| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾಪಾಳಿ • Therīgāthāpāḷi |
೧೦. ಏಕಾದಸನಿಪಾತೋ
10. Ekādasanipāto
೧. ಕಿಸಾಗೋತಮೀಥೇರೀಗಾಥಾ
1. Kisāgotamītherīgāthā
೨೧೩.
213.
‘‘ಕಲ್ಯಾಣಮಿತ್ತತಾ ಮುನಿನಾ, ಲೋಕಂ ಆದಿಸ್ಸ ವಣ್ಣಿತಾ।
‘‘Kalyāṇamittatā muninā, lokaṃ ādissa vaṇṇitā;
ಕಲ್ಯಾಣಮಿತ್ತೇ ಭಜಮಾನೋ, ಅಪಿ ಬಾಲೋ ಪಣ್ಡಿತೋ ಅಸ್ಸ॥
Kalyāṇamitte bhajamāno, api bālo paṇḍito assa.
೨೧೪.
214.
‘‘ಭಜಿತಬ್ಬಾ ಸಪ್ಪುರಿಸಾ, ಪಞ್ಞಾ ತಥಾ ವಡ್ಢತಿ ಭಜನ್ತಾನಂ।
‘‘Bhajitabbā sappurisā, paññā tathā vaḍḍhati bhajantānaṃ;
ಭಜಮಾನೋ ಸಪ್ಪುರಿಸೇ, ಸಬ್ಬೇಹಿಪಿ ದುಕ್ಖೇಹಿ ಪಮುಚ್ಚೇಯ್ಯ॥
Bhajamāno sappurise, sabbehipi dukkhehi pamucceyya.
೨೧೫.
215.
‘‘ದುಕ್ಖಞ್ಚ ವಿಜಾನೇಯ್ಯ, ದುಕ್ಖಸ್ಸ ಚ ಸಮುದಯಂ ನಿರೋಧಂ।
‘‘Dukkhañca vijāneyya, dukkhassa ca samudayaṃ nirodhaṃ;
ಅಟ್ಠಙ್ಗಿಕಞ್ಚ ಮಗ್ಗಂ, ಚತ್ತಾರಿಪಿ ಅರಿಯಸಚ್ಚಾನಿ॥
Aṭṭhaṅgikañca maggaṃ, cattāripi ariyasaccāni.
೨೧೬.
216.
‘‘ದುಕ್ಖೋ ಇತ್ಥಿಭಾವೋ, ಅಕ್ಖಾತೋ ಪುರಿಸದಮ್ಮಸಾರಥಿನಾ।
‘‘Dukkho itthibhāvo, akkhāto purisadammasārathinā;
ಸಪತ್ತಿಕಮ್ಪಿ ಹಿ ದುಕ್ಖಂ, ಅಪ್ಪೇಕಚ್ಚಾ ಸಕಿಂ ವಿಜಾತಾಯೋ॥
Sapattikampi hi dukkhaṃ, appekaccā sakiṃ vijātāyo.
೨೧೭.
217.
‘‘ಗಲಕೇ ಅಪಿ ಕನ್ತನ್ತಿ, ಸುಖುಮಾಲಿನಿಯೋ ವಿಸಾನಿ ಖಾದನ್ತಿ।
‘‘Galake api kantanti, sukhumāliniyo visāni khādanti;
ಜನಮಾರಕಮಜ್ಝಗತಾ, ಉಭೋಪಿ ಬ್ಯಸನಾನಿ ಅನುಭೋನ್ತಿ॥
Janamārakamajjhagatā, ubhopi byasanāni anubhonti.
೨೧೮.
218.
‘‘ಉಪವಿಜಞ್ಞಾ ಗಚ್ಛನ್ತೀ, ಅದ್ದಸಾಹಂ ಪತಿಂ ಮತಂ।
‘‘Upavijaññā gacchantī, addasāhaṃ patiṃ mataṃ;
ಪನ್ಥಮ್ಹಿ ವಿಜಾಯಿತ್ವಾನ, ಅಪ್ಪತ್ತಾವ ಸಕಂ ಘರಂ॥
Panthamhi vijāyitvāna, appattāva sakaṃ gharaṃ.
೨೧೯.
219.
‘‘ದ್ವೇ ಪುತ್ತಾ ಕಾಲಕತಾ, ಪತೀ ಚ ಪನ್ಥೇ ಮತೋ ಕಪಣಿಕಾಯ।
‘‘Dve puttā kālakatā, patī ca panthe mato kapaṇikāya;
ಮಾತಾ ಪಿತಾ ಚ ಭಾತಾ, ಡಯ್ಹನ್ತಿ ಚ ಏಕಚಿತಕಾಯಂ॥
Mātā pitā ca bhātā, ḍayhanti ca ekacitakāyaṃ.
೨೨೦.
220.
‘‘ಖೀಣಕುಲೀನೇ ಕಪಣೇ, ಅನುಭೂತಂ ತೇ ದುಖಂ ಅಪರಿಮಾಣಂ।
‘‘Khīṇakulīne kapaṇe, anubhūtaṃ te dukhaṃ aparimāṇaṃ;
ಅಸ್ಸೂ ಚ ತೇ ಪವತ್ತಂ, ಬಹೂನಿ ಚ ಜಾತಿಸಹಸ್ಸಾನಿ॥
Assū ca te pavattaṃ, bahūni ca jātisahassāni.
೨೨೧.
221.
‘‘ವಸಿತಾ ಸುಸಾನಮಜ್ಝೇ, ಅಥೋಪಿ ಖಾದಿತಾನಿ ಪುತ್ತಮಂಸಾನಿ।
‘‘Vasitā susānamajjhe, athopi khāditāni puttamaṃsāni;
ಹತಕುಲಿಕಾ ಸಬ್ಬಗರಹಿತಾ, ಮತಪತಿಕಾ ಅಮತಮಧಿಗಚ್ಛಿಂ॥
Hatakulikā sabbagarahitā, matapatikā amatamadhigacchiṃ.
೨೨೨.
222.
‘‘ಭಾವಿತೋ ಮೇ ಮಗ್ಗೋ, ಅರಿಯೋ ಅಟ್ಠಙ್ಗಿಕೋ ಅಮತಗಾಮೀ।
‘‘Bhāvito me maggo, ariyo aṭṭhaṅgiko amatagāmī;
೨೨೩.
223.
‘‘ಅಹಮಮ್ಹಿ ಕನ್ತಸಲ್ಲಾ, ಓಹಿತಭಾರಾ ಕತಞ್ಹಿ ಕರಣೀಯಂ।
‘‘Ahamamhi kantasallā, ohitabhārā katañhi karaṇīyaṃ;
ಕಿಸಾ ಗೋತಮೀ ಥೇರೀ, ವಿಮುತ್ತಚಿತ್ತಾ ಇಮಂ ಭಣೀ’’ತಿ॥
Kisā gotamī therī, vimuttacittā imaṃ bhaṇī’’ti.
… ಕಿಸಾ ಗೋತಮೀ ಥೇರೀ…।
… Kisā gotamī therī….
ಏಕಾದಸನಿಪಾತೋ ನಿಟ್ಠಿತೋ।
Ekādasanipāto niṭṭhito.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā / ೧. ಕಿಸಾಗೋತಮೀಥೇರೀಗಾಥಾವಣ್ಣನಾ • 1. Kisāgotamītherīgāthāvaṇṇanā
