| Library / Tipiṭaka / តិបិដក • Tipiṭaka / ថេរីគាថាបាឡិ • Therīgāthāpāḷi |
៧. គុត្តាថេរីគាថា
7. Guttātherīgāthā
១៦៣.
163.
‘‘គុត្តេ យទត្ថំ បព្ពជ្ជា, ហិត្វា បុត្តំ វសុំ បិយំ;
‘‘Gutte yadatthaṃ pabbajjā, hitvā puttaṃ vasuṃ piyaṃ;
តមេវ អនុព្រូហេហិ, មា ចិត្តស្ស វសំ គមិ។
Tameva anubrūhehi, mā cittassa vasaṃ gami.
១៦៤.
164.
‘‘ចិត្តេន វញ្ចិតា សត្តា, មារស្ស វិសយេ រតា;
‘‘Cittena vañcitā sattā, mārassa visaye ratā;
អនេកជាតិសំសារំ, សន្ធាវន្តិ អវិទ្ទសូ។
Anekajātisaṃsāraṃ, sandhāvanti aviddasū.
១៦៥.
165.
‘‘កាមច្ឆន្ទញ្ច ព្យាបាទំ, សក្កាយទិដ្ឋិមេវ ច;
‘‘Kāmacchandañca byāpādaṃ, sakkāyadiṭṭhimeva ca;
សីលព្ពតបរាមាសំ, វិចិកិច្ឆញ្ច បញ្ចមំ។
Sīlabbataparāmāsaṃ, vicikicchañca pañcamaṃ.
១៦៦.
166.
‘‘សំយោជនានិ ឯតានិ, បជហិត្វាន ភិក្ខុនី;
‘‘Saṃyojanāni etāni, pajahitvāna bhikkhunī;
ឱរម្ភាគមនីយានិ, នយិទំ បុនរេហិសិ។
Orambhāgamanīyāni, nayidaṃ punarehisi.
១៦៧.
167.
‘‘រាគំ មានំ អវិជ្ជញ្ច, ឧទ្ធច្ចញ្ច វិវជ្ជិយ;
‘‘Rāgaṃ mānaṃ avijjañca, uddhaccañca vivajjiya;
សំយោជនានិ ឆេត្វាន, ទុក្ខស្សន្តំ ករិស្សសិ។
Saṃyojanāni chetvāna, dukkhassantaṃ karissasi.
១៦៨.
168.
‘‘ខេបេត្វា ជាតិសំសារំ, បរិញ្ញាយ បុនព្ភវំ;
‘‘Khepetvā jātisaṃsāraṃ, pariññāya punabbhavaṃ;
ទិដ្ឋេវ ធម្មេ និច្ឆាតា, ឧបសន្តា ចរិស្សតី’’តិ។
Diṭṭheva dhamme nicchātā, upasantā carissatī’’ti.
… គុត្តា ថេរី…។
… Guttā therī….
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរីគាថា-អដ្ឋកថា • Therīgāthā-aṭṭhakathā / ៧. គុត្តាថេរីគាថាវណ្ណនា • 7. Guttātherīgāthāvaṇṇanā
