| Library / Tipiṭaka / තිපිටක • Tipiṭaka / ජාතකපාළි • Jātakapāḷi |
428. කොසම්බියජාතකං (2)
428. Kosambiyajātakaṃ (2)
10.
10.
පුථුසද්දො සමජනො, න බාලො කොචි මඤ්ඤථ;
Puthusaddo samajano, na bālo koci maññatha;
සඞ්ඝස්මිං භිජ්ජමානස්මිං, නාඤ්ඤං භිය්යො අමඤ්ඤරුං.
Saṅghasmiṃ bhijjamānasmiṃ, nāññaṃ bhiyyo amaññaruṃ.
11.
11.
පරිමුට්ඨා පණ්ඩිතාභාසා, වාචාගොචරභාණිනො;
Parimuṭṭhā paṇḍitābhāsā, vācāgocarabhāṇino;
යාවිච්ඡන්ති මුඛායාමං, යෙන නීතා න තං විදූ.
Yāvicchanti mukhāyāmaṃ, yena nītā na taṃ vidū.
12.
12.
අක්කොච්ඡි මං අවධි මං, අජිනි මං අහාසි මෙ;
Akkocchi maṃ avadhi maṃ, ajini maṃ ahāsi me;
යෙ ච තං උපනය්හන්ති, වෙරං තෙසං න සම්මති.
Ye ca taṃ upanayhanti, veraṃ tesaṃ na sammati.
13.
13.
අක්කොච්ඡි මං අවධි මං, අජිනි මං අහාසි මෙ;
Akkocchi maṃ avadhi maṃ, ajini maṃ ahāsi me;
යෙ ච තං නුපනය්හන්ති, වෙරං තෙසූපසම්මති.
Ye ca taṃ nupanayhanti, veraṃ tesūpasammati.
14.
14.
න හි වෙරෙන වෙරානි, සම්මන්තීධ කුදාචනං;
Na hi verena verāni, sammantīdha kudācanaṃ;
අවෙරෙන ච සම්මන්ති, එස ධම්මො සනන්තනො.
Averena ca sammanti, esa dhammo sanantano.
15.
15.
පරෙ ච න විජානන්ති, මයමෙත්ථ යමාමසෙ;
Pare ca na vijānanti, mayamettha yamāmase;
යෙ ච තත්ථ විජානන්ති, තතො සම්මන්ති මෙධගා.
Ye ca tattha vijānanti, tato sammanti medhagā.
16.
16.
රට්ඨං විලුම්පමානානං, තෙසම්පි හොති සඞ්ගති;
Raṭṭhaṃ vilumpamānānaṃ, tesampi hoti saṅgati;
කස්මා තුම්හාක නො සියා.
Kasmā tumhāka no siyā.
17.
17.
සචෙ ලභෙථ නිපකං සහායං, සද්ධිංචරං සාධුවිහාරිධීරං;
Sace labhetha nipakaṃ sahāyaṃ, saddhiṃcaraṃ sādhuvihāridhīraṃ;
අභිභුය්ය සබ්බානි පරිස්සයානි, චරෙය්ය තෙනත්තමනො සතීමා.
Abhibhuyya sabbāni parissayāni, careyya tenattamano satīmā.
18.
18.
නො චෙ ලභෙථ නිපකං සහායං, සද්ධිංචරං සාධුවිහාරිධීරං;
No ce labhetha nipakaṃ sahāyaṃ, saddhiṃcaraṃ sādhuvihāridhīraṃ;
රාජාව රට්ඨං විජිතං පහාය, එකො චරෙ මාතඞ්ගරඤ්ඤෙව නාගො.
Rājāva raṭṭhaṃ vijitaṃ pahāya, eko care mātaṅgaraññeva nāgo.
19.
19.
එකස්ස චරිතං සෙය්යො, නත්ථි බාලෙ සහායතා;
Ekassa caritaṃ seyyo, natthi bāle sahāyatā;
එකො චරෙ න පාපානි කයිරා, අප්පොස්සුක්කො මාතඞ්ගරඤ්ඤෙව නාගොති.
Eko care na pāpāni kayirā, appossukko mātaṅgaraññeva nāgoti.
කොසම්බියජාතකං දුතියං.
Kosambiyajātakaṃ dutiyaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ජාතක-අට්ඨකථා • Jātaka-aṭṭhakathā / [428] 2. කොසම්බියජාතකවණ්ණනා • [428] 2. Kosambiyajātakavaṇṇanā
