| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៧. សត្តរសមវគ្គោ
17. Sattarasamavaggo
(១៧៣) ៨. ន វត្តព្ពំ សង្ឃោ ភុញ្ជតីតិកថា
(173) 8. Na vattabbaṃ saṅgho bhuñjatītikathā
៧៩៥. ន វត្តព្ពំ – ‘‘សង្ឃោ ភុញ្ជតិ បិវតិ ខាទតិ សាយតី’’តិ? អាមន្តា។ ននុ អត្ថិ កេចិ សង្ឃភត្តានិ ករោន្តិ, ឧទ្ទេសភត្តានិ ករោន្តិ, យាគុបានានិ ករោន្តីតិ? អាមន្តា។ ហញ្ចិ អត្ថិ កេចិ សង្ឃភត្តានិ ករោន្តិ, ឧទ្ទេសភត្តានិ ករោន្តិ, យាគុបានានិ ករោន្តិ, តេន វត រេ វត្តព្ពេ – ‘‘សង្ឃោ ភុញ្ជតិ បិវតិ ខាទតិ សាយតី’’តិ។
795. Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu atthi keci saṅghabhattāni karonti, uddesabhattāni karonti, yāgupānāni karontīti? Āmantā. Hañci atthi keci saṅghabhattāni karonti, uddesabhattāni karonti, yāgupānāni karonti, tena vata re vattabbe – ‘‘saṅgho bhuñjati pivati khādati sāyatī’’ti.
ន វត្តព្ពំ – ‘‘សង្ឃោ ភុញ្ជតិ បិវតិ ខាទតិ សាយតី’’តិ? អាមន្តា។ ននុ វុត្តំ ភគវតា – ‘‘គណភោជនំ បរម្បរភោជនំ អតិរិត្តភោជនំ អនតិរិត្តភោជន’’ន្តិ? អាមន្តា។ ហញ្ចិ វុត្តំ ភគវតា – ‘‘គណភោជនំ បរម្បរភោជនំ អតិរិត្តភោជនំ អនតិរិត្តភោជនំ’’, តេន វត រេ វត្តព្ពេ – ‘‘សង្ឃោ ភុញ្ជតិ បិវតិ ខាទតិ សាយតី’’តិ។
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojana’’nti? Āmantā. Hañci vuttaṃ bhagavatā – ‘‘gaṇabhojanaṃ paramparabhojanaṃ atirittabhojanaṃ anatirittabhojanaṃ’’, tena vata re vattabbe – ‘‘saṅgho bhuñjati pivati khādati sāyatī’’ti.
ន វត្តព្ពំ – ‘‘សង្ឃោ ភុញ្ជតិ បិវតិ ខាទតិ សាយតី’’តិ? អាមន្តា។ ននុ អដ្ឋ បានានិ វុត្តានិ ភគវតា – អម្ពបានំ, ជម្ពុបានំ , ចោចបានំ, មោចបានំ, មធុកបានំ, 1 មុទ្ទិកបានំ, សាលុកបានំ, ផារុសកបានន្តិ? អាមន្តា។ ហញ្ចិ អដ្ឋ បានានិ វុត្តានិ ភគវតា – អម្ពបានំ, ជម្ពុបានំ, ចោចបានំ, មោចបានំ, មធុកបានំ, មុទ្ទិកបានំ , សាលុកបានំ, ផារុសកបានំ, តេន វត រេ វត្តព្ពេ – ‘‘សង្ឃោ ភុញ្ជតិ បិវតិ ខាទតិ សាយតី’’តិ។
Na vattabbaṃ – ‘‘saṅgho bhuñjati pivati khādati sāyatī’’ti? Āmantā. Nanu aṭṭha pānāni vuttāni bhagavatā – ambapānaṃ, jambupānaṃ , cocapānaṃ, mocapānaṃ, madhukapānaṃ, 2 muddikapānaṃ, sālukapānaṃ, phārusakapānanti? Āmantā. Hañci aṭṭha pānāni vuttāni bhagavatā – ambapānaṃ, jambupānaṃ, cocapānaṃ, mocapānaṃ, madhukapānaṃ, muddikapānaṃ , sālukapānaṃ, phārusakapānaṃ, tena vata re vattabbe – ‘‘saṅgho bhuñjati pivati khādati sāyatī’’ti.
៧៩៦. សង្ឃោ ភុញ្ជតិ បិវតិ ខាទតិ សាយតីតិ? អាមន្តា។ មគ្គោ ភុញ្ជតិ បិវតិ ខាទតិ សាយតិ, ផលំ ភុញ្ជតិ បិវតិ ខាទតិ សាយតីតិ? ន ហេវំ វត្តព្ពេ…បេ.…។
796. Saṅgho bhuñjati pivati khādati sāyatīti? Āmantā. Maggo bhuñjati pivati khādati sāyati, phalaṃ bhuñjati pivati khādati sāyatīti? Na hevaṃ vattabbe…pe….
ន វត្តព្ពំ សង្ឃោ ភុញ្ជតីតិកថា និដ្ឋិតា។
Na vattabbaṃ saṅgho bhuñjatītikathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៨. ន វត្តព្ពំ សង្ឃោ ភុញ្ជតីតិកថាវណ្ណនា • 8. Na vattabbaṃ saṅgho bhuñjatītikathāvaṇṇanā
