| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
២. គុហដ្ឋកសុត្តំ
2. Guhaṭṭhakasuttaṃ
៧៧៨.
778.
សត្តោ គុហាយំ ពហុនាភិឆន្នោ, តិដ្ឋំ នរោ មោហនស្មិំ បគាឡ្ហោ;
Satto guhāyaṃ bahunābhichanno, tiṭṭhaṃ naro mohanasmiṃ pagāḷho;
ទូរេ វិវេកា ហិ តថាវិធោ សោ, កាមា ហិ លោកេ ន ហិ សុប្បហាយា។
Dūre vivekā hi tathāvidho so, kāmā hi loke na hi suppahāyā.
៧៧៩.
779.
ឥច្ឆានិទានា ភវសាតពទ្ធា, តេ ទុប្បមុញ្ចា ន ហិ អញ្ញមោក្ខា;
Icchānidānā bhavasātabaddhā, te duppamuñcā na hi aññamokkhā;
បច្ឆា បុរេ វាបិ អបេក្ខមានា, ឥមេវ កាមេ បុរិមេវ ជប្បំ។
Pacchā pure vāpi apekkhamānā, imeva kāme purimeva jappaṃ.
៧៨០.
780.
កាមេសុ គិទ្ធា បសុតា បមូឡ្ហា, អវទានិយា តេ វិសមេ និវិដ្ឋា;
Kāmesu giddhā pasutā pamūḷhā, avadāniyā te visame niviṭṭhā;
ទុក្ខូបនីតា បរិទេវយន្តិ, កិំសូ ភវិស្សាម ឥតោ ចុតាសេ។
Dukkhūpanītā paridevayanti, kiṃsū bhavissāma ito cutāse.
៧៨១.
781.
តស្មា ហិ សិក្ខេថ ឥធេវ ជន្តុ, យំ កិញ្ចិ ជញ្ញា វិសមន្តិ លោកេ;
Tasmā hi sikkhetha idheva jantu, yaṃ kiñci jaññā visamanti loke;
ន តស្ស ហេតូ វិសមំ ចរេយ្យ, អប្បញ្ហិទំ ជីវិតមាហុ ធីរា។
Na tassa hetū visamaṃ careyya, appañhidaṃ jīvitamāhu dhīrā.
៧៨២.
782.
បស្សាមិ លោកេ បរិផន្ទមានំ, បជំ ឥមំ តណ្ហគតំ ភវេសុ;
Passāmi loke pariphandamānaṃ, pajaṃ imaṃ taṇhagataṃ bhavesu;
ហីនា នរា មច្ចុមុខេ លបន្តិ, អវីតតណ្ហាសេ ភវាភវេសុ។
Hīnā narā maccumukhe lapanti, avītataṇhāse bhavābhavesu.
៧៨៣.
783.
មមាយិតេ បស្សថ ផន្ទមានេ, មច្ឆេវ អប្បោទកេ ខីណសោតេ;
Mamāyite passatha phandamāne, maccheva appodake khīṇasote;
ឯតម្បិ ទិស្វា អមមោ ចរេយ្យ, ភវេសុ អាសត្តិមកុព្ពមានោ។
Etampi disvā amamo careyya, bhavesu āsattimakubbamāno.
៧៨៤.
784.
ឧភោសុ អន្តេសុ វិនេយ្យ ឆន្ទំ, ផស្សំ បរិញ្ញាយ អនានុគិទ្ធោ;
Ubhosu antesu vineyya chandaṃ, phassaṃ pariññāya anānugiddho;
យទត្តគរហី តទកុព្ពមានោ, ន លិប្បតី 1 ទិដ្ឋសុតេសុ ធីរោ។
Yadattagarahī tadakubbamāno, na lippatī 2 diṭṭhasutesu dhīro.
៧៨៥.
785.
សញ្ញំ បរិញ្ញា វិតរេយ្យ ឱឃំ, បរិគ្គហេសុ មុនិ នោបលិត្តោ;
Saññaṃ pariññā vitareyya oghaṃ, pariggahesu muni nopalitto;
អព្ពូឡ្ហសល្លោ ចរមប្បមត្តោ, នាសីសតី 3 លោកមិមំ បរញ្ចាតិ។
Abbūḷhasallo caramappamatto, nāsīsatī 4 lokamimaṃ parañcāti.
គុហដ្ឋកសុត្តំ ទុតិយំ និដ្ឋិតំ។
Guhaṭṭhakasuttaṃ dutiyaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ២. គុហដ្ឋកសុត្តវណ្ណនា • 2. Guhaṭṭhakasuttavaṇṇanā
