| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
៤. កុល្លត្ថេរគាថា
4. Kullattheragāthā
៣៩៣.
393.
‘‘កុល្លោ សិវថិកំ គន្ត្វា, អទ្ទស ឥត្ថិមុជ្ឈិតំ;
‘‘Kullo sivathikaṃ gantvā, addasa itthimujjhitaṃ;
អបវិទ្ធំ សុសានស្មិំ, ខជ្ជន្តិំ កិមិហី ផុដំ។
Apaviddhaṃ susānasmiṃ, khajjantiṃ kimihī phuṭaṃ.
៣៩៤.
394.
‘‘អាតុរំ អសុចិំ បូតិំ, បស្ស កុល្ល សមុស្សយំ;
‘‘Āturaṃ asuciṃ pūtiṃ, passa kulla samussayaṃ;
ឧគ្ឃរន្តំ បគ្ឃរន្តំ, ពាលានំ អភិនន្ទិតំ។
Uggharantaṃ paggharantaṃ, bālānaṃ abhinanditaṃ.
៣៩៥.
395.
‘‘ធម្មាទាសំ គហេត្វាន, ញាណទស្សនបត្តិយា;
‘‘Dhammādāsaṃ gahetvāna, ñāṇadassanapattiyā;
បច្ចវេក្ខិំ ឥមំ កាយំ, តុច្ឆំ សន្តរពាហិរំ។
Paccavekkhiṃ imaṃ kāyaṃ, tucchaṃ santarabāhiraṃ.
៣៩៦.
396.
‘‘យថា ឥទំ តថា ឯតំ, យថា ឯតំ តថា ឥទំ;
‘‘Yathā idaṃ tathā etaṃ, yathā etaṃ tathā idaṃ;
យថា អធោ តថា ឧទ្ធំ, យថា ឧទ្ធំ តថា អធោ។
Yathā adho tathā uddhaṃ, yathā uddhaṃ tathā adho.
៣៩៧.
397.
‘‘យថា ទិវា តថា រត្តិំ, យថា រត្តិំ តថា ទិវា;
‘‘Yathā divā tathā rattiṃ, yathā rattiṃ tathā divā;
យថា បុរេ តថា បច្ឆា, យថា បច្ឆា តថា បុរេ។
Yathā pure tathā pacchā, yathā pacchā tathā pure.
៣៩៨.
398.
‘‘បញ្ចង្គិកេន តុរិយេន, ន រតី ហោតិ តាទិសី;
‘‘Pañcaṅgikena turiyena, na ratī hoti tādisī;
យថា ឯកគ្គចិត្តស្ស, សម្មា ធម្មំ វិបស្សតោ’’តិ។
Yathā ekaggacittassa, sammā dhammaṃ vipassato’’ti.
… កុល្លោ ថេរោ…។
… Kullo thero….
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ៤. កុល្លត្ថេរគាថាវណ្ណនា • 4. Kullattheragāthāvaṇṇanā
