| Library / Tipiṭaka / តិបិដក • Tipiṭaka / បេតវត្ថុបាឡិ • Petavatthupāḷi |
៥. កុមារបេតវត្ថុ
5. Kumārapetavatthu
៤៥៣.
453.
អច្ឆេររូបំ សុគតស្ស ញាណំ, សត្ថា យថា បុគ្គលំ ព្យាកាសិ;
Accherarūpaṃ sugatassa ñāṇaṃ, satthā yathā puggalaṃ byākāsi;
ឧស្សន្នបុញ្ញាបិ ភវន្តិ ហេកេ, បរិត្តបុញ្ញាបិ ភវន្តិ ហេកេ។
Ussannapuññāpi bhavanti heke, parittapuññāpi bhavanti heke.
៤៥៤.
454.
អយំ កុមារោ សីវថិកាយ ឆឌ្ឌិតោ, អង្គុដ្ឋស្នេហេន យាបេតិ រត្តិំ;
Ayaṃ kumāro sīvathikāya chaḍḍito, aṅguṭṭhasnehena yāpeti rattiṃ;
ន យក្ខភូតា ន សរីសបា 1 វា, វិហេឋយេយ្យុំ កតបុញ្ញំ កុមារំ។
Na yakkhabhūtā na sarīsapā 2 vā, viheṭhayeyyuṃ katapuññaṃ kumāraṃ.
៤៥៥.
455.
សុនខាបិមស្ស បលិហិំសុ បាទេ, ធង្កា សិង្គាលា 3 បរិវត្តយន្តិ;
Sunakhāpimassa palihiṃsu pāde, dhaṅkā siṅgālā 4 parivattayanti;
គព្ភាសយំ បក្ខិគណា ហរន្តិ, កាកា បន អក្ខិមលំ ហរន្តិ។
Gabbhāsayaṃ pakkhigaṇā haranti, kākā pana akkhimalaṃ haranti.
៤៥៦.
456.
នយិមស្ស 5 រក្ខំ វិទហិំសុ កេចិ, ន ឱសធំ សាសបធូបនំ វា;
Nayimassa 6 rakkhaṃ vidahiṃsu keci, na osadhaṃ sāsapadhūpanaṃ vā;
នក្ខត្តយោគម្បិ ន អគ្គហេសុំ 7, ន សព្ពធញ្ញានិបិ អាកិរិំសុ។
Nakkhattayogampi na aggahesuṃ 8, na sabbadhaññānipi ākiriṃsu.
៤៥៧.
457.
ឯតាទិសំ ឧត្តមកិច្ឆបត្តំ, រត្តាភតំ សីវថិកាយ ឆឌ្ឌិតំ;
Etādisaṃ uttamakicchapattaṃ, rattābhataṃ sīvathikāya chaḍḍitaṃ;
នោនីតបិណ្ឌំវ បវេធមានំ, សសំសយំ ជីវិតសាវសេសំ។
Nonītapiṇḍaṃva pavedhamānaṃ, sasaṃsayaṃ jīvitasāvasesaṃ.
៤៥៨.
458.
តមទ្ទសា ទេវមនុស្សបូជិតោ, ទិស្វា ច តំ ព្យាករិ ភូរិបញ្ញោ;
Tamaddasā devamanussapūjito, disvā ca taṃ byākari bhūripañño;
‘‘អយំ កុមារោ នគរស្សិមស្ស, អគ្គកុលិកោ ភវិស្សតិ ភោគតោ ច’’ 9។
‘‘Ayaṃ kumāro nagarassimassa, aggakuliko bhavissati bhogato ca’’ 10.
៤៥៩.
459.
‘‘កិស្ស 11 វតំ កិំ បន ព្រហ្មចរិយំ, កិស្ស សុចិណ្ណស្ស អយំ វិបាកោ;
‘‘Kissa 12 vataṃ kiṃ pana brahmacariyaṃ, kissa suciṇṇassa ayaṃ vipāko;
ឯតាទិសំ ព្យសនំ បាបុណិត្វា, តំ តាទិសំ បច្ចនុភោស្សតិទ្ធិ’’ន្តិ។
Etādisaṃ byasanaṃ pāpuṇitvā, taṃ tādisaṃ paccanubhossatiddhi’’nti.
៤៦០.
460.
ពុទ្ធបមុខស្ស ភិក្ខុសង្ឃស្ស, បូជំ អកាសិ ជនតា ឧឡារំ;
Buddhapamukhassa bhikkhusaṅghassa, pūjaṃ akāsi janatā uḷāraṃ;
តត្រស្ស ចិត្តស្សហុ អញ្ញថត្តំ, វាចំ អភាសិ ផរុសំ អសព្ភំ។
Tatrassa cittassahu aññathattaṃ, vācaṃ abhāsi pharusaṃ asabbhaṃ.
៤៦១.
461.
សោ តំ វិតក្កំ បវិនោទយិត្វា, បីតិំ បសាទំ បដិលទ្ធា បច្ឆា;
So taṃ vitakkaṃ pavinodayitvā, pītiṃ pasādaṃ paṭiladdhā pacchā;
តថាគតំ ជេតវនេ វសន្តំ, យាគុយា ឧបដ្ឋាសិ សត្តរត្តំ។
Tathāgataṃ jetavane vasantaṃ, yāguyā upaṭṭhāsi sattarattaṃ.
៤៦២.
462.
តស្ស 13 វតំ តំ បន ព្រហ្មចរិយំ, តស្ស សុចិណ្ណស្ស អយំ វិបាកោ;
Tassa 14 vataṃ taṃ pana brahmacariyaṃ, tassa suciṇṇassa ayaṃ vipāko;
ឯតាទិសំ ព្យសនំ បាបុណិត្វា, តំ តាទិសំ បច្ចនុភោស្សតិទ្ធិំ។
Etādisaṃ byasanaṃ pāpuṇitvā, taṃ tādisaṃ paccanubhossatiddhiṃ.
៤៦៣.
463.
ឋត្វាន សោ វស្សសតំ ឥធេវ, សព្ពេហិ កាមេហិ សមង្គិភូតោ;
Ṭhatvāna so vassasataṃ idheva, sabbehi kāmehi samaṅgibhūto;
កាយស្ស ភេទា អភិសម្បរាយំ, សហព្យតំ គច្ឆតិ វាសវស្សាតិ។
Kāyassa bhedā abhisamparāyaṃ, sahabyataṃ gacchati vāsavassāti.
កុមារបេតវត្ថុ បញ្ចមំ។
Kumārapetavatthu pañcamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បេតវត្ថុ-អដ្ឋកថា • Petavatthu-aṭṭhakathā / ៥. កុមារបេតវត្ថុវណ្ណនា • 5. Kumārapetavatthuvaṇṇanā
