| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
६. जटासुत्तं
6. Jaṭāsuttaṃ
१९२. सावत्थिनिदानं । अथ खो जटाभारद्वाजो ब्राह्मणो येन भगवा तेनुपसङ्कमि; उपसङ्कमित्वा भगवता सद्धिं सम्मोदि। सम्मोदनीयं कथं सारणीयं वीतिसारेत्वा एकमन्तं निसीदि। एकमन्तं निसिन्नो खो जटाभारद्वाजो ब्राह्मणो भगवन्तं गाथाय अज्झभासि –
192. Sāvatthinidānaṃ . Atha kho jaṭābhāradvājo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho jaṭābhāradvājo brāhmaṇo bhagavantaṃ gāthāya ajjhabhāsi –
‘‘अन्तोजटा बहिजटा, जटाय जटिता पजा।
‘‘Antojaṭā bahijaṭā, jaṭāya jaṭitā pajā;
तं तं गोतम पुच्छामि, को इमं विजटये जट’’न्ति॥
Taṃ taṃ gotama pucchāmi, ko imaṃ vijaṭaye jaṭa’’nti.
‘‘सीले पतिट्ठाय नरो सपञ्ञो, चित्तं पञ्ञञ्च भावयं।
‘‘Sīle patiṭṭhāya naro sapañño, cittaṃ paññañca bhāvayaṃ;
आतापी निपको भिक्खु, सो इमं विजटये जटं॥
Ātāpī nipako bhikkhu, so imaṃ vijaṭaye jaṭaṃ.
‘‘येसं रागो च दोसो च, अविज्जा च विराजिता।
‘‘Yesaṃ rāgo ca doso ca, avijjā ca virājitā;
खीणासवा अरहन्तो, तेसं विजटिता जटा॥
Khīṇāsavā arahanto, tesaṃ vijaṭitā jaṭā.
‘‘यत्थ नामञ्च रूपञ्च, असेसं उपरुज्झति।
‘‘Yattha nāmañca rūpañca, asesaṃ uparujjhati;
पटिघं रूपसञ्ञा च, एत्थेसा छिज्जते जटा’’ति॥
Paṭighaṃ rūpasaññā ca, etthesā chijjate jaṭā’’ti.
एवं वुत्ते, जटाभारद्वाजो भगवन्तं एतदवोच – ‘‘अभिक्कन्तं, भो गोतम…पे॰… अञ्ञतरो च पनायस्मा भारद्वाजो अरहतं अहोसी’’ति।
Evaṃ vutte, jaṭābhāradvājo bhagavantaṃ etadavoca – ‘‘abhikkantaṃ, bho gotama…pe… aññataro ca panāyasmā bhāradvājo arahataṃ ahosī’’ti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ६. जटासुत्तवण्णना • 6. Jaṭāsuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ६. जटासुत्तवण्णना • 6. Jaṭāsuttavaṇṇanā
