| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
११. कण्हदीपायनचरिया
11. Kaṇhadīpāyanacariyā
९२.
92.
‘‘पुनापरं यदा होमि, कण्हदीपायनो इसि।
‘‘Punāparaṃ yadā homi, kaṇhadīpāyano isi;
परोपञ्ञासवस्सानि, अनभिरतोचरिं अहं॥
Paropaññāsavassāni, anabhiratocariṃ ahaṃ.
९३.
93.
‘‘न कोचि एतं जानाति, अनभिरतिमनं मम।
‘‘Na koci etaṃ jānāti, anabhiratimanaṃ mama;
अहञ्हि कस्सचि नाचिक्खिं, अरति मे चरति मानसे॥
Ahañhi kassaci nācikkhiṃ, arati me carati mānase.
९४.
94.
‘‘सब्रह्मचारी मण्डब्यो, सहायो मे महाइसि।
‘‘Sabrahmacārī maṇḍabyo, sahāyo me mahāisi;
पुब्बकम्मसमायुत्तो, सूलमारोपनं लभि॥
Pubbakammasamāyutto, sūlamāropanaṃ labhi.
९५.
95.
‘‘तमहं उपट्ठहित्वान, आरोग्यमनुपापयिं।
‘‘Tamahaṃ upaṭṭhahitvāna, ārogyamanupāpayiṃ;
आपुच्छित्वान आगञ्छिं, यं मय्हं सकमस्समं॥
Āpucchitvāna āgañchiṃ, yaṃ mayhaṃ sakamassamaṃ.
९६.
96.
‘‘सहायो ब्राह्मणो मय्हं, भरियं आदाय पुत्तकं।
‘‘Sahāyo brāhmaṇo mayhaṃ, bhariyaṃ ādāya puttakaṃ;
तयो जना समागन्त्वा, आगञ्छुं पाहुनागतं॥
Tayo janā samāgantvā, āgañchuṃ pāhunāgataṃ.
९७.
97.
‘‘सम्मोदमानो तेहि सह, निसिन्नो सकमस्समे।
‘‘Sammodamāno tehi saha, nisinno sakamassame;
दारको वट्टमनुक्खिपं, आसीविसमकोपयि॥
Dārako vaṭṭamanukkhipaṃ, āsīvisamakopayi.
९८.
98.
‘‘ततो सो वट्टगतं मग्गं, अन्वेसन्तो कुमारको।
‘‘Tato so vaṭṭagataṃ maggaṃ, anvesanto kumārako;
आसीविसस्स हत्थेन, उत्तमङ्गं परामसि॥
Āsīvisassa hatthena, uttamaṅgaṃ parāmasi.
९९.
99.
‘‘तस्स आमसने कुद्धो, सप्पो विसबलस्सितो।
‘‘Tassa āmasane kuddho, sappo visabalassito;
कुपितो परमकोपेन, अडंसि दारकं खणे॥
Kupito paramakopena, aḍaṃsi dārakaṃ khaṇe.
१००.
100.
तेनाहं दुक्खितो आसिं, मम वाहसि तं दुक्खं॥
Tenāhaṃ dukkhito āsiṃ, mama vāhasi taṃ dukkhaṃ.
१०१.
101.
‘‘त्याहं अस्सासयित्वान, दुक्खिते सोकसल्लिते।
‘‘Tyāhaṃ assāsayitvāna, dukkhite sokasallite;
पठमं अकासिं किरियं, अग्गं सच्चं वरुत्तमं॥
Paṭhamaṃ akāsiṃ kiriyaṃ, aggaṃ saccaṃ varuttamaṃ.
१०२.
102.
‘‘‘सत्ताहमेवाहं पसन्नचित्तो, पुञ्ञत्थिको अचरिं ब्रह्मचरियं।
‘‘‘Sattāhamevāhaṃ pasannacitto, puññatthiko acariṃ brahmacariyaṃ;
अथापरं यं चरितं ममेदं, वस्सानि पञ्ञाससमाधिकानि॥
Athāparaṃ yaṃ caritaṃ mamedaṃ, vassāni paññāsasamādhikāni.
१०३.
103.
‘‘‘अकामको वाहि अहं चरामि, एतेन सच्चेन सुवत्थि होतु।
‘‘‘Akāmako vāhi ahaṃ carāmi, etena saccena suvatthi hotu;
हतं विसं जीवतु यञ्ञदत्तो’॥
Hataṃ visaṃ jīvatu yaññadatto’.
१०४.
104.
‘‘सह सच्चे कते मय्हं, विसवेगेन वेधितो।
‘‘Saha sacce kate mayhaṃ, visavegena vedhito;
अबुज्झित्वान वुट्ठासि, अरोगो चासि माणवो।
Abujjhitvāna vuṭṭhāsi, arogo cāsi māṇavo;
सच्चेन मे समो नत्थि, एसा मे सच्चपारमी’’ति॥
Saccena me samo natthi, esā me saccapāramī’’ti.
कण्हदीपायनचरियं एकादसमं।
Kaṇhadīpāyanacariyaṃ ekādasamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / ११. कण्हदीपायनचरियावण्णना • 11. Kaṇhadīpāyanacariyāvaṇṇanā
