| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
១០. ទសកនិបាតោ
10. Dasakanipāto
១. កាឡុទាយិត្ថេរគាថា
1. Kāḷudāyittheragāthā
៥២៧.
527.
‘‘អង្គារិនោ ទានិ ទុមា ភទន្តេ, ផលេសិនោ ឆទនំ វិប្បហាយ;
‘‘Aṅgārino dāni dumā bhadante, phalesino chadanaṃ vippahāya;
តេ អច្ចិមន្តោវ បភាសយន្តិ, សមយោ មហាវីរ ភាគី រសានំ។
Te accimantova pabhāsayanti, samayo mahāvīra bhāgī rasānaṃ.
៥២៨.
528.
‘‘ទុមានិ ផុល្លានិ មនោរមានិ, សមន្តតោ សព្ពទិសា បវន្តិ;
‘‘Dumāni phullāni manoramāni, samantato sabbadisā pavanti;
បត្តំ បហាយ ផលមាសសានា 1, កាលោ ឥតោ បក្កមនាយ វីរ។
Pattaṃ pahāya phalamāsasānā 2, kālo ito pakkamanāya vīra.
៥២៩.
529.
‘‘នេវាតិសីតំ ន បនាតិឧណ្ហំ, សុខា ឧតុ អទ្ធនិយា ភទន្តេ;
‘‘Nevātisītaṃ na panātiuṇhaṃ, sukhā utu addhaniyā bhadante;
បស្សន្តុ តំ សាកិយា កោឡិយា ច, បច្ឆាមុខំ រោហិនិយំ តរន្តំ។
Passantu taṃ sākiyā koḷiyā ca, pacchāmukhaṃ rohiniyaṃ tarantaṃ.
៥៣០.
530.
‘‘អាសាយ កសតេ ខេត្តំ, ពីជំ អាសាយ វប្បតិ;
‘‘Āsāya kasate khettaṃ, bījaṃ āsāya vappati;
អាសាយ វាណិជា យន្តិ, សមុទ្ទំ ធនហារកា;
Āsāya vāṇijā yanti, samuddaṃ dhanahārakā;
យាយ អាសាយ តិដ្ឋាមិ, សា មេ អាសា សមិជ្ឈតុ។
Yāya āsāya tiṭṭhāmi, sā me āsā samijjhatu.
៥៣១.
531.
3 ‘‘បុនប្បុនំ ចេវ វបន្តិ ពីជំ, បុនប្បុនំ វស្សតិ ទេវរាជា;
4 ‘‘Punappunaṃ ceva vapanti bījaṃ, punappunaṃ vassati devarājā;
បុនប្បុនំ ខេត្តំ កសន្តិ កស្សកា, បុនប្បុនំ ធញ្ញមុបេតិ រដ្ឋំ។
Punappunaṃ khettaṃ kasanti kassakā, punappunaṃ dhaññamupeti raṭṭhaṃ.
៥៣២.
532.
5 ‘‘បុនប្បុនំ យាចនកា ចរន្តិ, បុនប្បុនំ ទានបតី ទទន្តិ;
6 ‘‘Punappunaṃ yācanakā caranti, punappunaṃ dānapatī dadanti;
បុនប្បុនំ ទានបតី ទទិត្វា, បុនប្បុនំ សគ្គមុបេន្តិ ឋានំ។
Punappunaṃ dānapatī daditvā, punappunaṃ saggamupenti ṭhānaṃ.
៥៣៣.
533.
‘‘វីរោ ហវេ សត្តយុគំ បុនេតិ, យស្មិំ កុលេ ជាយតិ ភូរិបញ្ញោ;
‘‘Vīro have sattayugaṃ puneti, yasmiṃ kule jāyati bhūripañño;
មញ្ញាមហំ សក្កតិ ទេវទេវោ, តយា ហិ ជាតោ 7 មុនិ សច្ចនាមោ។
Maññāmahaṃ sakkati devadevo, tayā hi jāto 8 muni saccanāmo.
៥៣៤.
534.
‘‘សុទ្ធោទនោ នាម បិតា មហេសិនោ, ពុទ្ធស្ស មាតា បន មាយនាមា;
‘‘Suddhodano nāma pitā mahesino, buddhassa mātā pana māyanāmā;
យា ពោធិសត្តំ បរិហរិយ កុច្ឆិនា, កាយស្ស ភេទា តិទិវម្ហិ មោទតិ។
Yā bodhisattaṃ parihariya kucchinā, kāyassa bhedā tidivamhi modati.
៥៣៥.
535.
‘‘សា គោតមី កាលកតា ឥតោ ចុតា, ទិព្ពេហិ កាមេហិ សមង្គិភូតា;
‘‘Sā gotamī kālakatā ito cutā, dibbehi kāmehi samaṅgibhūtā;
សា មោទតិ កាមគុណេហិ បញ្ចហិ, បរិវារិតា ទេវគណេហិ តេហិ។
Sā modati kāmaguṇehi pañcahi, parivāritā devagaṇehi tehi.
៥៣៦.
536.
‘‘ពុទ្ធស្ស បុត្តោម្ហិ អសយ្ហសាហិនោ, អង្គីរសស្សប្បដិមស្ស តាទិនោ;
‘‘Buddhassa puttomhi asayhasāhino, aṅgīrasassappaṭimassa tādino;
បិតុបិតា មយ្ហំ តុវំសិ សក្ក, ធម្មេន មេ គោតម អយ្យកោសី’’តិ។
Pitupitā mayhaṃ tuvaṃsi sakka, dhammena me gotama ayyakosī’’ti.
… កាឡុទាយី ថេរោ…។
… Kāḷudāyī thero….
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ១. កាឡុទាយិត្ថេរគាថាវណ្ណនា • 1. Kāḷudāyittheragāthāvaṇṇanā
