| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៦. កាមូបបត្តិសុត្តំ
6. Kāmūpapattisuttaṃ
៩៥. វុត្តញ្ហេតំ ភគវតា, វុត្តមរហតាតិ មេ សុតំ –
95. Vuttañhetaṃ bhagavatā, vuttamarahatāti me sutaṃ –
‘‘តិស្សោ ឥមា, ភិក្ខវេ, កាមូបបត្តិយោ 1។ កតមា តិស្សោ? បច្ចុបដ្ឋិតកាមា, និម្មានរតិនោ , បរនិម្មិតវសវត្តិនោ – ឥមា ខោ, ភិក្ខវេ, តិស្សោ កាមូបបត្តិយោ’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Tisso imā, bhikkhave, kāmūpapattiyo 2. Katamā tisso? Paccupaṭṭhitakāmā, nimmānaratino , paranimmitavasavattino – imā kho, bhikkhave, tisso kāmūpapattiyo’’ti. Etamatthaṃ bhagavā avoca. Tatthetaṃ iti vuccati –
‘‘បច្ចុបដ្ឋិតកាមា ច, យេ ទេវា វសវត្តិនោ;
‘‘Paccupaṭṭhitakāmā ca, ye devā vasavattino;
និម្មានរតិនោ ទេវា, យេ ចញ្ញេ កាមភោគិនោ;
Nimmānaratino devā, ye caññe kāmabhogino;
ឥត្ថភាវញ្ញថាភាវំ , សំសារំ នាតិវត្តរេ។
Itthabhāvaññathābhāvaṃ , saṃsāraṃ nātivattare.
‘‘ឯតមាទីនវំ ញត្វា, កាមភោគេសុ បណ្ឌិតោ;
‘‘Etamādīnavaṃ ñatvā, kāmabhogesu paṇḍito;
សព្ពេ បរិច្ចជេ កាមេ, យេ ទិព្ពា យេ ច មានុសា។
Sabbe pariccaje kāme, ye dibbā ye ca mānusā.
‘‘បិយរូបសាតគធិតំ , ឆេត្វា សោតំ ទុរច្ចយំ;
‘‘Piyarūpasātagadhitaṃ , chetvā sotaṃ duraccayaṃ;
អសេសំ បរិនិព្ពន្តិ, អសេសំ ទុក្ខមច្ចគុំ។
Asesaṃ parinibbanti, asesaṃ dukkhamaccaguṃ.
‘‘អរិយទ្ទសា វេទគុនោ, សម្មទញ្ញាយ បណ្ឌិតា;
‘‘Ariyaddasā vedaguno, sammadaññāya paṇḍitā;
ជាតិក្ខយមភិញ្ញាយ, នាគច្ឆន្តិ បុនព្ភវ’’ន្តិ។
Jātikkhayamabhiññāya, nāgacchanti punabbhava’’nti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ ឆដ្ឋំ។
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៦. កាមូបបត្តិសុត្តវណ្ណនា • 6. Kāmūpapattisuttavaṇṇanā
