៥. មាឃសុត្តំ

5. Māghasuttaṃ

ឯវំ មេ សុតំ – ឯក សមយំ ភគវា រាជគហេ វិហរតិ គិជ្ឈកូដេ បព្ពតេ។ អថ ខោ មាឃោ មាណវោ យេន ភគវា តេនុបសង្កមិ; ឧបសង្កមិត្វា ភគវតា សទ្ធិំ សម្មោទិ។ សម្មោទនីយំ កថំ សារណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ មាឃោ មាណវោ ភគវន្តំ ឯតទវោច –

Evaṃ me sutaṃ – eka samayaṃ bhagavā rājagahe viharati gijjhakūṭe pabbate. Atha kho māgho māṇavo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho māgho māṇavo bhagavantaṃ etadavoca –

‘‘អហញ្ហិ, ភោ គោតម, ទាយកោ ទានបតិ វទញ្ញូ យាចយោគោ; ធម្មេន ភោគេ បរិយេសាមិ; ធម្មេន ភោគេ បរិយេសិត្វា ធម្មលទ្ធេហិ ភោគេហិ ធម្មាធិគតេហិ ឯកស្សបិ ទទាមិ ទ្វិន្នម្បិ តិណ្ណម្បិ ចតុន្នម្បិ បញ្ចន្នម្បិ ឆន្នម្បិ សត្តន្នម្បិ អដ្ឋន្នម្បិ នវន្នម្បិ ទសន្នម្បិ ទទាមិ, វីសាយបិ តិំសាយបិ ចត្តាលីសាយបិ បញ្ញាសាយបិ ទទាមិ, សតស្សបិ ទទាមិ, ភិយ្យោបិ ទទាមិ។ កច្ចាហំ, ភោ គោតម, ឯវំ ទទន្តោ ឯវំ យជន្តោ ពហុំ បុញ្ញំ បសវាមី’’តិ ?

‘‘Ahañhi, bho gotama, dāyako dānapati vadaññū yācayogo; dhammena bhoge pariyesāmi; dhammena bhoge pariyesitvā dhammaladdhehi bhogehi dhammādhigatehi ekassapi dadāmi dvinnampi tiṇṇampi catunnampi pañcannampi channampi sattannampi aṭṭhannampi navannampi dasannampi dadāmi, vīsāyapi tiṃsāyapi cattālīsāyapi paññāsāyapi dadāmi, satassapi dadāmi, bhiyyopi dadāmi. Kaccāhaṃ, bho gotama, evaṃ dadanto evaṃ yajanto bahuṃ puññaṃ pasavāmī’’ti ?

‘‘តគ្ឃ ត្វំ, មាណវ, ឯវំ ទទន្តោ ឯវំ យជន្តោ ពហុំ បុញ្ញំ បសវសិ។ យោ ខោ, មាណវ, ទាយកោ ទានបតិ វទញ្ញូ យាចយោគោ; ធម្មេន ភោគេ បរិយេសតិ; ធម្មេន ភោគេ បរិយេសិត្វា ធម្មលទ្ធេហិ ភោគេហិ ធម្មាធិគតេហិ ឯកស្សបិ ទទាតិ…បេ.… សតស្សបិ ទទាតិ, ភិយ្យោបិ ទទាតិ, ពហុំ សោ បុញ្ញំ បសវតី’’តិ។ អថ ខោ មាឃោ មាណវោ ភគវន្តំ គាថាយ អជ្ឈភាសិ –

‘‘Taggha tvaṃ, māṇava, evaṃ dadanto evaṃ yajanto bahuṃ puññaṃ pasavasi. Yo kho, māṇava, dāyako dānapati vadaññū yācayogo; dhammena bhoge pariyesati; dhammena bhoge pariyesitvā dhammaladdhehi bhogehi dhammādhigatehi ekassapi dadāti…pe… satassapi dadāti, bhiyyopi dadāti, bahuṃ so puññaṃ pasavatī’’ti. Atha kho māgho māṇavo bhagavantaṃ gāthāya ajjhabhāsi –

៤៩១.

491.

‘‘បុច្ឆាមហំ គោតមំ វទញ្ញុំ, (ឥតិ មាឃោ មាណវោ)

‘‘Pucchāmahaṃ gotamaṃ vadaññuṃ, (iti māgho māṇavo)

កាសាយវាសិំ អគហំ ¹ ចរន្តំ;

Kāsāyavāsiṃ agahaṃ ² carantaṃ;

យោ យាចយោគោ ទានបតិ ³ គហដ្ឋោ, បុញ្ញត្ថិកោ ⁴ យជតិ បុញ្ញបេក្ខោ;

Yo yācayogo dānapati ⁵ gahaṭṭho, puññatthiko ⁶ yajati puññapekkho;

ទទំ បរេសំ ឥធ អន្នបានំ, កថំ ហុតំ យជមានស្ស សុជ្ឈេ’’។

Dadaṃ paresaṃ idha annapānaṃ, kathaṃ hutaṃ yajamānassa sujjhe’’.

៤៩២.

492.

‘‘យោ យាចយោគោ ទានបតិ គហដ្ឋោ, (មាឃាតិ ភគវា)

‘‘Yo yācayogo dānapati gahaṭṭho, (māghāti bhagavā)

បុញ្ញត្ថិកោ យជតិ បុញ្ញបេក្ខោ;

Puññatthiko yajati puññapekkho;

ទទំ បរេសំ ឥធ អន្នបានំ, អារាធយេ ទក្ខិណេយ្យេភិ តាទិ’’។

Dadaṃ paresaṃ idha annapānaṃ, ārādhaye dakkhiṇeyyebhi tādi’’.

៤៩៣.

493.

‘‘យោ យាចយោគោ ទានបតិ គហដ្ឋោ, (ឥតិ មាឃោ មាណវោ)

‘‘Yo yācayogo dānapati gahaṭṭho, (iti māgho māṇavo)

បុញ្ញត្ថិកោ យជតិ បុញ្ញបេក្ខោ;

Puññatthiko yajati puññapekkho;

ទទំ បរេសំ ឥធ អន្នបានំ, អក្ខាហិ មេ ភគវា ទក្ខិណេយ្យេ’’។

Dadaṃ paresaṃ idha annapānaṃ, akkhāhi me bhagavā dakkhiṇeyye’’.

៤៩៤.

494.

‘‘យេ វេ អសត្តា ⁷ វិចរន្តិ លោកេ, អកិញ្ចនា កេវលិនោ យតត្តា;

‘‘Ye ve asattā ⁸ vicaranti loke, akiñcanā kevalino yatattā;