| Library / Tipiṭaka / তিপিটক • Tipiṭaka / জাতকপাল়ি • Jātakapāḷi |
৩৫৭. লটুকিকজাতকং (৫-১-৭)
357. Laṭukikajātakaṃ (5-1-7)
৩৯.
39.
ৰন্দামি তং কুঞ্জর সট্ঠিহাযনং, আরঞ্ঞকং যূথপতিং যসস্সিং।
Vandāmi taṃ kuñjara saṭṭhihāyanaṃ, āraññakaṃ yūthapatiṃ yasassiṃ;
পক্খেহি তং পঞ্জলিকং করোমি, মা মে ৰধী পুত্তকে দুব্বলায॥
Pakkhehi taṃ pañjalikaṃ karomi, mā me vadhī puttake dubbalāya.
৪০.
40.
ৰন্দামি তং কুঞ্জর একচারিং, আরঞ্ঞকং পব্বতসানুগোচরং।
Vandāmi taṃ kuñjara ekacāriṃ, āraññakaṃ pabbatasānugocaraṃ;
পক্খেহি তং পঞ্জলিকং করোমি, মা মে ৰধী পুত্তকে দুব্বলায।
Pakkhehi taṃ pañjalikaṃ karomi, mā me vadhī puttake dubbalāya;
৪১.
41.
ৰমিস্সামি তে লটুকিকে পুত্তকানি, কিং মে তুৰং কাহসি দুব্বলাসি।
Vamissāmi te laṭukike puttakāni, kiṃ me tuvaṃ kāhasi dubbalāsi;
সতং সহস্সানিপি তাদিসীনং, ৰামেন পাদেন পপোথযেয্যং॥
Sataṃ sahassānipi tādisīnaṃ, vāmena pādena papothayeyyaṃ.
৪২.
42.
ন হেৰ সব্বত্থ বলেন কিচ্চং, বলঞ্হি বালস্স ৰধায হোতি।
Na heva sabbattha balena kiccaṃ, balañhi bālassa vadhāya hoti;
করিস্সামি তে নাগরাজা অনত্থং, যো মে ৰধী পুত্তকে দুব্বলায॥
Karissāmi te nāgarājā anatthaṃ, yo me vadhī puttake dubbalāya.
৪৩.
43.
কাকঞ্চ পস্স লটুকিকং, মণ্ডূকং নীলমক্খিকং।
Kākañca passa laṭukikaṃ, maṇḍūkaṃ nīlamakkhikaṃ;
এতে নাগং অঘাতেসুং, পস্স ৰেরস্স ৰেরিনং।
Ete nāgaṃ aghātesuṃ, passa verassa verinaṃ;
তস্মা হি ৰেরং ন কযিরাথ, অপ্পিযেনপি কেনচীতি॥
Tasmā hi veraṃ na kayirātha, appiyenapi kenacīti.
লটুকিকজাতকং সত্তমং।
Laṭukikajātakaṃ sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / জাতক-অট্ঠকথা • Jātaka-aṭṭhakathā / [৩৫৭] ৭. লটুকিকজাতকৰণ্ণনা • [357] 7. Laṭukikajātakavaṇṇanā
