| Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi |
೩೭೨. ಮಿಗಪೋತಕಜಾತಕಂ (೫-೩-೨)
372. Migapotakajātakaṃ (5-3-2)
೧೧೬.
116.
ಅಗಾರಾ ಪಚ್ಚುಪೇತಸ್ಸ, ಅನಗಾರಸ್ಸ ತೇ ಸತೋ।
Agārā paccupetassa, anagārassa te sato;
ಸಮಣಸ್ಸ ನ ತಂ ಸಾಧು, ಯಂ ಪೇತಮನುಸೋಚಸಿ॥
Samaṇassa na taṃ sādhu, yaṃ petamanusocasi.
೧೧೭.
117.
ಸಂವಾಸೇನ ಹವೇ ಸಕ್ಕ, ಮನುಸ್ಸಸ್ಸ ಮಿಗಸ್ಸ ವಾ।
Saṃvāsena have sakka, manussassa migassa vā;
ಹದಯೇ ಜಾಯತೇ ಪೇಮಂ, ನ ತಂ ಸಕ್ಕಾ ಅಸೋಚಿತುಂ॥
Hadaye jāyate pemaṃ, na taṃ sakkā asocituṃ.
೧೧೮.
118.
ಮತಂ ಮರಿಸ್ಸಂ ರೋದನ್ತಿ, ಯೇ ರುದನ್ತಿ ಲಪನ್ತಿ ಚ।
Mataṃ marissaṃ rodanti, ye rudanti lapanti ca;
ತಸ್ಮಾ ತ್ವಂ ಇಸಿ ಮಾ ರೋದಿ, ರೋದಿತಂ ಮೋಘಮಾಹು ಸನ್ತೋ॥
Tasmā tvaṃ isi mā rodi, roditaṃ moghamāhu santo.
೧೧೯.
119.
ರೋದಿತೇನ ಹವೇ ಬ್ರಹ್ಮೇ, ಮತೋ ಪೇತೋ ಸಮುಟ್ಠಹೇ।
Roditena have brahme, mato peto samuṭṭhahe;
ಸಬ್ಬೇ ಸಙ್ಗಮ್ಮ ರೋದಾಮ, ಅಞ್ಞಮಞ್ಞಸ್ಸ ಞಾತಕೇ॥
Sabbe saṅgamma rodāma, aññamaññassa ñātake.
೧೨೦.
120.
ಆದಿತ್ತಂ ವತ ಮಂ ಸನ್ತಂ, ಘತಸಿತ್ತಂವ ಪಾವಕಂ।
Ādittaṃ vata maṃ santaṃ, ghatasittaṃva pāvakaṃ;
ವಾರಿನಾ ವಿಯ ಓಸಿಞ್ಚಂ, ಸಬ್ಬಂ ನಿಬ್ಬಾಪಯೇ ದರಂ॥
Vārinā viya osiñcaṃ, sabbaṃ nibbāpaye daraṃ.
೧೨೧.
121.
ಅಬ್ಬಹಿ ವತ ಮೇ ಸಲ್ಲಂ, ಯಮಾಸಿ ಹದಯಸ್ಸಿತಂ।
Abbahi vata me sallaṃ, yamāsi hadayassitaṃ;
ಯೋ ಮೇ ಸೋಕಪರೇತಸ್ಸ, ಪುತ್ತಸೋಕಂ ಅಪಾನುದಿ॥
Yo me sokaparetassa, puttasokaṃ apānudi.
೧೨೨.
122.
ಸೋಹಂ ಅಬ್ಬೂಳ್ಹಸಲ್ಲೋಸ್ಮಿ, ವೀತಸೋಕೋ ಅನಾವಿಲೋ।
Sohaṃ abbūḷhasallosmi, vītasoko anāvilo;
ನ ಸೋಚಾಮಿ ನ ರೋದಾಮಿ, ತವ ಸುತ್ವಾನ ವಾಸವಾತಿ॥
Na socāmi na rodāmi, tava sutvāna vāsavāti.
ಮಿಗಪೋತಕಜಾತಕಂ ದುತಿಯಂ।
Migapotakajātakaṃ dutiyaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೩೭೨] ೨. ಮಿಗಪೋತಕಜಾತಕವಣ್ಣನಾ • [372] 2. Migapotakajātakavaṇṇanā
