| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៥. ឥន្ទ្រិយសមោធានំ
5. Indriyasamodhānaṃ
២០៤. បុថុជ្ជនោ សមាធិំ ភាវេន្តោ កតិហាការេហិ ឧបដ្ឋានកុសលោ ហោតិ? សេក្ខោ សមាធិំ ភាវេន្តោ កតិហាការេហិ ឧបដ្ឋានកុសលោ ហោតិ? វីតរាគោ សមាធិំ ភាវេន្តោ កតិហាការេហិ ឧបដ្ឋានកុសលោ ហោតិ? បុថុជ្ជនោ សមាធិំ ភាវេន្តោ សត្តហិ អាការេហិ ឧបដ្ឋានកុសលោ ហោតិ។ សេក្ខោ សមាធិំ ភាវេន្តោ អដ្ឋហិ អាការេហិ ឧបដ្ឋានកុសលោ ហោតិ។ វីតរាគោ សមាធិំ ភាវេន្តោ ទសហិ អាការេហិ ឧបដ្ឋានកុសលោ ហោតិ។
204. Puthujjano samādhiṃ bhāvento katihākārehi upaṭṭhānakusalo hoti? Sekkho samādhiṃ bhāvento katihākārehi upaṭṭhānakusalo hoti? Vītarāgo samādhiṃ bhāvento katihākārehi upaṭṭhānakusalo hoti? Puthujjano samādhiṃ bhāvento sattahi ākārehi upaṭṭhānakusalo hoti. Sekkho samādhiṃ bhāvento aṭṭhahi ākārehi upaṭṭhānakusalo hoti. Vītarāgo samādhiṃ bhāvento dasahi ākārehi upaṭṭhānakusalo hoti.
បុថុជ្ជនោ សមាធិំ ភាវេន្តោ កតមេហិ សត្តហាការេហិ ឧបដ្ឋានកុសលោ ហោតិ? អាវជ្ជិតត្តា អារម្មណូបដ្ឋានកុសលោ ហោតិ, សមថនិមិត្តូបដ្ឋានកុសលោ ហោតិ, បគ្គហនិមិត្តូបដ្ឋានកុសលោ ហោតិ, អវិក្ខេបូបដ្ឋានកុសលោ ហោតិ, ឱភាសូបដ្ឋានកុសលោ ហោតិ, សម្បហំសនូបដ្ឋានកុសលោ ហោតិ, ឧបេក្ខូបដ្ឋានកុសលោ ហោតិ – បុថុជ្ជនោ សមាធិំ ភាវេន្តោ ឥមេហិ សត្តហិ អាការេហិ ឧបដ្ឋានកុសលោ ហោតិ។
Puthujjano samādhiṃ bhāvento katamehi sattahākārehi upaṭṭhānakusalo hoti? Āvajjitattā ārammaṇūpaṭṭhānakusalo hoti, samathanimittūpaṭṭhānakusalo hoti, paggahanimittūpaṭṭhānakusalo hoti, avikkhepūpaṭṭhānakusalo hoti, obhāsūpaṭṭhānakusalo hoti, sampahaṃsanūpaṭṭhānakusalo hoti, upekkhūpaṭṭhānakusalo hoti – puthujjano samādhiṃ bhāvento imehi sattahi ākārehi upaṭṭhānakusalo hoti.
សេក្ខោ សមាធិំ ភាវេន្តោ កតមេហិ អដ្ឋហិ អាការេហិ ឧបដ្ឋានកុសលោ ហោតិ? អាវជ្ជិតត្តា អារម្មណូបដ្ឋានកុសលោ ហោតិ, សមថនិមិត្តូបដ្ឋានកុសលោ ហោតិ, បគ្គហនិមិត្តូបដ្ឋានកុសលោ ហោតិ, អវិក្ខេបូបដ្ឋានកុសលោ ហោតិ, ឱភាសូបដ្ឋានកុសលោ ហោតិ, សម្បហំសនូបដ្ឋានកុសលោ ហោតិ, ឧបេក្ខូបដ្ឋានកុសលោ ហោតិ, ឯកត្តូបដ្ឋានកុសលោ ហោតិ – សេក្ខោ សមាធិំ ភាវេន្តោ ឥមេហិ អដ្ឋហិ អាការេហិ ឧបដ្ឋានកុសលោ ហោតិ។
Sekkho samādhiṃ bhāvento katamehi aṭṭhahi ākārehi upaṭṭhānakusalo hoti? Āvajjitattā ārammaṇūpaṭṭhānakusalo hoti, samathanimittūpaṭṭhānakusalo hoti, paggahanimittūpaṭṭhānakusalo hoti, avikkhepūpaṭṭhānakusalo hoti, obhāsūpaṭṭhānakusalo hoti, sampahaṃsanūpaṭṭhānakusalo hoti, upekkhūpaṭṭhānakusalo hoti, ekattūpaṭṭhānakusalo hoti – sekkho samādhiṃ bhāvento imehi aṭṭhahi ākārehi upaṭṭhānakusalo hoti.
វីតរាគោ សមាធិំ ភាវេន្តោ កតមេហិ ទសហិ អាការេហិ ឧបដ្ឋានកុសលោ ហោតិ? អាវជ្ជិតត្តា អារម្មណូបដ្ឋានកុសលោ ហោតិ…បេ.… ឯកត្តូបដ្ឋានកុសលោ ហោតិ, ញាណូបដ្ឋានកុសលោ ហោតិ, វិមុត្តូបដ្ឋានកុសលោ ហោតិ – វីតរាគោ សមាធិំ ភាវេន្តោ ឥមេហិ ទសហិ អាការេហិ ឧបដ្ឋានកុសលោ ហោតិ។
Vītarāgo samādhiṃ bhāvento katamehi dasahi ākārehi upaṭṭhānakusalo hoti? Āvajjitattā ārammaṇūpaṭṭhānakusalo hoti…pe… ekattūpaṭṭhānakusalo hoti, ñāṇūpaṭṭhānakusalo hoti, vimuttūpaṭṭhānakusalo hoti – vītarāgo samādhiṃ bhāvento imehi dasahi ākārehi upaṭṭhānakusalo hoti.
២០៥. បុថុជ្ជនោ វិបស្សនំ ភាវេន្តោ កតិហាការេហិ ឧបដ្ឋានកុសលោ ហោតិ, កតិហាការេហិ អនុបដ្ឋានកុសលោ ហោតិ? សេក្ខោ វិបស្សនំ ភាវេន្តោ កតិហាការេហិ ឧបដ្ឋានកុសលោ ហោតិ , កតិហាការេហិ អនុបដ្ឋានកុសលោ ហោតិ? វីតរាគោ វិបស្សនំ ភាវេន្តោ កតិហាការេហិ ឧបដ្ឋានកុសលោ ហោតិ, កតិហាការេហិ អនុបដ្ឋានកុសលោ ហោតិ?
205. Puthujjano vipassanaṃ bhāvento katihākārehi upaṭṭhānakusalo hoti, katihākārehi anupaṭṭhānakusalo hoti? Sekkho vipassanaṃ bhāvento katihākārehi upaṭṭhānakusalo hoti , katihākārehi anupaṭṭhānakusalo hoti? Vītarāgo vipassanaṃ bhāvento katihākārehi upaṭṭhānakusalo hoti, katihākārehi anupaṭṭhānakusalo hoti?
បុថុជ្ជនោ វិបស្សនំ ភាវេន្តោ នវហិ អាការេហិ ឧបដ្ឋានកុសលោ ហោតិ, នវហិ អាការេហិ អនុបដ្ឋានកុសលោ ហោតិ។ សេក្ខោ វិបស្សនំ ភាវេន្តោ ទសហិ អាការេហិ ឧបដ្ឋានកុសលោ ហោតិ, ទសហិ អាការេហិ អនុបដ្ឋានកុសលោ ហោតិ។ វីតរាគោ វិបស្សនំ ភាវេន្តោ ទ្វាទសហិ អាការេហិ ឧបដ្ឋានកុសលោ ហោតិ, ទ្វាទសហិ អាការេហិ អនុបដ្ឋានកុសលោ ហោតិ។
Puthujjano vipassanaṃ bhāvento navahi ākārehi upaṭṭhānakusalo hoti, navahi ākārehi anupaṭṭhānakusalo hoti. Sekkho vipassanaṃ bhāvento dasahi ākārehi upaṭṭhānakusalo hoti, dasahi ākārehi anupaṭṭhānakusalo hoti. Vītarāgo vipassanaṃ bhāvento dvādasahi ākārehi upaṭṭhānakusalo hoti, dvādasahi ākārehi anupaṭṭhānakusalo hoti.
បុថុជ្ជនោ វិបស្សនំ ភាវេន្តោ កតមេហិ នវហិ អាការេហិ ឧបដ្ឋានកុសលោ ហោតិ, កតមេហិ នវហិ អាការេហិ អនុបដ្ឋានកុសលោ ហោតិ? អនិច្ចតោ ឧបដ្ឋានកុសលោ ហោតិ, និច្ចតោ អនុបដ្ឋានកុសលោ ហោតិ។ ទុក្ខតោ ឧបដ្ឋានកុសលោ ហោតិ, សុខតោ អនុបដ្ឋានកុសលោ ហោតិ។ អនត្តតោ ឧបដ្ឋានកុសលោ ហោតិ, អត្តតោ អនុបដ្ឋានកុសលោ ហោតិ។ ខយតោ ឧបដ្ឋានកុសលោ ហោតិ, ឃនតោ អនុបដ្ឋានកុសលោ ហោតិ។ វយតោ ឧបដ្ឋានកុសលោ ហោតិ, អាយូហនានុបដ្ឋានកុសលោ ហោតិ។ វិបរិណាមូបដ្ឋានកុសលោ ហោតិ, ធុវតោ អនុបដ្ឋានកុសលោ ហោតិ។ អនិមិត្តូបដ្ឋានកុសលោ ហោតិ, និមិត្តានុបដ្ឋានកុសលោ ហោតិ។ អប្បណិហិតូបដ្ឋានកុសលោ ហោតិ, បណិធិអនុបដ្ឋានកុសលោ 1 ហោតិ។ សុញ្ញតូបដ្ឋានកុសលោ ហោតិ, អភិនិវេសានុបដ្ឋានកុសលោ ហោតិ – បុថុជ្ជនោ វិបស្សនំ ភាវេន្តោ ឥមេហិ នវហិ អាការេហិ ឧបដ្ឋានកុសលោ ហោតិ, ឥមេហិ នវហិ អាការេហិ អនុបដ្ឋានកុសលោ ហោតិ។
Puthujjano vipassanaṃ bhāvento katamehi navahi ākārehi upaṭṭhānakusalo hoti, katamehi navahi ākārehi anupaṭṭhānakusalo hoti? Aniccato upaṭṭhānakusalo hoti, niccato anupaṭṭhānakusalo hoti. Dukkhato upaṭṭhānakusalo hoti, sukhato anupaṭṭhānakusalo hoti. Anattato upaṭṭhānakusalo hoti, attato anupaṭṭhānakusalo hoti. Khayato upaṭṭhānakusalo hoti, ghanato anupaṭṭhānakusalo hoti. Vayato upaṭṭhānakusalo hoti, āyūhanānupaṭṭhānakusalo hoti. Vipariṇāmūpaṭṭhānakusalo hoti, dhuvato anupaṭṭhānakusalo hoti. Animittūpaṭṭhānakusalo hoti, nimittānupaṭṭhānakusalo hoti. Appaṇihitūpaṭṭhānakusalo hoti, paṇidhianupaṭṭhānakusalo 2 hoti. Suññatūpaṭṭhānakusalo hoti, abhinivesānupaṭṭhānakusalo hoti – puthujjano vipassanaṃ bhāvento imehi navahi ākārehi upaṭṭhānakusalo hoti, imehi navahi ākārehi anupaṭṭhānakusalo hoti.
២០៦. សេក្ខោ វិបស្សនំ ភាវេន្តោ កតមេហិ ទសហិ អាការេហិ ឧបដ្ឋានកុសលោ ហោតិ, កតមេហិ ទសហិ អាការេហិ អនុបដ្ឋានកុសលោ ហោតិ? អនិច្ចតោ ឧបដ្ឋានកុសលោ ហោតិ, និច្ចតោ អនុបដ្ឋានកុសលោ ហោតិ…បេ.… សុញ្ញតូបដ្ឋានកុសលោ ហោតិ, អភិនិវេសានូបដ្ឋានកុសលោ ហោតិ។ ញាណូបដ្ឋានកុសលោ ហោតិ, អញាណអនុបដ្ឋានកុសលោ ហោតិ – សេក្ខោ វិបស្សនំ ភាវេន្តោ ឥមេហិ ទសហិ អាការេហិ ឧបដ្ឋានកុសលោ ហោតិ, ឥមេហិ ទសហិ អាការេហិ អនុបដ្ឋានកុសលោ ហោតិ។
206. Sekkho vipassanaṃ bhāvento katamehi dasahi ākārehi upaṭṭhānakusalo hoti, katamehi dasahi ākārehi anupaṭṭhānakusalo hoti? Aniccato upaṭṭhānakusalo hoti, niccato anupaṭṭhānakusalo hoti…pe… suññatūpaṭṭhānakusalo hoti, abhinivesānūpaṭṭhānakusalo hoti. Ñāṇūpaṭṭhānakusalo hoti, añāṇaanupaṭṭhānakusalo hoti – sekkho vipassanaṃ bhāvento imehi dasahi ākārehi upaṭṭhānakusalo hoti, imehi dasahi ākārehi anupaṭṭhānakusalo hoti.
វីតរាគោ វិបស្សនំ ភាវេន្តោ កតមេហិ ទ្វាទសហិ អាការេហិ ឧបដ្ឋានកុសលោ ហោតិ, កតមេហិ ទ្វាទសហិ អាការេហិ អនុបដ្ឋានកុសលោ ហោតិ? អនិច្ចតោ ឧបដ្ឋានកុសលោ ហោតិ, និច្ចតោ អនុបដ្ឋានកុសលោ ហោតិ…បេ.… ញាណូបដ្ឋានកុសលោ ហោតិ, អញាណានុបដ្ឋានកុសលោ ហោតិ។ វិសញ្ញោគូបដ្ឋានកុសលោ ហោតិ, សញ្ញោគានុបដ្ឋានកុសលោ ហោតិ។ និរោធូបដ្ឋានកុសលោ ហោតិ, សង្ខារានុបដ្ឋានកុសលោ ហោតិ – វីតរាគោ វិបស្សនំ ភាវេន្តោ ឥមេហិ ទ្វាទសហិ អាការេហិ ឧបដ្ឋានកុសលោ ហោតិ, ឥមេហិ ទ្វាទសហិ អាការេហិ អនុបដ្ឋានកុសលោ ហោតិ។
Vītarāgo vipassanaṃ bhāvento katamehi dvādasahi ākārehi upaṭṭhānakusalo hoti, katamehi dvādasahi ākārehi anupaṭṭhānakusalo hoti? Aniccato upaṭṭhānakusalo hoti, niccato anupaṭṭhānakusalo hoti…pe… ñāṇūpaṭṭhānakusalo hoti, añāṇānupaṭṭhānakusalo hoti. Visaññogūpaṭṭhānakusalo hoti, saññogānupaṭṭhānakusalo hoti. Nirodhūpaṭṭhānakusalo hoti, saṅkhārānupaṭṭhānakusalo hoti – vītarāgo vipassanaṃ bhāvento imehi dvādasahi ākārehi upaṭṭhānakusalo hoti, imehi dvādasahi ākārehi anupaṭṭhānakusalo hoti.
អាវជ្ជិតត្តា អារម្មណូបដ្ឋានកុសលវសេន ឥន្ទ្រិយានិ សមោធានេតិ, គោចរញ្ច បជានាតិ, សមត្ថញ្ច បដិវិជ្ឈតិ…បេ.… ធម្មេ សមោធានេតិ, គោចរញ្ច បជានាតិ, សមត្ថញ្ច បដិវិជ្ឈតិ។ ឥន្ទ្រិយានិ សមោធានេតីតិ កថំ ឥន្ទ្រិយានិ សមោធានេតិ? អធិមោក្ខដ្ឋេន សទ្ធិន្ទ្រិយំ សមោធានេតិ…បេ.… សមថនិមិត្តូបដ្ឋានកុសលវសេន, បគ្គហនិមិត្តូបដ្ឋានកុសលវសេន, អវិក្ខេបូបដ្ឋានកុសលវសេន, ឱភាសូបដ្ឋានកុសលវសេន, សម្បហំសនូបដ្ឋានកុសលវសេន, ឧបេក្ខូបដ្ឋានកុសលវសេន , ឯកត្តូបដ្ឋានកុសលវសេន, ញាណូបដ្ឋានកុសលវសេន, វិមុត្តូបដ្ឋានកុសលវសេន។
Āvajjitattā ārammaṇūpaṭṭhānakusalavasena indriyāni samodhāneti, gocarañca pajānāti, samatthañca paṭivijjhati…pe… dhamme samodhāneti, gocarañca pajānāti, samatthañca paṭivijjhati. Indriyāni samodhānetīti kathaṃ indriyāni samodhāneti? Adhimokkhaṭṭhena saddhindriyaṃ samodhāneti…pe… samathanimittūpaṭṭhānakusalavasena, paggahanimittūpaṭṭhānakusalavasena, avikkhepūpaṭṭhānakusalavasena, obhāsūpaṭṭhānakusalavasena, sampahaṃsanūpaṭṭhānakusalavasena, upekkhūpaṭṭhānakusalavasena , ekattūpaṭṭhānakusalavasena, ñāṇūpaṭṭhānakusalavasena, vimuttūpaṭṭhānakusalavasena.
អនិច្ចតោ ឧបដ្ឋានកុសលវសេន, និច្ចតោ អនុបដ្ឋានកុសលវសេន, ទុក្ខតោ ឧបដ្ឋានកុសលវសេន, សុខតោ អនុបដ្ឋានកុសលវសេន, អនត្តតោ ឧបដ្ឋានកុសលវសេន, អត្តតោ អនុបដ្ឋានកុសលវសេន, ខយតោ ឧបដ្ឋានកុសលវសេន, ឃនតោ អនុបដ្ឋានកុសលវសេន, វយតោ ឧបដ្ឋានកុសលវសេន, អាយូហនានុបដ្ឋានកុសលវសេន, វិបរិណាមូបដ្ឋានកុសលវសេន, ធុវតោ អនុបដ្ឋានកុសលវសេន, អនិមិត្តូបដ្ឋានកុសលវសេន, និមិត្តានុបដ្ឋានកុសលវសេន, អប្បណិហិតូបដ្ឋានកុសលវសេន, បណិធិអនុបដ្ឋានកុសលវសេន, សុញ្ញតូបដ្ឋានកុសលវសេន, អភិនិវេសានុបដ្ឋានកុសលវសេន, ញាណូបដ្ឋានកុសលវសេន, អញាណានុបដ្ឋានកុសលវសេន, វិសញ្ញោគូបដ្ឋានកុសលវសេន, សញ្ញោគានុបដ្ឋានកុសលវសេន , និរោធូបដ្ឋានកុសលវសេន, សង្ខារានុបដ្ឋានកុសលវសេន ឥន្ទ្រិយានិ សមោធានេតិ, គោចរញ្ច បជានាតិ, សមត្ថញ្ច បដិវិជ្ឈតិ។
Aniccato upaṭṭhānakusalavasena, niccato anupaṭṭhānakusalavasena, dukkhato upaṭṭhānakusalavasena, sukhato anupaṭṭhānakusalavasena, anattato upaṭṭhānakusalavasena, attato anupaṭṭhānakusalavasena, khayato upaṭṭhānakusalavasena, ghanato anupaṭṭhānakusalavasena, vayato upaṭṭhānakusalavasena, āyūhanānupaṭṭhānakusalavasena, vipariṇāmūpaṭṭhānakusalavasena, dhuvato anupaṭṭhānakusalavasena, animittūpaṭṭhānakusalavasena, nimittānupaṭṭhānakusalavasena, appaṇihitūpaṭṭhānakusalavasena, paṇidhianupaṭṭhānakusalavasena, suññatūpaṭṭhānakusalavasena, abhinivesānupaṭṭhānakusalavasena, ñāṇūpaṭṭhānakusalavasena, añāṇānupaṭṭhānakusalavasena, visaññogūpaṭṭhānakusalavasena, saññogānupaṭṭhānakusalavasena , nirodhūpaṭṭhānakusalavasena, saṅkhārānupaṭṭhānakusalavasena indriyāni samodhāneti, gocarañca pajānāti, samatthañca paṭivijjhati.
២០៧. ចតុសដ្ឋិយា អាការេហិ តិណ្ណន្នំ ឥន្ទ្រិយានំ វសីភាវតាបញ្ញា អាសវានំ ខយេ ញាណំ។ កតមេសំ តិណ្ណន្នំ ឥន្ទ្រិយានំ? អនញ្ញាតញ្ញស្សាមីតិន្ទ្រិយស្ស, អញ្ញិន្ទ្រិយស្ស, អញ្ញាតាវិន្ទ្រិយស្ស។
207. Catusaṭṭhiyā ākārehi tiṇṇannaṃ indriyānaṃ vasībhāvatāpaññā āsavānaṃ khaye ñāṇaṃ. Katamesaṃ tiṇṇannaṃ indriyānaṃ? Anaññātaññassāmītindriyassa, aññindriyassa, aññātāvindriyassa.
អនញ្ញាតញ្ញស្សាមីតិន្ទ្រិយំ កតិ ឋានានិ គច្ឆតិ? អញ្ញិន្ទ្រិយំ កតិ ឋានានិ គច្ឆតិ? អញ្ញាតាវិន្ទ្រិយំ កតិ ឋានានិ គច្ឆតិ? អនញ្ញាតញ្ញស្សាមីតិន្ទ្រិយំ ឯកំ ឋានំ គច្ឆតិ – សោតាបត្តិមគ្គំ។ អញ្ញិន្ទ្រិយំ ឆ ឋានានិ គច្ឆតិ – សោតាបត្តិផលំ, សកទាគាមិមគ្គំ, សកទាគាមិផលំ, អនាគាមិមគ្គំ, អនាគាមិផលំ, អរហត្តមគ្គំ។ អញ្ញាតាវិន្ទ្រិយំ ឯកំ ឋានំ គច្ឆតិ – អរហត្តផលំ។
Anaññātaññassāmītindriyaṃ kati ṭhānāni gacchati? Aññindriyaṃ kati ṭhānāni gacchati? Aññātāvindriyaṃ kati ṭhānāni gacchati? Anaññātaññassāmītindriyaṃ ekaṃ ṭhānaṃ gacchati – sotāpattimaggaṃ. Aññindriyaṃ cha ṭhānāni gacchati – sotāpattiphalaṃ, sakadāgāmimaggaṃ, sakadāgāmiphalaṃ, anāgāmimaggaṃ, anāgāmiphalaṃ, arahattamaggaṃ. Aññātāvindriyaṃ ekaṃ ṭhānaṃ gacchati – arahattaphalaṃ.
សោតាបត្តិមគ្គក្ខណេ អនញ្ញាតញ្ញស្សាមីតិន្ទ្រិយស្ស សទ្ធិន្ទ្រិយំ អធិមោក្ខបរិវារំ ហោតិ, វីរិយិន្ទ្រិយំ បគ្គហបរិវារំ ហោតិ, សតិន្ទ្រិយំ ឧបដ្ឋានបរិវារំ ហោតិ, សមាធិន្ទ្រិយំ អវិក្ខេបបរិវារំ ហោតិ, បញ្ញិន្ទ្រិយំ ទស្សនបរិវារំ ហោតិ, មនិន្ទ្រិយំ វិជាននបរិវារំ ហោតិ, សោមនស្សិន្ទ្រិយំ អភិសន្ទនបរិវារំ ហោតិ, ជីវិតិន្ទ្រិយំ បវត្តសន្តតាធិបតេយ្យបរិវារំ ហោតិ។ សោតាបត្តិមគ្គក្ខណេ ជាតា ធម្មា, ឋបេត្វា ចិត្តសមុដ្ឋានំ រូបំ, សព្ពេវ កុសលា ហោន្តិ, សព្ពេវ អនាសវា ហោន្តិ, សព្ពេវ និយ្យានិកា ហោន្តិ, សព្ពេវ អបចយគាមិនោ ហោន្តិ, សព្ពេវ លោកុត្តរា ហោន្តិ, សព្ពេវ និព្ពានារម្មណា ហោន្តិ។ សោតាបត្តិមគ្គក្ខណេ អនញ្ញាតញ្ញស្សាមីតិន្ទ្រិយស្ស ឥមានិ អដ្ឋិន្ទ្រិយានិ សហជាតបរិវារា ហោន្តិ, អញ្ញមញ្ញបរិវារា ហោន្តិ, និស្សយបរិវារា ហោន្តិ, សម្បយុត្តបរិវារា ហោន្តិ, សហគតា ហោន្តិ, សហជាតា ហោន្តិ, សំសដ្ឋា ហោន្តិ, សម្បយុត្តា ហោន្តិ។ តេវ តស្ស អាការា ចេវ ហោន្តិ បរិវារា ច។
Sotāpattimaggakkhaṇe anaññātaññassāmītindriyassa saddhindriyaṃ adhimokkhaparivāraṃ hoti, vīriyindriyaṃ paggahaparivāraṃ hoti, satindriyaṃ upaṭṭhānaparivāraṃ hoti, samādhindriyaṃ avikkhepaparivāraṃ hoti, paññindriyaṃ dassanaparivāraṃ hoti, manindriyaṃ vijānanaparivāraṃ hoti, somanassindriyaṃ abhisandanaparivāraṃ hoti, jīvitindriyaṃ pavattasantatādhipateyyaparivāraṃ hoti. Sotāpattimaggakkhaṇe jātā dhammā, ṭhapetvā cittasamuṭṭhānaṃ rūpaṃ, sabbeva kusalā honti, sabbeva anāsavā honti, sabbeva niyyānikā honti, sabbeva apacayagāmino honti, sabbeva lokuttarā honti, sabbeva nibbānārammaṇā honti. Sotāpattimaggakkhaṇe anaññātaññassāmītindriyassa imāni aṭṭhindriyāni sahajātaparivārā honti, aññamaññaparivārā honti, nissayaparivārā honti, sampayuttaparivārā honti, sahagatā honti, sahajātā honti, saṃsaṭṭhā honti, sampayuttā honti. Teva tassa ākārā ceva honti parivārā ca.
សោតាបត្តិផលក្ខណេ…បេ.… អរហត្តផលក្ខណេ អញ្ញាតាវិន្ទ្រិយស្ស សទ្ធិន្ទ្រិយំ អធិមោក្ខបរិវារំ ហោតិ…បេ.… ជីវិតិន្ទ្រិយំ បវត្តសន្តតាធិបតេយ្យបរិវារំ ហោតិ។ អរហត្តផលក្ខណេ ជាតា ធម្មា សព្ពេវ អព្យាកតា ហោន្តិ, ឋបេត្វា ចិត្តសមុដ្ឋានំ រូបំ សព្ពេវ អនាសវា ហោន្តិ, សព្ពេវ លោកុត្តរា ហោន្តិ, សព្ពេវ និព្ពានារម្មណា ហោន្តិ។ អរហត្តផលក្ខណេ អញ្ញាតាវិន្ទ្រិយស្ស ឥមានិ អដ្ឋិន្ទ្រិយានិ សហជាតបរិវារា ហោន្តិ ។ តេវ តស្ស អាការា ចេវ ហោន្តិ បរិវារា ច។ ឥតិ ឥមានិ អដ្ឋ អដ្ឋកានិ ចតុសដ្ឋិ ហោន្តិ។
Sotāpattiphalakkhaṇe…pe… arahattaphalakkhaṇe aññātāvindriyassa saddhindriyaṃ adhimokkhaparivāraṃ hoti…pe… jīvitindriyaṃ pavattasantatādhipateyyaparivāraṃ hoti. Arahattaphalakkhaṇe jātā dhammā sabbeva abyākatā honti, ṭhapetvā cittasamuṭṭhānaṃ rūpaṃ sabbeva anāsavā honti, sabbeva lokuttarā honti, sabbeva nibbānārammaṇā honti. Arahattaphalakkhaṇe aññātāvindriyassa imāni aṭṭhindriyāni sahajātaparivārā honti . Teva tassa ākārā ceva honti parivārā ca. Iti imāni aṭṭha aṭṭhakāni catusaṭṭhi honti.
អាសវាតិ កតមេ តេ អាសវា? កាមាសវោ, ភវាសវោ, ទិដ្ឋាសវោ, អវិជ្ជាសវោ។ កត្ថេតេ អាសវា ខីយន្តិ 3? សោតាបត្តិមគ្គេន អនវសេសោ ទិដ្ឋាសវោ ខីយតិ។ អបាយគមនីយោ កាមាសវោ ខីយតិ, អបាយគមនីយោ ភវាសវោ ខីយតិ, អបាយគមនីយោ អវិជ្ជាសវោ ខីយតិ។ ឯត្ថេតេ អាសវា ខីយន្តិ។ សកទាគាមិមគ្គេន ឱឡារិកោ កាមាសវោ ខីយតិ, តទេកដ្ឋោ ភវាសវោ ខីយតិ, តទេកដ្ឋោ អវិជ្ជាសវោ ខីយតិ។ ឯត្ថេតេ អាសវា ខីយន្តិ។ អនាគាមិមគ្គេន អនវសេសោ កាមាសវោ ខីយតិ, តទេកដ្ឋោ ភវាសវោ ខីយតិ, តទេកដ្ឋោ អវិជ្ជាសវោ ខីយតិ។ ឯត្ថេតេ អាសវា ខីយន្តិ។ អរហត្តមគ្គេន អនវសេសោ ភវាសវោ ខីយតិ, អនវសេសោ អវិជ្ជាសវោ ខីយតិ។ ឯត្ថេតេ អាសវា ខីយន្តិ។
Āsavāti katame te āsavā? Kāmāsavo, bhavāsavo, diṭṭhāsavo, avijjāsavo. Katthete āsavā khīyanti 4? Sotāpattimaggena anavaseso diṭṭhāsavo khīyati. Apāyagamanīyo kāmāsavo khīyati, apāyagamanīyo bhavāsavo khīyati, apāyagamanīyo avijjāsavo khīyati. Etthete āsavā khīyanti. Sakadāgāmimaggena oḷāriko kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Anāgāmimaggena anavaseso kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Arahattamaggena anavaseso bhavāsavo khīyati, anavaseso avijjāsavo khīyati. Etthete āsavā khīyanti.
២០៨.
208.
ន តស្ស អទ្ទិដ្ឋមិធត្ថិ កិញ្ចិ, អថោ អវិញ្ញាតមជានិតព្ពំ;
Na tassa addiṭṭhamidhatthi kiñci, atho aviññātamajānitabbaṃ;
សព្ពំ អភិញ្ញាសិ យទត្ថិ នេយ្យំ, តថាគតោ តេន សមន្តចក្ខូតិ។
Sabbaṃ abhiññāsi yadatthi neyyaṃ, tathāgato tena samantacakkhūti.
សមន្តចក្ខូតិ កេនដ្ឋេន សមន្តចក្ខុ? ចុទ្ទស ពុទ្ធញាណានិ – ទុក្ខេ ញាណំ ពុទ្ធញាណំ, ទុក្ខសមុទយេ ញាណំ ពុទ្ធញាណំ…បេ.… សព្ពញ្ញុតញាណំ ពុទ្ធញាណំ, អនាវរណញាណំ ពុទ្ធញាណំ។ ឥមានិ ចុទ្ទស ពុទ្ធញាណានិ។ ឥមេសំ ចុទ្ទសន្នំ ពុទ្ធញាណានំ អដ្ឋ ញាណានិ សាវកសាធារណានិ, ឆ ញាណានិ អសាធារណានិ សាវកេហិ។
Samantacakkhūti kenaṭṭhena samantacakkhu? Cuddasa buddhañāṇāni – dukkhe ñāṇaṃ buddhañāṇaṃ, dukkhasamudaye ñāṇaṃ buddhañāṇaṃ…pe… sabbaññutañāṇaṃ buddhañāṇaṃ, anāvaraṇañāṇaṃ buddhañāṇaṃ. Imāni cuddasa buddhañāṇāni. Imesaṃ cuddasannaṃ buddhañāṇānaṃ aṭṭha ñāṇāni sāvakasādhāraṇāni, cha ñāṇāni asādhāraṇāni sāvakehi.
យាវតា ទុក្ខស្ស ទុក្ខដ្ឋោ ញាតោ, អញ្ញាតោ ទុក្ខដ្ឋោ នត្ថីតិ – សមន្តចក្ខុ។ យំ សមន្តចក្ខុ តំ បញ្ញិន្ទ្រិយំ។ បញ្ញិន្ទ្រិយស្ស វសេន អធិមោក្ខដ្ឋេន សទ្ធិន្ទ្រិយំ, បគ្គហដ្ឋេន វីរិយិន្ទ្រិយំ, ឧបដ្ឋានដ្ឋេន សតិន្ទ្រិយំ, អវិក្ខេបដ្ឋេន សមាធិន្ទ្រិយំ។ យាវតា ទុក្ខស្ស ទុក្ខដ្ឋោ ទិដ្ឋោ វិទិតោ សច្ឆិកតោ ផស្សិតោ បញ្ញាយ; អផស្សិតោ បញ្ញាយ ទុក្ខដ្ឋោ នត្ថីតិ – សមន្តចក្ខុ។ យំ សមន្តចក្ខុ តំ បញ្ញិន្ទ្រិយំ។ បញ្ញិន្ទ្រិយស្ស វសេន អធិមោក្ខដ្ឋេន សទ្ធិន្ទ្រិយំ, បគ្គហដ្ឋេន វីរិយិន្ទ្រិយំ, ឧបដ្ឋានដ្ឋេន សតិន្ទ្រិយំ, អវិក្ខេបដ្ឋេន សមាធិន្ទ្រិយំ។ យាវតា សមុទយស្ស សមុទយដ្ឋោ…បេ.… យាវតា និរោធស្ស និរោធដ្ឋោ… យាវតា មគ្គស្ស មគ្គដ្ឋោ… យាវតា អត្ថបដិសម្ភិទាយ អត្ថបដិសម្ភិទដ្ឋោ… យាវតា ធម្មបដិសម្ភិទាយ ធម្មបដិសម្ភិទដ្ឋោ… យាវតា និរុត្តិបដិសម្ភិទាយ និរុត្តិបដិសម្ភិទដ្ឋោ… យាវតា បដិភានបដិសម្ភិទាយ បដិភានបដិសម្ភិទដ្ឋោ… យាវតា ឥន្ទ្រិយបរោបរិយត្តេ ញាណំ… យាវតា សត្តានំ អាសយានុសយេ ញាណំ… យាវតា យមកបាដិហីរេ ញាណំ… យាវតា មហាករុណាសមាបត្តិយា ញាណំ… យាវតា សទេវកស្ស លោកស្ស សមារកស្ស សព្រហ្មកស្ស សស្សមណព្រាហ្មណិយា បជាយ សទេវមនុស្សាយ ទិដ្ឋំ សុតំ មុតំ វិញ្ញាតំ បត្តំ បរិយេសិតំ អនុវិចរិតំ មនសា, តំ ញាតំ ទិដ្ឋំ វិទិតំ សច្ឆិកតំ ផស្សិតំ បញ្ញាយ។ អផស្សិតំ បញ្ញាយ នត្ថីតិ – សមន្តចក្ខុ។ យំ សមន្តចក្ខុ តំ បញ្ញិន្ទ្រិយំ។ បញ្ញិន្ទ្រិយស្ស វសេន អធិមោក្ខដ្ឋេន សទ្ធិន្ទ្រិយំ, បគ្គហដ្ឋេន វីរិយិន្ទ្រិយំ, ឧបដ្ឋានដ្ឋេន សតិន្ទ្រិយំ, អវិក្ខេបដ្ឋេន សមាធិន្ទ្រិយំ។
Yāvatā dukkhassa dukkhaṭṭho ñāto, aññāto dukkhaṭṭho natthīti – samantacakkhu. Yaṃ samantacakkhu taṃ paññindriyaṃ. Paññindriyassa vasena adhimokkhaṭṭhena saddhindriyaṃ, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ. Yāvatā dukkhassa dukkhaṭṭho diṭṭho vidito sacchikato phassito paññāya; aphassito paññāya dukkhaṭṭho natthīti – samantacakkhu. Yaṃ samantacakkhu taṃ paññindriyaṃ. Paññindriyassa vasena adhimokkhaṭṭhena saddhindriyaṃ, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ. Yāvatā samudayassa samudayaṭṭho…pe… yāvatā nirodhassa nirodhaṭṭho… yāvatā maggassa maggaṭṭho… yāvatā atthapaṭisambhidāya atthapaṭisambhidaṭṭho… yāvatā dhammapaṭisambhidāya dhammapaṭisambhidaṭṭho… yāvatā niruttipaṭisambhidāya niruttipaṭisambhidaṭṭho… yāvatā paṭibhānapaṭisambhidāya paṭibhānapaṭisambhidaṭṭho… yāvatā indriyaparopariyatte ñāṇaṃ… yāvatā sattānaṃ āsayānusaye ñāṇaṃ… yāvatā yamakapāṭihīre ñāṇaṃ… yāvatā mahākaruṇāsamāpattiyā ñāṇaṃ… yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, taṃ ñātaṃ diṭṭhaṃ viditaṃ sacchikataṃ phassitaṃ paññāya. Aphassitaṃ paññāya natthīti – samantacakkhu. Yaṃ samantacakkhu taṃ paññindriyaṃ. Paññindriyassa vasena adhimokkhaṭṭhena saddhindriyaṃ, paggahaṭṭhena vīriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ.
សទ្ទហន្តោ បគ្គណ្ហាតិ, បគ្គណ្ហន្តោ សទ្ទហតិ។ សទ្ទហន្តោ ឧបដ្ឋាបេតិ, ឧបដ្ឋាបេន្តោ សទ្ទហតិ។ សទ្ទហន្តោ សមាទហតិ, សមាទហន្តោ សទ្ទហតិ។ សទ្ទហន្តោ បជានាតិ, បជានន្តោ សទ្ទហតិ។ បគ្គណ្ហន្តោ ឧបដ្ឋាបេតិ, ឧបដ្ឋាបេន្តោ បគ្គណ្ហាតិ។ បគ្គណ្ហន្តោ សមាទហតិ, សមាទហន្តោ បគ្គណ្ហាតិ។ បគ្គណ្ហន្តោ បជានាតិ, បជានន្តោ បគ្គណ្ហាតិ។ បគ្គណ្ហន្តោ សទ្ទហតិ, សទ្ទហន្តោ បគ្គណ្ហាតិ។ ឧបដ្ឋាបេន្តោ សមាទហតិ, សមាទហន្តោ ឧបដ្ឋាបេតិ។ ឧបដ្ឋាបេន្តោ បជានាតិ, បជានន្តោ ឧបដ្ឋាបេតិ។ ឧបដ្ឋាបេន្តោ សទ្ទហតិ, សទ្ទហន្តោ ឧបដ្ឋាបេតិ។ ឧបដ្ឋាបេន្តោ បគ្គណ្ហាតិ, បគ្គណ្ហន្តោ ឧបដ្ឋាបេតិ។ សមាទហន្តោ បជានាតិ, បជានន្តោ សមាទហតិ។ សមាទហន្តោ សទ្ទហតិ, សទ្ទហន្តោ សមាទហតិ។ សមាទហន្តោ បគ្គណ្ហាតិ, បគ្គណ្ហន្តោ សមាទហតិ។ សមាទហន្តោ ឧបដ្ឋាបេតិ, ឧបដ្ឋាបេន្តោ សមាទហតិ។ បជានន្តោ សទ្ទហតិ, សទ្ទហន្តោ បជានាតិ។ បជានន្តោ បគ្គណ្ហាតិ, បគ្គណ្ហន្តោ បជានាតិ។ បជានន្តោ ឧបដ្ឋាបេតិ, ឧបដ្ឋាបេន្តោ បជានាតិ។ បជានន្តោ សមាទហតិ, សមាទហន្តោ បជានាតិ។
Saddahanto paggaṇhāti, paggaṇhanto saddahati. Saddahanto upaṭṭhāpeti, upaṭṭhāpento saddahati. Saddahanto samādahati, samādahanto saddahati. Saddahanto pajānāti, pajānanto saddahati. Paggaṇhanto upaṭṭhāpeti, upaṭṭhāpento paggaṇhāti. Paggaṇhanto samādahati, samādahanto paggaṇhāti. Paggaṇhanto pajānāti, pajānanto paggaṇhāti. Paggaṇhanto saddahati, saddahanto paggaṇhāti. Upaṭṭhāpento samādahati, samādahanto upaṭṭhāpeti. Upaṭṭhāpento pajānāti, pajānanto upaṭṭhāpeti. Upaṭṭhāpento saddahati, saddahanto upaṭṭhāpeti. Upaṭṭhāpento paggaṇhāti, paggaṇhanto upaṭṭhāpeti. Samādahanto pajānāti, pajānanto samādahati. Samādahanto saddahati, saddahanto samādahati. Samādahanto paggaṇhāti, paggaṇhanto samādahati. Samādahanto upaṭṭhāpeti, upaṭṭhāpento samādahati. Pajānanto saddahati, saddahanto pajānāti. Pajānanto paggaṇhāti, paggaṇhanto pajānāti. Pajānanto upaṭṭhāpeti, upaṭṭhāpento pajānāti. Pajānanto samādahati, samādahanto pajānāti.
សទ្ទហិតត្តា បគ្គហិតំ, បគ្គហិតត្តា សទ្ទហិតំ។ សទ្ទហិតត្តា ឧបដ្ឋាបិតំ, ឧបដ្ឋាបិតត្តា សទ្ទហិតំ។ សទ្ទហិតត្តា សមាទហិតំ, សមាទហិតត្តា សទ្ទហិតំ។ សទ្ទហិតត្តា បជានិតំ, បជានិតត្តា សទ្ទហិតំ។ បគ្គហិតត្តា ឧបដ្ឋាបិតំ , ឧបដ្ឋាបិតត្តា បគ្គហិតំ។ បគ្គហិតត្តា សមាទហិតំ, សមាទហិតត្តា បគ្គហិតំ។ បគ្គហិតត្តា បជានិតំ បជានិតត្តា បគ្គហិតំ។ បគ្គហិតត្តា សទ្ទហិតំ, សទ្ទហិតត្តា បគ្គហិតំ។ ឧបដ្ឋាបិតត្តា សមាទហិតំ, សមាទហិតត្តា ឧបដ្ឋាបិតំ។ ឧបដ្ឋាបិតត្តា បជានិតំ, បជានិតត្តា ឧបដ្ឋាបិតំ។ ឧបដ្ឋាបិតត្តា សទ្ទហិតំ, សទ្ទហិតត្តា ឧបដ្ឋាបិតំ។ ឧបដ្ឋាបិតត្តា បគ្គហិតំ, បគ្គហិតត្តា ឧបដ្ឋាបិតំ។ សមាទហិតត្តា បជានិតំ, បជានិតត្តា សមាទហិតំ។ សមាទហិតត្តា សទ្ទហិតំ, សទ្ទហិតត្តា សមាទហិតំ។ សមាទហិតត្តា បគ្គហិតំ, បគ្គហិតត្តា សមាទហិតំ។ សមាទហិតត្តា ឧបដ្ឋាបិតំ, ឧបដ្ឋាបិតត្តា សមាទហិតំ។ បជានិតត្តា សទ្ទហិតំ, សទ្ទហិតត្តា បជានិតំ។ បជានិតត្តា បគ្គហិតំ, បគ្គហិតត្តា បជានិតំ។ បជានិតត្តា ឧបដ្ឋាបិតំ, ឧបដ្ឋាបិតត្តា បជានិតំ។ បជានិតត្តា សមាទហិតំ, សមាទហិតត្តា បជានិតំ។
Saddahitattā paggahitaṃ, paggahitattā saddahitaṃ. Saddahitattā upaṭṭhāpitaṃ, upaṭṭhāpitattā saddahitaṃ. Saddahitattā samādahitaṃ, samādahitattā saddahitaṃ. Saddahitattā pajānitaṃ, pajānitattā saddahitaṃ. Paggahitattā upaṭṭhāpitaṃ , upaṭṭhāpitattā paggahitaṃ. Paggahitattā samādahitaṃ, samādahitattā paggahitaṃ. Paggahitattā pajānitaṃ pajānitattā paggahitaṃ. Paggahitattā saddahitaṃ, saddahitattā paggahitaṃ. Upaṭṭhāpitattā samādahitaṃ, samādahitattā upaṭṭhāpitaṃ. Upaṭṭhāpitattā pajānitaṃ, pajānitattā upaṭṭhāpitaṃ. Upaṭṭhāpitattā saddahitaṃ, saddahitattā upaṭṭhāpitaṃ. Upaṭṭhāpitattā paggahitaṃ, paggahitattā upaṭṭhāpitaṃ. Samādahitattā pajānitaṃ, pajānitattā samādahitaṃ. Samādahitattā saddahitaṃ, saddahitattā samādahitaṃ. Samādahitattā paggahitaṃ, paggahitattā samādahitaṃ. Samādahitattā upaṭṭhāpitaṃ, upaṭṭhāpitattā samādahitaṃ. Pajānitattā saddahitaṃ, saddahitattā pajānitaṃ. Pajānitattā paggahitaṃ, paggahitattā pajānitaṃ. Pajānitattā upaṭṭhāpitaṃ, upaṭṭhāpitattā pajānitaṃ. Pajānitattā samādahitaṃ, samādahitattā pajānitaṃ.
យំ ពុទ្ធចក្ខុ តំ ពុទ្ធញាណំ, យំ ពុទ្ធញាណំ តំ ពុទ្ធចក្ខុ, យេន ចក្ខុនា តថាគតោ សត្តេ បស្សតិ អប្បរជក្ខេ មហារជក្ខេ តិក្ខិន្ទ្រិយេ មុទិន្ទ្រិយេ ស្វាការេ ទ្វាការេ សុវិញ្ញាបយេ ទុវិញ្ញាបយេ អប្បេកច្ចេ បរលោកវជ្ជភយទស្សាវិនោ 5, អប្បេកច្ចេ នបរលោកវជ្ជភយទស្សាវិនោ។
Yaṃ buddhacakkhu taṃ buddhañāṇaṃ, yaṃ buddhañāṇaṃ taṃ buddhacakkhu, yena cakkhunā tathāgato satte passati apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino 6, appekacce naparalokavajjabhayadassāvino.
អប្បរជក្ខេ មហារជក្ខេតិ សទ្ធោ បុគ្គលោ អប្បរជក្ខោ, អស្សទ្ធោ បុគ្គលោ មហារជក្ខោ។ អារទ្ធវីរិយោ បុគ្គលោ អប្បរជក្ខោ, កុសីតោ បុគ្គលោ មហារជក្ខោ។ ឧបដ្ឋិតស្សតិ បុគ្គលោ អប្បរជក្ខោ, មុដ្ឋស្សតិ បុគ្គលោ មហារជក្ខោ។ សមាហិតោ បុគ្គលោ អប្បរជក្ខោ, អសមាហិតោ បុគ្គលោ មហារជក្ខោ។ បញ្ញវា បុគ្គលោ អប្បរជក្ខោ, ទុប្បញ្ញោ បុគ្គលោ មហារជក្ខោ។
Apparajakkhe mahārajakkheti saddho puggalo apparajakkho, assaddho puggalo mahārajakkho. Āraddhavīriyo puggalo apparajakkho, kusīto puggalo mahārajakkho. Upaṭṭhitassati puggalo apparajakkho, muṭṭhassati puggalo mahārajakkho. Samāhito puggalo apparajakkho, asamāhito puggalo mahārajakkho. Paññavā puggalo apparajakkho, duppañño puggalo mahārajakkho.
តិក្ខិន្ទ្រិយេ មុទិន្ទ្រិយេតិ សទ្ធោ បុគ្គលោ តិក្ខិន្ទ្រិយោ, អស្សទ្ធោ បុគ្គលោ មុទិន្ទ្រិយោ…បេ.… បញ្ញវា បុគ្គលោ តិក្ខិន្ទ្រិយោ, ទុប្បញ្ញោ បុគ្គលោ មុទិន្ទ្រិយោ។ ស្វាការេ ទ្វាការេតិ សទ្ធោ បុគ្គលោ ស្វាការោ, អស្សទ្ធោ បុគ្គលោ ទ្វាការោ…បេ.… បញ្ញវា បុគ្គលោ ស្វាការោ, ទុប្បញ្ញោ បុគ្គលោ ទ្វាការោ។ សុវិញ្ញាបយេ ទុវិញ្ញាបយេតិ សទ្ធោ បុគ្គលោ សុវិញ្ញាបយោ, អស្សទ្ធោ បុគ្គលោ ទុវិញ្ញាបយោ…បេ.… បញ្ញវា បុគ្គលោ សុវិញ្ញាបយោ, ទុប្បញ្ញោ បុគ្គលោ ទុវិញ្ញាបយោ។
Tikkhindriye mudindriyeti saddho puggalo tikkhindriyo, assaddho puggalo mudindriyo…pe… paññavā puggalo tikkhindriyo, duppañño puggalo mudindriyo. Svākāre dvākāreti saddho puggalo svākāro, assaddho puggalo dvākāro…pe… paññavā puggalo svākāro, duppañño puggalo dvākāro. Suviññāpaye duviññāpayeti saddho puggalo suviññāpayo, assaddho puggalo duviññāpayo…pe… paññavā puggalo suviññāpayo, duppañño puggalo duviññāpayo.
អប្បេកច្ចេ បរលោកវជ្ជភយទស្សាវិនោ, អប្បេកច្ចេ នបរលោកវជ្ជភយទស្សាវិនោតិ សទ្ធោ បុគ្គលោ បរលោកវជ្ជភយទស្សាវី, អស្សទ្ធោ បុគ្គលោ នបរលោកវជ្ជភយទស្សាវី។ អារទ្ធវីរិយោ បុគ្គលោ បរលោកវជ្ជភយទស្សាវី , កុសីតោ បុគ្គលោ នបរលោកវជ្ជភយទស្សាវី…បេ.… បញ្ញវា បុគ្គលោ បរលោកវជ្ជភយទស្សាវី, ទុប្បញ្ញោ បុគ្គលោ នបរលោកវជ្ជភយទស្សាវី។
Appekacceparalokavajjabhayadassāvino, appekacce naparalokavajjabhayadassāvinoti saddho puggalo paralokavajjabhayadassāvī, assaddho puggalo naparalokavajjabhayadassāvī. Āraddhavīriyo puggalo paralokavajjabhayadassāvī , kusīto puggalo naparalokavajjabhayadassāvī…pe… paññavā puggalo paralokavajjabhayadassāvī, duppañño puggalo naparalokavajjabhayadassāvī.
លោកោតិ ខន្ធលោកោ ធាតុលោកោ អាយតនលោកោ វិបត្តិភវលោកោ វិបត្តិសម្ភវលោកោ សម្បត្តិភវលោកោ សម្បត្តិសម្ភវលោកោ។
Lokoti khandhaloko dhātuloko āyatanaloko vipattibhavaloko vipattisambhavaloko sampattibhavaloko sampattisambhavaloko.
ឯកោ លោកោ – សព្ពេ សត្តា អាហារដ្ឋិតិកា។ ទ្វេ លោកា – នាមញ្ច រូបញ្ច។ តយោ លោកា – តិស្សោ វេទនា។ ចត្តារោ លោកា – ចត្តារោ អាហារា។ បញ្ច លោកា – បញ្ចុបាទានក្ខន្ធា។ ឆ លោកា – ឆ អជ្ឈត្តិកានិ អាយតនានិ។ សត្ត លោកា – សត្ត វិញ្ញាណដ្ឋិតិយោ។ អដ្ឋ លោកា – អដ្ឋ លោកធម្មា។ នវ លោកា – នវ សត្តាវាសា។ ទស លោកា – ទសាយតនានិ។ ទ្វាទស លោកា – ទ្វាទសាយតនានិ។ អដ្ឋារស លោកា – អដ្ឋារស ធាតុយោ។
Eko loko – sabbe sattā āhāraṭṭhitikā. Dve lokā – nāmañca rūpañca. Tayo lokā – tisso vedanā. Cattāro lokā – cattāro āhārā. Pañca lokā – pañcupādānakkhandhā. Cha lokā – cha ajjhattikāni āyatanāni. Satta lokā – satta viññāṇaṭṭhitiyo. Aṭṭha lokā – aṭṭha lokadhammā. Nava lokā – nava sattāvāsā. Dasa lokā – dasāyatanāni. Dvādasa lokā – dvādasāyatanāni. Aṭṭhārasa lokā – aṭṭhārasa dhātuyo.
វជ្ជន្តិ សព្ពេ កិលេសា វជ្ជា, សព្ពេ ទុច្ចរិតា វជ្ជា, សព្ពេ អភិសង្ខារា វជ្ជា, សព្ពេ ភវគាមិកម្មា វជ្ជា។ ឥតិ ឥមស្មិញ្ច លោកេ ឥមស្មិញ្ច វជ្ជេ តិព្ពា ភយសញ្ញា បច្ចុបដ្ឋិតា ហោន្តិ, សេយ្យថាបិ ឧក្ខិត្តាសិកេ វធកេ។ ឥមេហិ បញ្ញាសាយ អាការេហិ ឥមានិ បញ្ចិន្ទ្រិយានិ ជានាតិ បស្សតិ អញ្ញាតិ បដិវិជ្ឈតីតិ។
Vajjanti sabbe kilesā vajjā, sabbe duccaritā vajjā, sabbe abhisaṅkhārā vajjā, sabbe bhavagāmikammā vajjā. Iti imasmiñca loke imasmiñca vajje tibbā bhayasaññā paccupaṭṭhitā honti, seyyathāpi ukkhittāsike vadhake. Imehi paññāsāya ākārehi imāni pañcindriyāni jānāti passati aññāti paṭivijjhatīti.
ឥន្ទ្រិយសមោធានោ បញ្ចមោ។
Indriyasamodhāno pañcamo.
តតិយភាណវារោ។
Tatiyabhāṇavāro.
ឥន្ទ្រិយកថា និដ្ឋិតា។
Indriyakathā niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៥. ឥន្ទ្រិយសមោធានវណ្ណនា • 5. Indriyasamodhānavaṇṇanā
