| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៧. សត្តរសមវគ្គោ
17. Sattarasamavaggo
(១៦៧) ២. នត្ថិ អរហតោ អកាលមច្ចូតិកថា
(167) 2. Natthi arahato akālamaccūtikathā
៧៨០. នត្ថិ អរហតោ អកាលមច្ចូតិ? អាមន្តា។ នត្ថិ អរហន្តឃាតកោតិ? ន ហេវំ វត្តព្ពេ…បេ.… អត្ថិ អរហន្តឃាតកោតិ? អាមន្តា។ អត្ថិ អរហតោ អកាលមច្ចូតិ? ន ហេវំ វត្តព្ពេ…បេ.… នត្ថិ អរហតោ អកាលមច្ចូតិ? អាមន្តា។ យោ អរហន្តំ ជីវិតា វោរោបេតិ, សតិ ជីវិតេ ជីវិតាវសេសេ ជីវិតា វោរោបេតិ, អសតិ ជីវិតេ ជីវិតាវសេសេ ជីវិតា វោរោបេតីតិ? សតិ ជីវិតេ ជីវិតាវសេសេ ជីវិតា វោរោបេតីតិ។ ហញ្ចិ សតិ ជីវិតេ ជីវិតាវសេសេ ជីវិតា វោរោបេតិ, នោ ច វត រេ វត្តព្ពេ – ‘‘នត្ថិ អរហតោ អកាលមច្ចូ’’តិ។ អសតិ ជីវិតេ ជីវិតាវសេសេ ជីវិតា វោរោបេតីតិ, នត្ថិ អរហន្តឃាតកោតិ? ន ហេវំ វត្តព្ពេ…បេ.…។
780. Natthi arahato akālamaccūti? Āmantā. Natthi arahantaghātakoti? Na hevaṃ vattabbe…pe… atthi arahantaghātakoti? Āmantā. Atthi arahato akālamaccūti? Na hevaṃ vattabbe…pe… natthi arahato akālamaccūti? Āmantā. Yo arahantaṃ jīvitā voropeti, sati jīvite jīvitāvasese jīvitā voropeti, asati jīvite jīvitāvasese jīvitā voropetīti? Sati jīvite jīvitāvasese jīvitā voropetīti. Hañci sati jīvite jīvitāvasese jīvitā voropeti, no ca vata re vattabbe – ‘‘natthi arahato akālamaccū’’ti. Asati jīvite jīvitāvasese jīvitā voropetīti, natthi arahantaghātakoti? Na hevaṃ vattabbe…pe….
៧៨១. នត្ថិ អរហតោ អកាលមច្ចូតិ? អាមន្តា។ អរហតោ កាយេ វិសំ ន កមេយ្យ, សត្ថំ ន កមេយ្យ, អគ្គិ ន កមេយ្យាតិ? ន ហេវំ វត្តព្ពេ…បេ.… ននុ អរហតោ កាយេ វិសំ កមេយ្យ , សត្ថំ កមេយ្យ, អគ្គិ កមេយ្យាតិ? អាមន្តា។ ហញ្ចិ អរហតោ កាយេ វិសំ កមេយ្យ, សត្ថំ កមេយ្យ, អគ្គិ កមេយ្យ, នោ ច វត រេ វត្តព្ពេ – ‘‘នត្ថិ អរហតោ អកាលមច្ចូ’’តិ។
781. Natthi arahato akālamaccūti? Āmantā. Arahato kāye visaṃ na kameyya, satthaṃ na kameyya, aggi na kameyyāti? Na hevaṃ vattabbe…pe… nanu arahato kāye visaṃ kameyya , satthaṃ kameyya, aggi kameyyāti? Āmantā. Hañci arahato kāye visaṃ kameyya, satthaṃ kameyya, aggi kameyya, no ca vata re vattabbe – ‘‘natthi arahato akālamaccū’’ti.
អរហតោ កាយេ វិសំ ន កមេយ្យ, សត្ថំ ន កមេយ្យ, អគ្គិ ន កមេយ្យាតិ? អាមន្តា។ នត្ថិ អរហន្តឃាតកោតិ? ន ហេវំ វត្តព្ពេ…បេ.…។
Arahato kāye visaṃ na kameyya, satthaṃ na kameyya, aggi na kameyyāti? Āmantā. Natthi arahantaghātakoti? Na hevaṃ vattabbe…pe….
៧៨២. អត្ថិ អរហតោ អកាលមច្ចូតិ? អាមន្តា។ ននុ វុត្តំ ភគវតា – ‘‘នាហំ, ភិក្ខវេ, សញ្ចេតនិកានំ កម្មានំ កតានំ ឧបចិតានំ អប្បដិសំវេទិត្វា ព្យន្តីភាវំ វទាមិ; តញ្ច ខោ ទិដ្ឋេវ ធម្មេ ឧបបជ្ជំ វា អបរេ វា បរិយាយេ’’តិ។ អត្ថេវ សុត្តន្តោតិ? អាមន្តា ។ តេន ហិ នត្ថិ អរហតោ អកាលមច្ចូតិ។
782. Atthi arahato akālamaccūti? Āmantā. Nanu vuttaṃ bhagavatā – ‘‘nāhaṃ, bhikkhave, sañcetanikānaṃ kammānaṃ katānaṃ upacitānaṃ appaṭisaṃveditvā byantībhāvaṃ vadāmi; tañca kho diṭṭheva dhamme upapajjaṃ vā apare vā pariyāye’’ti. Attheva suttantoti? Āmantā . Tena hi natthi arahato akālamaccūti.
នត្ថិ អរហតោ អកាលមច្ចូតិកថា និដ្ឋិតា។
Natthi arahato akālamaccūtikathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ២. នត្ថិ អរហតោ អកាលមច្ចូតិកថាវណ្ណនា • 2. Natthi arahato akālamaccūtikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ២. នត្ថិអរហតោអកាលមច្ចូតិកថាវណ្ណនា • 2. Natthiarahatoakālamaccūtikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ២. នត្ថិអរហតោអកាលមច្ចូតិកថាវណ្ណនា • 2. Natthiarahatoakālamaccūtikathāvaṇṇanā
