಥಾ ನರೋ ಆಪಗಮೋತರಿತ್ವಾ, ಮಹೋದಕಂ ಸಲಿಲಂ ಸೀಘಸೋತಂ।
Yathā naro āpagamotaritvā, mahodakaṃ salilaṃ sīghasotaṃ;
ಸೋ ವುಯ್ಹಮಾನೋ ಅನುಸೋತಗಾಮೀ, ಕಿಂ ಸೋ ಪರೇ ಸಕ್ಖತಿ ತಾರಯೇತುಂ॥
So vuyhamāno anusotagāmī, kiṃ so pare sakkhati tārayetuṃ.
೩೨೨.
322.
ತಥೇವ ಧಮ್ಮಂ ಅವಿಭಾವಯಿತ್ವಾ, ಬಹುಸ್ಸುತಾನಂ ಅನಿಸಾಮಯತ್ಥಂ।
Tatheva dhammaṃ avibhāvayitvā, bahussutānaṃ anisāmayatthaṃ;
ಸಯಂ ಅಜಾನಂ ಅವಿತಿಣ್ಣಕಙ್ಖೋ, ಕಿಂ ಸೋ ಪರೇ ಸಕ್ಖತಿ ನಿಜ್ಝಪೇತುಂ॥
Sayaṃ ajānaṃ avitiṇṇakaṅkho, kiṃ so pare sakkhati nijjhapetuṃ.
೩೨೩.
323.
ಯಥಾಪಿ ನಾವಂ ದಳ್ಹಮಾರುಹಿತ್ವಾ, ಫಿಯೇನ 1 ರಿತ್ತೇನ ಸಮಙ್ಗಿಭೂತೋ।
Yathāpi nāvaṃ daḷhamāruhitvā, phiyena 2 rittena samaṅgibhūto;
ಸೋ ತಾರಯೇ ತತ್ಥ ಬಹೂಪಿ ಅಞ್ಞೇ, ತತ್ರೂಪಯಞ್ಞೂ ಕುಸಲೋ ಮುತೀಮಾ 3॥
So tāraye tattha bahūpi aññe, tatrūpayaññū kusalo mutīmā 4.
೩೨೪.
324.
ಏವಮ್ಪಿ ಯೋ ವೇದಗು ಭಾವಿತತ್ತೋ, ಬಹುಸ್ಸುತೋ ಹೋತಿ ಅವೇಧಧಮ್ಮೋ।
Evampi yo vedagu bhāvitatto, bahussuto hoti avedhadhammo;
ಸೋ ಖೋ ಪರೇ ನಿಜ್ಝಪಯೇ ಪಜಾನಂ, ಸೋತಾವಧಾನೂಪನಿಸೂಪಪನ್ನೇ॥
So kho pare nijjhapaye pajānaṃ, sotāvadhānūpanisūpapanne.
೩೨೫.
325.
ತಸ್ಮಾ ಹವೇ ಸಪ್ಪುರಿಸಂ ಭಜೇಥ, ಮೇಧಾವಿನಞ್ಚೇವ ಬಹುಸ್ಸುತಞ್ಚ।
Tasmā have sappurisaṃ bhajetha, medhāvinañceva bahussutañca;
ಅಞ್ಞಾಯ ಅತ್ಥಂ ಪಟಿಪಜ್ಜಮಾನೋ, ವಿಞ್ಞಾತಧಮ್ಮೋ ಸ ಸುಖಂ 5 ಲಭೇಥಾತಿ॥
Aññāya atthaṃ paṭipajjamāno, viññātadhammo sa sukhaṃ 6 labhethāti.
ನಾವಾಸುತ್ತಂ ಅಟ್ಠಮಂ ನಿಟ್ಠಿತಂ।
Nāvāsuttaṃ aṭṭhamaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā / ೮. ಧಮ್ಮಸುತ್ತ-(ನಾವಾಸುತ್ತ)-ವಣ್ಣನಾ • 8. Dhammasutta-(nāvāsutta)-vaṇṇanā
