| Library / Tipiṭaka / තිපිටක • Tipiṭaka / චූළනිද්දෙසපාළි • Cūḷaniddesapāḷi |
11. ජතුකණ්ණිමාණවපුච්ඡා
11. Jatukaṇṇimāṇavapucchā
121.
121.
‘‘සුත්වානහං වීරමකාමකාමිං, [ඉච්චායස්මා ජතුකණ්ණි]
‘‘Sutvānahaṃ vīramakāmakāmiṃ, [iccāyasmā jatukaṇṇi]
ඔඝාතිගං පුට්ඨුමකාමමාගමං;
Oghātigaṃ puṭṭhumakāmamāgamaṃ;
සන්තිපදං බ්රූහි සහජනෙත්ත, යථාතච්ඡං භගවා බ්රූහි මෙතං.
Santipadaṃ brūhi sahajanetta, yathātacchaṃ bhagavā brūhi metaṃ.
122.
122.
‘‘භගවා හි කාමෙ අභිභුය්ය ඉරියති, ආදිච්චොව පථවිං තෙජී තෙජසා;
‘‘Bhagavā hi kāme abhibhuyya iriyati, ādiccova pathaviṃ tejī tejasā;
පරිත්තපඤ්ඤස්ස මෙ භූරිපඤ්ඤ, ආචික්ඛ ධම්මං යමහං විජඤ්ඤං;
Parittapaññassa me bhūripañña, ācikkha dhammaṃ yamahaṃ vijaññaṃ;
ජාතිජරාය ඉධ විප්පහානං’’.
Jātijarāya idha vippahānaṃ’’.
123.
123.
‘‘කාමෙසු විනය ගෙධං, [ජතුකණ්ණීති භගවා]
‘‘Kāmesu vinaya gedhaṃ, [jatukaṇṇīti bhagavā]
නෙක්ඛම්මං දට්ඨු ඛෙමතො;
Nekkhammaṃ daṭṭhu khemato;
උග්ගහිතං නිරත්තං වා, මා තෙ විජ්ජිත්ථ කිඤ්චනං.
Uggahitaṃ nirattaṃ vā, mā te vijjittha kiñcanaṃ.
124.
124.
‘‘යං පුබ්බෙ තං විසොසෙහි, පච්ඡා තෙ මාහු කිඤ්චනං;
‘‘Yaṃ pubbe taṃ visosehi, pacchā te māhu kiñcanaṃ;
මජ්ඣෙ චෙ නො ගහෙස්සසි, උපසන්තො චරිස්සසි.
Majjhe ce no gahessasi, upasanto carissasi.
125.
125.
‘‘සබ්බසො නාමරූපස්මිං, වීතගෙධස්ස බ්රාහ්මණ;
‘‘Sabbaso nāmarūpasmiṃ, vītagedhassa brāhmaṇa;
ආසවාස්ස න විජ්ජන්ති, යෙහි මච්චුවසං වජෙ’’ති.
Āsavāssa na vijjanti, yehi maccuvasaṃ vaje’’ti.
ජතුකණ්ණිමාණවපුච්ඡා එකාදසමා.
Jatukaṇṇimāṇavapucchā ekādasamā.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / චූළනිද්දෙස-අට්ඨකථා • Cūḷaniddesa-aṭṭhakathā / 11. ජතුකණ්ණිමාණවසුත්තනිද්දෙසවණ්ණනා • 11. Jatukaṇṇimāṇavasuttaniddesavaṇṇanā
