| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
៨. នាវាសុត្តំ
8. Nāvāsuttaṃ
៣១៨.
318.
យស្មា ហិ ធម្មំ បុរិសោ វិជញ្ញា, ឥន្ទំវ នំ ទេវតា បូជយេយ្យ;
Yasmā hi dhammaṃ puriso vijaññā, indaṃva naṃ devatā pūjayeyya;
សោ បូជិតោ តស្មិ បសន្នចិត្តោ, ពហុស្សុតោ បាតុករោតិ ធម្មំ។
So pūjito tasmi pasannacitto, bahussuto pātukaroti dhammaṃ.
៣១៩.
319.
តទដ្ឋិកត្វាន និសម្ម ធីរោ, ធម្មានុធម្មំ បដិបជ្ជមានោ;
Tadaṭṭhikatvāna nisamma dhīro, dhammānudhammaṃ paṭipajjamāno;
វិញ្ញូ វិភាវី និបុណោ ច ហោតិ, យោ តាទិសំ ភជតិ អប្បមត្តោ។
Viññū vibhāvī nipuṇo ca hoti, yo tādisaṃ bhajati appamatto.
៣២០.
320.
ខុទ្ទញ្ច ពាលំ ឧបសេវមានោ, អនាគតត្ថញ្ច ឧសូយកញ្ច;
Khuddañca bālaṃ upasevamāno, anāgatatthañca usūyakañca;
ឥធេវ ធម្មំ អវិភាវយិត្វា, អវិតិណ្ណកង្ខោ មរណំ ឧបេតិ។
Idheva dhammaṃ avibhāvayitvā, avitiṇṇakaṅkho maraṇaṃ upeti.
៣២១.
321.
យថា នរោ អាបគមោតរិត្វា, មហោទកំ សលិលំ សីឃសោតំ;
Yathā naro āpagamotaritvā, mahodakaṃ salilaṃ sīghasotaṃ;
សោ វុយ្ហមានោ អនុសោតគាមី, កិំ សោ បរេ សក្ខតិ តារយេតុំ។
So vuyhamāno anusotagāmī, kiṃ so pare sakkhati tārayetuṃ.
៣២២.
322.
តថេវ ធម្មំ អវិភាវយិត្វា, ពហុស្សុតានំ អនិសាមយត្ថំ;
Tatheva dhammaṃ avibhāvayitvā, bahussutānaṃ anisāmayatthaṃ;
សយំ អជានំ អវិតិណ្ណកង្ខោ, កិំ សោ បរេ សក្ខតិ និជ្ឈបេតុំ។
Sayaṃ ajānaṃ avitiṇṇakaṅkho, kiṃ so pare sakkhati nijjhapetuṃ.
៣២៣.
323.
យថាបិ នាវំ ទឡ្ហមារុហិត្វា, ផិយេន 1 រិត្តេន សមង្គិភូតោ;
Yathāpi nāvaṃ daḷhamāruhitvā, phiyena 2 rittena samaṅgibhūto;
សោ តារយេ តត្ថ ពហូបិ អញ្ញេ, តត្រូបយញ្ញូ កុសលោ មុតីមា 3។
So tāraye tattha bahūpi aññe, tatrūpayaññū kusalo mutīmā 4.
៣២៤.
324.
ឯវម្បិ យោ វេទគុ ភាវិតត្តោ, ពហុស្សុតោ ហោតិ អវេធធម្មោ;
Evampi yo vedagu bhāvitatto, bahussuto hoti avedhadhammo;
សោ ខោ បរេ និជ្ឈបយេ បជានំ, សោតាវធានូបនិសូបបន្នេ។
So kho pare nijjhapaye pajānaṃ, sotāvadhānūpanisūpapanne.
៣២៥.
325.
តស្មា ហវេ សប្បុរិសំ ភជេថ, មេធាវិនញ្ចេវ ពហុស្សុតញ្ច;
Tasmā have sappurisaṃ bhajetha, medhāvinañceva bahussutañca;
អញ្ញាយ អត្ថំ បដិបជ្ជមានោ, វិញ្ញាតធម្មោ ស សុខំ 5 លភេថាតិ។
Aññāya atthaṃ paṭipajjamāno, viññātadhammo sa sukhaṃ 6 labhethāti.
នាវាសុត្តំ អដ្ឋមំ និដ្ឋិតំ។
Nāvāsuttaṃ aṭṭhamaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ៨. ធម្មសុត្ត-(នាវាសុត្ត)-វណ្ណនា • 8. Dhammasutta-(nāvāsutta)-vaṇṇanā
