| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತಪಾಳಿ • Suttanipātapāḷi |
೧೩. ಮಹಾಬ್ಯೂಹಸುತ್ತಂ
13. Mahābyūhasuttaṃ
೯೦೧.
901.
ಯೇ ಕೇಚಿಮೇ ದಿಟ್ಠಿಪರಿಬ್ಬಸಾನಾ, ಇದಮೇವ ಸಚ್ಚನ್ತಿ ವಿವಾದಯನ್ತಿ 1।
Ye kecime diṭṭhiparibbasānā, idameva saccanti vivādayanti 2;
ಸಬ್ಬೇವ ತೇ ನಿನ್ದಮನ್ವಾನಯನ್ತಿ, ಅಥೋ ಪಸಂಸಮ್ಪಿ ಲಭನ್ತಿ ತತ್ಥ॥
Sabbeva te nindamanvānayanti, atho pasaṃsampi labhanti tattha.
೯೦೨.
902.
ಅಪ್ಪಞ್ಹಿ ಏತಂ ನ ಅಲಂ ಸಮಾಯ, ದುವೇ ವಿವಾದಸ್ಸ ಫಲಾನಿ ಬ್ರೂಮಿ।
Appañhi etaṃ na alaṃ samāya, duve vivādassa phalāni brūmi;
ಏತಮ್ಪಿ ದಿಸ್ವಾ ನ ವಿವಾದಯೇಥ, ಖೇಮಾಭಿಪಸ್ಸಂ ಅವಿವಾದಭೂಮಿಂ॥
Etampi disvā na vivādayetha, khemābhipassaṃ avivādabhūmiṃ.
೯೦೩.
903.
ಯಾ ಕಾಚಿಮಾ ಸಮ್ಮುತಿಯೋ ಪುಥುಜ್ಜಾ, ಸಬ್ಬಾವ ಏತಾ ನ ಉಪೇತಿ ವಿದ್ವಾ।
Yā kācimā sammutiyo puthujjā, sabbāva etā na upeti vidvā;
ಅನೂಪಯೋ ಸೋ ಉಪಯಂ ಕಿಮೇಯ್ಯ, ದಿಟ್ಠೇ ಸುತೇ ಖನ್ತಿಮಕುಬ್ಬಮಾನೋ॥
Anūpayo so upayaṃ kimeyya, diṭṭhe sute khantimakubbamāno.
೯೦೪.
904.
ಸೀಲುತ್ತಮಾ ಸಞ್ಞಮೇನಾಹು ಸುದ್ಧಿಂ, ವತಂ ಸಮಾದಾಯ ಉಪಟ್ಠಿತಾಸೇ।
Sīluttamā saññamenāhu suddhiṃ, vataṃ samādāya upaṭṭhitāse;
ಇಧೇವ ಸಿಕ್ಖೇಮ ಅಥಸ್ಸ ಸುದ್ಧಿಂ, ಭವೂಪನೀತಾ ಕುಸಲಾ ವದಾನಾ॥
Idheva sikkhema athassa suddhiṃ, bhavūpanītā kusalā vadānā.
೯೦೫.
905.
ಸಚೇ ಚುತೋ ಸೀಲವತತೋ ಹೋತಿ, ಪವೇಧತೀ 3 ಕಮ್ಮ ವಿರಾಧಯಿತ್ವಾ।
Sace cuto sīlavatato hoti, pavedhatī 4 kamma virādhayitvā;
ಪಜಪ್ಪತೀ ಪತ್ಥಯತೀ ಚ ಸುದ್ಧಿಂ, ಸತ್ಥಾವ ಹೀನೋ ಪವಸಂ ಘರಮ್ಹಾ॥
Pajappatī patthayatī ca suddhiṃ, satthāva hīno pavasaṃ gharamhā.
೯೦೬.
906.
ಸೀಲಬ್ಬತಂ ವಾಪಿ ಪಹಾಯ ಸಬ್ಬಂ, ಕಮ್ಮಞ್ಚ ಸಾವಜ್ಜನವಜ್ಜಮೇತಂ।
Sīlabbataṃ vāpi pahāya sabbaṃ, kammañca sāvajjanavajjametaṃ;
ಸುದ್ಧಿಂ ಅಸುದ್ಧಿನ್ತಿ ಅಪತ್ಥಯಾನೋ, ವಿರತೋ ಚರೇ ಸನ್ತಿಮನುಗ್ಗಹಾಯ॥
Suddhiṃ asuddhinti apatthayāno, virato care santimanuggahāya.
೯೦೭.
907.
ತಮೂಪನಿಸ್ಸಾಯ ಜಿಗುಚ್ಛಿತಂ ವಾ, ಅಥವಾಪಿ ದಿಟ್ಠಂ ವ ಸುತಂ ಮುತಂ ವಾ।
Tamūpanissāya jigucchitaṃ vā, athavāpi diṭṭhaṃ va sutaṃ mutaṃ vā;
ಉದ್ಧಂಸರಾ ಸುದ್ಧಿಮನುತ್ಥುನನ್ತಿ, ಅವೀತತಣ್ಹಾಸೇ ಭವಾಭವೇಸು॥
Uddhaṃsarā suddhimanutthunanti, avītataṇhāse bhavābhavesu.
೯೦೮.
908.
ಪತ್ಥಯಮಾನಸ್ಸ ಹಿ ಜಪ್ಪಿತಾನಿ, ಪವೇಧಿತಂ ವಾಪಿ ಪಕಪ್ಪಿತೇಸು।
Patthayamānassa hi jappitāni, pavedhitaṃ vāpi pakappitesu;
ಚುತೂಪಪಾತೋ ಇಧ ಯಸ್ಸ ನತ್ಥಿ, ಸ ಕೇನ ವೇಧೇಯ್ಯ ಕುಹಿಂವ ಜಪ್ಪೇ 5॥
Cutūpapāto idha yassa natthi, sa kena vedheyya kuhiṃva jappe 6.
೯೦೯.
909.
ಯಮಾಹು ಧಮ್ಮಂ ಪರಮನ್ತಿ ಏಕೇ, ತಮೇವ ಹೀನನ್ತಿ ಪನಾಹು ಅಞ್ಞೇ।
Yamāhu dhammaṃ paramanti eke, tameva hīnanti panāhu aññe;
ಸಚ್ಚೋ ನು ವಾದೋ ಕತಮೋ ಇಮೇಸಂ, ಸಬ್ಬೇವ ಹೀಮೇ ಕುಸಲಾ ವದಾನಾ॥
Sacco nu vādo katamo imesaṃ, sabbeva hīme kusalā vadānā.
೯೧೦.
910.
ಸಕಞ್ಹಿ ಧಮ್ಮಂ ಪರಿಪುಣ್ಣಮಾಹು, ಅಞ್ಞಸ್ಸ ಧಮ್ಮಂ ಪನ ಹೀನಮಾಹು।
Sakañhi dhammaṃ paripuṇṇamāhu, aññassa dhammaṃ pana hīnamāhu;
ಏವಮ್ಪಿ ವಿಗ್ಗಯ್ಹ ವಿವಾದಯನ್ತಿ, ಸಕಂ ಸಕಂ ಸಮ್ಮುತಿಮಾಹು ಸಚ್ಚಂ॥
Evampi viggayha vivādayanti, sakaṃ sakaṃ sammutimāhu saccaṃ.
೯೧೧.
911.
ಪರಸ್ಸ ಚೇ ವಮ್ಭಯಿತೇನ ಹೀನೋ, ನ ಕೋಚಿ ಧಮ್ಮೇಸು ವಿಸೇಸಿ ಅಸ್ಸ।
Parassa ce vambhayitena hīno, na koci dhammesu visesi assa;
ಪುಥೂ ಹಿ ಅಞ್ಞಸ್ಸ ವದನ್ತಿ ಧಮ್ಮಂ, ನಿಹೀನತೋ ಸಮ್ಹಿ ದಳ್ಹಂ ವದಾನಾ॥
Puthū hi aññassa vadanti dhammaṃ, nihīnato samhi daḷhaṃ vadānā.
೯೧೨.
912.
ಸದ್ಧಮ್ಮಪೂಜಾಪಿ ನೇಸಂ ತಥೇವ, ಯಥಾ ಪಸಂಸನ್ತಿ ಸಕಾಯನಾನಿ।
Saddhammapūjāpi nesaṃ tatheva, yathā pasaṃsanti sakāyanāni;
೯೧೩.
913.
ನ ಬ್ರಾಹ್ಮಣಸ್ಸ ಪರನೇಯ್ಯಮತ್ಥಿ, ಧಮ್ಮೇಸು ನಿಚ್ಛೇಯ್ಯ ಸಮುಗ್ಗಹೀತಂ।
Na brāhmaṇassa paraneyyamatthi, dhammesu niccheyya samuggahītaṃ;
ತಸ್ಮಾ ವಿವಾದಾನಿ ಉಪಾತಿವತ್ತೋ, ನ ಹಿ ಸೇಟ್ಠತೋ ಪಸ್ಸತಿ ಧಮ್ಮಮಞ್ಞಂ॥
Tasmā vivādāni upātivatto, na hi seṭṭhato passati dhammamaññaṃ.
೯೧೪.
914.
ಜಾನಾಮಿ ಪಸ್ಸಾಮಿ ತಥೇವ ಏತಂ, ದಿಟ್ಠಿಯಾ ಏಕೇ ಪಚ್ಚೇನ್ತಿ ಸುದ್ಧಿಂ।
Jānāmi passāmi tatheva etaṃ, diṭṭhiyā eke paccenti suddhiṃ;
ಅದ್ದಕ್ಖಿ ಚೇ ಕಿಞ್ಹಿ ತುಮಸ್ಸ ತೇನ, ಅತಿಸಿತ್ವಾ ಅಞ್ಞೇನ ವದನ್ತಿ ಸುದ್ಧಿಂ॥
Addakkhi ce kiñhi tumassa tena, atisitvā aññena vadanti suddhiṃ.
೯೧೫.
915.
ಪಸ್ಸಂ ನರೋ ದಕ್ಖತಿ 11 ನಾಮರೂಪಂ, ದಿಸ್ವಾನ ವಾ ಞಸ್ಸತಿ ತಾನಿಮೇವ।
Passaṃ naro dakkhati 12 nāmarūpaṃ, disvāna vā ñassati tānimeva;
ಕಾಮಂ ಬಹುಂ ಪಸ್ಸತು ಅಪ್ಪಕಂ ವಾ, ನ ಹಿ ತೇನ ಸುದ್ಧಿಂ ಕುಸಲಾ ವದನ್ತಿ॥
Kāmaṃ bahuṃ passatu appakaṃ vā, na hi tena suddhiṃ kusalā vadanti.
೯೧೬.
916.
ನಿವಿಸ್ಸವಾದೀ ನ ಹಿ ಸುಬ್ಬಿನಾಯೋ, ಪಕಪ್ಪಿತಂ ದಿಟ್ಠಿ ಪುರೇಕ್ಖರಾನೋ।
Nivissavādī na hi subbināyo, pakappitaṃ diṭṭhi purekkharāno;
ಯಂ ನಿಸ್ಸಿತೋ ತತ್ಥ ಸುಭಂ ವದಾನೋ, ಸುದ್ಧಿಂವದೋ ತತ್ಥ ತಥದ್ದಸಾ ಸೋ॥
Yaṃ nissito tattha subhaṃ vadāno, suddhiṃvado tattha tathaddasā so.
೯೧೭.
917.
ನ ಬ್ರಾಹ್ಮಣೋ ಕಪ್ಪಮುಪೇತಿ ಸಙ್ಖಾ 13, ನ ದಿಟ್ಠಿಸಾರೀ ನಪಿ ಞಾಣಬನ್ಧು।
Na brāhmaṇo kappamupeti saṅkhā 14, na diṭṭhisārī napi ñāṇabandhu;
ಞತ್ವಾ ಚ ಸೋ ಸಮ್ಮುತಿಯೋ 15 ಪುಥುಜ್ಜಾ, ಉಪೇಕ್ಖತೀ ಉಗ್ಗಹಣನ್ತಿ ಮಞ್ಞೇ॥
Ñatvā ca so sammutiyo 16 puthujjā, upekkhatī uggahaṇanti maññe.
೯೧೮.
918.
ವಿಸ್ಸಜ್ಜ ಗನ್ಥಾನಿ ಮುನೀಧ ಲೋಕೇ, ವಿವಾದಜಾತೇಸು ನ ವಗ್ಗಸಾರೀ।
Vissajja ganthāni munīdha loke, vivādajātesu na vaggasārī;
ಸನ್ತೋ ಅಸನ್ತೇಸು ಉಪೇಕ್ಖಕೋ ಸೋ, ಅನುಗ್ಗಹೋ ಉಗ್ಗಹಣನ್ತಿ ಮಞ್ಞೇ॥
Santo asantesu upekkhako so, anuggaho uggahaṇanti maññe.
೯೧೯.
919.
ಪುಬ್ಬಾಸವೇ ಹಿತ್ವಾ ನವೇ ಅಕುಬ್ಬಂ, ನ ಛನ್ದಗೂ ನೋಪಿ ನಿವಿಸ್ಸವಾದೀ।
Pubbāsave hitvā nave akubbaṃ, na chandagū nopi nivissavādī;
ಸ ವಿಪ್ಪಮುತ್ತೋ ದಿಟ್ಠಿಗತೇಹಿ ಧೀರೋ, ನ ಲಿಮ್ಪತಿ 17 ಲೋಕೇ ಅನತ್ತಗರಹೀ॥
Sa vippamutto diṭṭhigatehi dhīro, na limpati 18 loke anattagarahī.
೯೨೦.
920.
ಸ ಸಬ್ಬಧಮ್ಮೇಸು ವಿಸೇನಿಭೂತೋ, ಯಂ ಕಿಞ್ಚಿ ದಿಟ್ಠಂ ವ ಸುತಂ ಮುತಂ ವಾ।
Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
ಸ ಪನ್ನಭಾರೋ ಮುನಿ ವಿಪ್ಪಮುತ್ತೋ, ನ ಕಪ್ಪಿಯೋ ನೂಪರತೋ ನ ಪತ್ಥಿಯೋತಿ॥
Sa pannabhāro muni vippamutto, na kappiyo nūparato na patthiyoti.
ಮಹಾಬ್ಯೂಹಸುತ್ತಂ ತೇರಸಮಂ ನಿಟ್ಠಿತಂ।
Mahābyūhasuttaṃ terasamaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā / ೧೩. ಮಹಾಬ್ಯೂಹಸುತ್ತವಣ್ಣನಾ • 13. Mahābyūhasuttavaṇṇanā
