| Library / Tipiṭaka / তিপিটক • Tipiṭaka / জাতকপাল়ি • Jātakapāḷi |
৪২৮. কোসম্বিযজাতকং (২)
428. Kosambiyajātakaṃ (2)
১০.
10.
পুথুসদ্দো সমজনো, ন বালো কোচি মঞ্ঞথ।
Puthusaddo samajano, na bālo koci maññatha;
সঙ্ঘস্মিং ভিজ্জমানস্মিং, নাঞ্ঞং ভিয্যো অমঞ্ঞরুং॥
Saṅghasmiṃ bhijjamānasmiṃ, nāññaṃ bhiyyo amaññaruṃ.
১১.
11.
পরিমুট্ঠা পণ্ডিতাভাসা, ৰাচাগোচরভাণিনো।
Parimuṭṭhā paṇḍitābhāsā, vācāgocarabhāṇino;
যাৰিচ্ছন্তি মুখাযামং, যেন নীতা ন তং ৰিদূ॥
Yāvicchanti mukhāyāmaṃ, yena nītā na taṃ vidū.
১২.
12.
অক্কোচ্ছি মং অৰধি মং, অজিনি মং অহাসি মে।
Akkocchi maṃ avadhi maṃ, ajini maṃ ahāsi me;
যে চ তং উপনয্হন্তি, ৰেরং তেসং ন সম্মতি॥
Ye ca taṃ upanayhanti, veraṃ tesaṃ na sammati.
১৩.
13.
অক্কোচ্ছি মং অৰধি মং, অজিনি মং অহাসি মে।
Akkocchi maṃ avadhi maṃ, ajini maṃ ahāsi me;
যে চ তং নুপনয্হন্তি, ৰেরং তেসূপসম্মতি॥
Ye ca taṃ nupanayhanti, veraṃ tesūpasammati.
১৪.
14.
ন হি ৰেরেন ৰেরানি, সম্মন্তীধ কুদাচনং।
Na hi verena verāni, sammantīdha kudācanaṃ;
অৰেরেন চ সম্মন্তি, এস ধম্মো সনন্তনো॥
Averena ca sammanti, esa dhammo sanantano.
১৫.
15.
পরে চ ন ৰিজানন্তি, মযমেত্থ যমামসে।
Pare ca na vijānanti, mayamettha yamāmase;
যে চ তত্থ ৰিজানন্তি, ততো সম্মন্তি মেধগা॥
Ye ca tattha vijānanti, tato sammanti medhagā.
১৬.
16.
রট্ঠং ৰিলুম্পমানানং, তেসম্পি হোতি সঙ্গতি।
Raṭṭhaṃ vilumpamānānaṃ, tesampi hoti saṅgati;
কস্মা তুম্হাক নো সিযা॥
Kasmā tumhāka no siyā.
১৭.
17.
সচে লভেথ নিপকং সহাযং, সদ্ধিংচরং সাধুৰিহারিধীরং।
Sace labhetha nipakaṃ sahāyaṃ, saddhiṃcaraṃ sādhuvihāridhīraṃ;
অভিভুয্য সব্বানি পরিস্সযানি, চরেয্য তেনত্তমনো সতীমা॥
Abhibhuyya sabbāni parissayāni, careyya tenattamano satīmā.
১৮.
18.
নো চে লভেথ নিপকং সহাযং, সদ্ধিংচরং সাধুৰিহারিধীরং।
No ce labhetha nipakaṃ sahāyaṃ, saddhiṃcaraṃ sādhuvihāridhīraṃ;
রাজাৰ রট্ঠং ৰিজিতং পহায, একো চরে মাতঙ্গরঞ্ঞেৰ নাগো॥
Rājāva raṭṭhaṃ vijitaṃ pahāya, eko care mātaṅgaraññeva nāgo.
১৯.
19.
একস্স চরিতং সেয্যো, নত্থি বালে সহাযতা।
Ekassa caritaṃ seyyo, natthi bāle sahāyatā;
একো চরে ন পাপানি কযিরা, অপ্পোস্সুক্কো মাতঙ্গরঞ্ঞেৰ নাগোতি॥
Eko care na pāpāni kayirā, appossukko mātaṅgaraññeva nāgoti.
কোসম্বিযজাতকং দুতিযং।
Kosambiyajātakaṃ dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / জাতক-অট্ঠকথা • Jātaka-aṭṭhakathā / [৪২৮] ২. কোসম্বিযজাতকৰণ্ণনা • [428] 2. Kosambiyajātakavaṇṇanā
