| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೫. ನಕುಲಙ್ಗಪಞ್ಹೋ
5. Nakulaṅgapañho
೫. ‘‘ಭನ್ತೇ ನಾಗಸೇನ, ‘ನಕುಲಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ನಕುಲೋ ಉರಗಮುಪಗಚ್ಛನ್ತೋ ಭೇಸಜ್ಜೇನ ಕಾಯಂ ಪರಿಭಾವೇತ್ವಾ ಉರಗಮುಪಗಚ್ಛತಿ ಗಹೇತುಂ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಕೋಧಾಘಾತಬಹುಲಂ ಕಲಹವಿಗ್ಗಹವಿವಾದವಿರೋಧಾಭಿಭೂತಂ ಲೋಕಮುಪಗಚ್ಛನ್ತೇನ ಮೇತ್ತಾಭೇಸಜ್ಜೇನ ಮಾನಸಂ ಅನುಲಿಮ್ಪಿತಬ್ಬಂ। ಇದಂ, ಮಹಾರಾಜ, ನಕುಲಸ್ಸ ಏಕಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಸಾರಿಪುತ್ತೇನ ಧಮ್ಮಸೇನಾಪತಿನಾ –
5. ‘‘Bhante nāgasena, ‘nakulassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, nakulo uragamupagacchanto bhesajjena kāyaṃ paribhāvetvā uragamupagacchati gahetuṃ, evameva kho, mahārāja, yoginā yogāvacarena kodhāghātabahulaṃ kalahaviggahavivādavirodhābhibhūtaṃ lokamupagacchantena mettābhesajjena mānasaṃ anulimpitabbaṃ. Idaṃ, mahārāja, nakulassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘ತಸ್ಮಾ ಸಕಂ ಪರೇಸಮ್ಪಿ, ಕಾತಬ್ಬಾ ಮೇತ್ತಭಾವನಾ।
‘‘‘Tasmā sakaṃ paresampi, kātabbā mettabhāvanā;
ಮೇತ್ತಚಿತ್ತೇನ ಫರಿತಬ್ಬಂ, ಏತಂ ಬುದ್ಧಾನ ಸಾಸನ’’’ನ್ತಿ॥
Mettacittena pharitabbaṃ, etaṃ buddhāna sāsana’’’nti.
ನಕುಲಙ್ಗಪಞ್ಹೋ ಪಞ್ಚಮೋ।
Nakulaṅgapañho pañcamo.
